ບາງຫລັກການປະຄອງຮັກຄັ້ງນີ້ໃຫ້ໄປກັນລອດ

ຕໍ່ໄປນີ້ແມ່ນສິ່ງທີ່ບັ່ນທອນໃຫ້ຄວາມຮັກຂອງທ່ານອາດໄປກັນບໍ່ລອດ ດັ່ງນັ້ນ ຈົ່ງຟ້າວຫລີກເວັ້ນ ຫລື ປັບປ່ຽນໂຕເອງໂດຍໄວ.

1. ຜິດກັນຜ່ານຂໍ້ຄວາມ : ເຮົາຮູ້ວ່າມັນເປັນເລື່ອງງ່າຍທີ່ຈະປົດປ່ອຍຄວາມຄິດຂອງທ່ານຜ່ານທາງຂໍ້ຄວາມ ເພາະມັນທັງງ່າຍ ແລະ ສະດວກກ່ວາ, ແຕ່ບາງເທື່ອການພິມທຸກຢ່າງຜ່ານຂໍ້ຄວາມນັ້ນ ໝາຍເຖິງວ່າທ່ານກຳລັງໃສ່ອາລົມທັງໝົດ ໂດຍບໍ່ໄດ້ຟັງຝ່າຍກົງຂ້າມເລີຍ ເຊິ່ງນີ້ແມ່ນສິ່ງທີ່ຄົນຍັງບໍ່ທັນລຸນິຕິພາວະເຮັດ ນີ້ແມ່ນນິໄສທີ່ບໍ່ໜ້າຮັກທີ່ເຮັດໃຫ້ແຟນຂອງທ່ານເບື່ອໄດ້ ດັ່ງນັ້ນ ຈະດີກ່ວາບໍ່ຫາກທ່ານເລືອກທີ່ຈະລົມກັນຕໍ່ໜ້າ ຫລື ຢ່າງໜ້ອຍກໍລົມກັນຜ່ານທາງການລົມໂທລະສັບ.
2. ພະຍາຍາມປ່ຽນເຂົາ : ມັນຄົງຈະມີບາງອາລົມທີ່ຢາກໃຫ້ເຂົາປ່ຽນໂຕເອງເພື່ອໃຫ້ເຂົາເບິ່ງດີຂຶ້ນ ແລະ ເປັນທີ່ຍອມຮັບຫລາຍຂຶ້ນ, ແຕ່ເຮົາຈະບໍ່ຄວນບົງການເຂົາ ນັ້ນເປັນນິໄສທີ່ບໍ່ໜ້າຮັກ ເຖິງວ່າທ່ານຢາກຈະໃຫ້ເຂົາດີຂຶ້ນຊໍ່າໃດກໍຕາມ ແຕ່ການບັງຄັບ ຫລື ເວົ້າກະທົບກໍບໍ່ແມ່ນວິທີທີ່ຄົນຮັກ ຄວນຈະເຮັດຢ່າລືມວ່າໃນໄລຍະທຳອິດເຂົາມີລັກສະນະແນວໃດ, ທ່ານມັກເຂົາຢູ່ບ່ອນໃດ, ເຂົາມີຂໍ້ດີຫລວງຫລາຍທີ່ທ່ານຮັກ ດັ່ງນັ້ນ ຈົ່ງໃຫ້ກຽດຂົາໃນການຕັດສິນໃຈ ແລະ ເຮັດທຸກຢ່າງດ້ວຍໂຕຂອງເຂົາເອງ.

ໃນຄວາມເປັນຈິງເຮົາສາມາດລົມກັບເຂົາເຖິງຂໍ້ເສຍຂອງກັນ ແລະ ກັນໄດ້ ເພື່ອໃຫ້ຝ່າຍກົງຂ້າມເປັນຄົນທີ່ດີຂຶ້ນ ແລະ ພັດທະນາ ຫລາຍຂຶ້ນ, ແຕ່ 3 ສິ່ງທີ່ເຮົາຈະບໍ່ປ່ຽນເຂົາຢ່າງເດັດຂາດກໍຄື : ບຸກຄະລິກກະພາບ, ມິດຕະພາບ ຫລື ແຮງຈູງໃຈຂອງເຂົາ ດັ່ງນັ້ນ ໃຜທີ່ກຳລັງເຮັດໂຕເປັນຄົນຈອມບົງການກໍຕ້ອງຟ້າວປ່ຽນໂດຍໄວ.

3. ບໍ່ມີເລື່ອງຕື່ນເຕັ້ນ : ໃນເລື່ອງການເປັນທຳມະຊາດ ແລະ ຄວາມເປັນປະຈຳ (ໝັ້ນຄົງ) ມີຄວາມສຳຄັນໃນຄວາມສຳພັນ, ແຕ່ຖ້າຊຳ້ໆເກົ່າໆຫລາຍເກີນໄປກໍອາດເຮັດໃຫ້ຮູ້ສຶກເບື່ອໜ່າຍໄດ້. ດັ່ງນັ້ນ ທ່ານກໍໍຈຳເປັນຕ້ອງສ້າງບາງສິ່ງບາງຢ່າງເປັນປະຈຳ ດັ່ງເຊັ່ນ : ຄວາມໝັ້ນຄົງໃນຄວາມສຳພັນ ຄຽງຄູ່ໄປກັບການສ້າງຄວາມປະທັບໃຈ ຢ່າເຮັດໃຫ້ການພົບກັນເປັນເລື່ອງທີ່ຕ້ອງເຮັດ ແຕ່ຕ້ອງເຮັດໃຫ້ເຂົາຮູ້ສຶກມີຄວາມສຸກ ແລະ ຕື່ນເຕັ້ນທີ່ຈະໄດ້ຢູ່ກັບທ່ານ.
4. ບໍ່ຮັກສາສັນຍາ : ເລື່ອງນີ້ເປັນສິ່ງສຳຄັນຫລາຍ ຢ່າຄິດວ່າການຜິດຄຳເວົ້າ ແລະ ການບໍ່ຮັກສາສັນຍາເປັນເລື່ອງເລັກນ້ອຍທີ່ຈະປ່ອຍຜ່ານໄປໄດ້ ເພາະມັນສະແດງເຖິງຄວາມໃສ່ໃຈ ແລະ ການເອົາໃຈໃສ່ໃນໂຕເຂົາ ດັ່ງນັ້ນ ເມື່ອທ່ານຕັ້ງໃຈທີ່ຈະເຮັດຫຍັງບາງຢ່າງ ຫລື ສັນຍາກັບເຂົາວ່າຈະເຮັດຫຍັງໃຫ້ ກໍຈົ່ງຕັ້ງໃຈເຮັດມັນຢ່າງເຕັມທີ່ ເພາະມັນມີຜົນຫລາຍຕໍ່ຄວາມຮູ້ສຶກຂອງເຂົາ.
5. ເອົາທຸກຢ່າງລົງໃນໂລກອອນລາຍ : ບາງຄົນເລືອກທີ່ຈະລະບາຍທຸກໆຢ່າງໃນໂລກອອນລາຍ ເຮົາຮູ້ວ່າທ່ານຕ້ອງການຈະລະບາຍ, ແຕ່ກ່ອນຈະເອົາລົງໃນໂລກອອນລາຍ ສິ່ງທີ່ຕ້ອງຄຳນຶງກໍໍແມ່ນຄວາມຮູ້ສຶກຂອງເຂົາ ຢ່າປະຊົດປະຊັນ ຫລື ເອົາທຸກໆເລື່ອງລາວຂອງທ່ານລົງໃນໂລກອອນລາຍຕະຫລອດເວລາ ເຖິງວ່າສັງຄົມອອນລາຍຈະເປັນສ່ວນໜຶ່ງໃນຊີວິດ, ແຕ່ກໍຢ່າໃຫ້ມັນເປັນສິ່ງທີ່ເຮັດໃຫ້ເຂົາຮູ້ສຶກອຶດອັດ ຫລື ຮູ້ສຶກວ່າຖືກຈັບຕາເບິ່ງຕະຫລອດເວລາ, ບໍ່ຕ້ອງເຖິງຂັ້ນເອົາທຸກຢ່າງທີ່ເກີດຂຶ້ນໃນຊີວິດຄູ່ໄປລົງໝົດດອກ ແຕ່ຖ້າຫລຸດລົງ ຫລື ປັບໃຫ້ໜ້ອຍລົງໄດ້ ຮັບຮອງວ່າເຂົາຈະຮັກທ່ານຫລາຍຂຶ້ນແນ່ນອນ.
6. ຈົ່ມເລື່ອງເກົ່າຕະຫລອດ : ສິ່ງສຳຄັນຂອງຄວາມສຳພັນກໍໍຄື ການຍອມຮັບຄູ່ຂອງຕົນເອງ ວ່າເຂົາມີໂຕຕົນແນວໃດ ດັ່ງນັ້ນ ຖ້າຮູ້ໂຕເອງວ່າທ່ານມີແຕ່ເລື່ອງເກົ່າໆ ເວົ້າຊຳ້ໆຢູ່ຕະຫລອດເວລາ ໃຫ້ຮູ້ໂຕເລີຍວ່າສິ່ງນັ້ນມັນຈະເຮັດໃຫ້ເຂົາທົນບໍ່ໄຫວ ແລະ ບອກເລີກທ່ານໄດ້ຄືກັນ ດັ່ງນັ້ນ ປັບປ່ຽນນິໄສນີ້ໃຫ້ຫລຸດລົງ ເຂົາຈະໄດ້ຮັກທ່ານຫລາຍຍິ່ງຂຶ້ນ.
7. ມິດງຽບ : ບາງເທື່ອການມິດງຽບແມ່ນວິທີການແກ້ໄຂບັນຫາທີ່ດີສຸດ ໂດຍສະເພາະສະຖານະການທີ່ກຳລັງເຕັມໄປດ້ວຍອາລົມ, ແຕ່ຢ່າລືມວ່ານີ້ບໍ່ແມ່ນປະຕິກິລິຍາທີ່ດີສຸດ, ຢ່າລືມວ່າຫລັງຈາກອາລົມສະຫງົບລົງແລ້ວ ການລົມກັນແມ່ນສິ່ງສຳຄັນທີ່ຈະເຮັດໃຫ້ຄວາມສຳພັນໝັ້ນຄົງ ຢ່າມິດງຽບພຽງເພື່ອໃຫ້ເຂົາຮູ້ສຶກບໍ່ດີ ແລະ ອຶດອັດຈົນເກີດອາລົມຄຽດ ເພາະຫາກເປັນແບບນີ້ ຮັບຮອງວ່າໃຜກໍໍອົດທົນບໍ່ໄຫວ.