ຈີນຊ່ວຍເຫລືອຜ່າຕັດແກ່ນຕາຂຸ້ນໃຫ້ປະຊາຊົນລາວ
ມູນນິທິການແລກປ່ຽນໄມຕີຈິດມິດຕະພາບສາກົນປະຊາຊົນ ແຂວງຢູນນານ, ຄະນະກຳມາທິການສາທາລະນະສຸກ ແລະ ວາງແຜນຄອບຄົວ ແຂວງຢູນນານ, ໂຮງໝໍເລກໜຶ່ງ ແຂວງຢູນນານ ຮ່ວມກັບ ໂຮງໝໍມະໂຫສົດ ແລະ ສະມາຄົມການຄ້າຊາວຈີນຕ່າງດ້າວ ປະຈຳລາວ ໄດ້ເປີດໂຄງການເຄື່ອນໄຫວແສງສະຫວ່າງຂອງແຂວງຢູນນານ ສປ ຈີນ ໃນວັນທີ 21 ສິງຫານີ້ ທີ່ໂຮງໝໍມະໂຫສົດ ເພື່ອຊ່ວຍເຫລືອຜ່າຕັດພະຍາດແກ່ນຕາຂຸ້ນໃຫ້ປະຊາຊົນໃນນະຄອນຫລວງວຽງຈັນ ໂດຍບໍ່ເສຍຄ່າ ແນໃສ່ໃຫ້ຄົນເຈັບທີ່ເປັນພະຍາດແກ່ນຕາຂຸ້ນທີ່ທຸກຍາກໄດ້ເຂົ້າເຖິງການປິ່ນປົວ ແລະ ເຮັດໃຫ້ເຂົາເຈົ້າໄດ້ເຫັນຮຸ່ງດີກວ່າເກົ່າ ແລະ ໄດ້ດຳລົງຊີວິດດີຂຶ້ນ. ການຊ່ວຍເຫລືອຄັ້ງນີ້ມີຜູ້ເຂົ້າຮ່ວມໂຄງການຈຳນວນ 100 ຄົນ ລວມມູນຄ່າການຊ່ວຍເຫລືອເກືອບ 400 ລ້ານກີບ ເຊິ່ງທີມແພດຊ່ຽວຊານຕາຈາກ ສປ ຈີນ, ພ້ອມດ້ວຍອຸປະກອນຜ່າຕັດ ແລະ ຢາຈຳນວນໜຶ່ງ.
ທ່ານອຳນວຍການໂຮງໝໍມະໂຫສົດ ກ່າວວ່າ: ໂຄງການດັ່ງກ່າວແມ່ນໄດ້ເລີ່ມໃຫ້ບໍລິການມາແຕ່ວັນທີ 20-25 ສິງຫາ ແລະ ຈັດຂຶ້ນເປັນຄັ້ງທີສອງຢູ່ນະຄອນຫລວງວຽງຈັນ ຊຶ່ງຄັ້ງທຳອິດມີຄົນເຈັບທັງໝົດ 327 ຄົນເຂົ້າຮັບການຜ່າຕັດພະຍາດແກ່ນຕາຂຸ້ນ.
