ຈະລາຈອນ ນະຄອນຫລວງຈະເອົາໃຈໃສ່ແກ້ໄຂການສັນຈອນແອອັດ
ທ່ານ ພັນໂທ ເພັງສະຫວັນ ທຳມາບູນ ຫົວໜ້າພະແນກ ຈະລາຈອນ ນະຄອນຫລວງວຽງຈັນ ໃຫ້ຮູ້ວ່າ: ໃນໄລຍະເປີດສົກຮຽນໃໝ່ນີ້, ເຈົ້າໜ້າທີ່ຈະລາຈອນ ພວກເຮົາຈະເພີ່ມທະວີການປະຕິບັດໜ້າທີ່ໂດຍສະເພາະແມ່ນ ການຈັດກຳລັງລົງລະບາຍການສັນຈອນຕາມທ້ອງຖະໜົນໃນຊົ່ວໂມງເລັ່ງດ່ວນ, ຕາມແຕ່ລະຈຸຸດ ແລະ ບ່ອນໂຮງຮຽນແອອັດ, ພ້ອມນັ້ນກໍຈະເພີ່ມທະວີມາດຕະການແກ້ໄຂກຸ່ມແກ້ງກວນເມືອງ, ການສະກັດກັ້ນອຸປະຕິເຫດ ແລະ ກວດກາ ນັກຂັບຂີ່ທີ່ດື່ມສິ່ງມືນເມົາ ແລະ ຖ້າຫາກພົບເຫັນຜູ້ລະເມີດກົດຈະລາຈອນແມ່ນຈະມີການປັບໃໝ 10 ເທົ່າ ແລະ ດຳເນີນຕາມລະບຽບກົດໝາຍ.
ຫົວໜ້າພະແນກຈະລາຈອນ ນະຄອນຫລວງວຽງຈັນ ໃຫ້ຮູ້ວ່: ປັດຈຸບັນ ເຫັນວ່າສະພາບການສັນຈອນມີຄວາມແອອັດ, ໂດຍສະເພາະໃນຊົ່ວໂມງເລັ່ງດ່ວນ, ບວກໃສ່ນັກຂັບຂີ່ຈຳນວນໜຶ່ງບໍ່ປະຕິບັດກົດລະບຽບ, ຈອດລົດຊະຊາຍ ແລະ ອື່ນໆ ເຊິ່ງເຮັດໃຫ້ການສັນຈອນມີຄວາມຫຍຸ້ງຍາກ ແລະ ບາງເສັ້ນທາງມີລົດຕິດແກ່ຍາວ, ຜ່ານມາເຈົ້າໜ້າທີ່ກໍໄດ້ຈັດສັນກຳລັງ ລົງລະບາຍການສັນຈອນ ແຕ່ກໍຍັງບໍ່ທັນໄດ້ທົ່ວເຖິງ, ສະນັ້ນ ສະພາບການສັນຈອນໃນໄລຍະເປີດສົກຮຽນໃໝ່ນີ້ ຍິ່ງຈະເຮັດໃຫ້ມີລົດຕິດແອອັດ, ເຈົ້າໜ້າທີ່ພວກເຮົາ ຈຶ່ງໄດ້ມີການເພີ່ມທະວີ ໂດຍຈັດກຳລັງຫລາຍກ່ວາ 600 ຄົນ ລົງປະຈໍາຕາມຈຸດຕ່າງໆ, ຂະນະດຽວກັນ ກໍຈະເພີ່ມທະວີເອົາໃຈໃສ່ແກ້ໄຂກຸ່ມແກ້ງກວນເມືອງ ແລະ ສະກັດກັ້ນອຸປະຕິເຫດຕາມທ້ອງຖະໜົນ, ຊຶ່ງໃນ 6 ເດືອນຕົ້ນປີພົບວ່າ: ຢູ່ ນະຄອນຫລວງວຽງຈັນ ມີອຸປະຕິເຫດເກີດຂຶ້ນກ່ວາ 500 ກໍລະນີ ແລະ ມີຜູ້ເສຍຊີວິດກ່ວາ 50 ຄົນ, ມີຜູ້ຂັບຂີ່ລະເມີດກົດຈະລາຈອນຫລາຍກ່ວາ 2 ພັນຄົນ, ໃນນັ້ນເຈົ້າໜ້າທີ່ໄດ້ກັກເອກະສານ ແລະ ກັກລົດທີ່ດັດແປງສະພາບຫລາຍກ່ວາ 20 ຄັນ.
