ອັດຕະປື ເລັ່ງສ້ອມແປງເສັ້ນທາງເຂົ້າສູ່ເຂດໄພພິບັດ
ພາຍຫລັງສະພາບນ້ຳເລີ່ມບົກແຫ້ງ, ພະແນກໂຍທາທິການ ແລະ ຂົນສົ່ງແຂວງອັດຕະປື ໄດ້ສືບຕໍ່ສ້ອມແປງເສັ້ນທາງຫລວງ 18 A ຈາກເທສະບານແຂວງອັດຕະປືຜ່ານເມືອງສະໜາມໄຊໄປຫາເຂດໄພພິບັດ ເຊິ່ງມີໄລຍະທາງຍາວ 42 ກິໂລແມັດ, ມີຂົວ 12 ແຫ່ງ, ໃນນັ້ນ ຂົວ 4 ແຫ່ງ ແມ່ນມອບໃຫ້ບໍລິສັດ SK ສ.ເກົາຫລີ ເປັນຜູ້ກໍ່ສ້າງ, ອີກ 4 ແຫ່ງ ມອບໃຫ້ລັດວິສາຫະກິດຄົມມະນາຄົມຂົນສົ່ງແຂວງ ມີມູນຄ່າ 24,8 ຕື້ກີບ, ຄາດວ່າຈະໃຫ້ການກໍ່ສ້າງສຳເລັດພາຍໃນ 2 ເດືອນ.
ທ່ານຫົວໜ້າພະແນກໂຍທາທິການ ແລະ ຂົນສົ່ງແຂວງອັດຕະປື ໃຫ້ຮູ້ວ່າ: ເນື່ອງຈາກເສັ້ນທາງຫລວງແຫ່ງຊາດ 18 A ໄດ້ຮັບຜົນກະທົບຈາກພາຍພາຍຸເບີບີນກາ (BEBINCA) ພັດເຂົ້າພາກໃຕ້ຂອງລາວ ໃນລະຫວ່າງວັນທີ 15-16 ສິງຫາຜ່ານມາ ເຊິ່ງໄດ້ເກີດມີຝົນຕົກໜັກ ເຮັດໃຫ້ນ້ຳເຊກອງເພີ່ມຂຶ້ນສູງ ສົ່ງຜົນເຮັດໃຫ້ນ້ຳຖ້ວມເສັ້ນທາງຫລາຍຈຸດ ພາຫະນະບໍ່ສາມາດສັນຈອນໄປມາໄດ້ເປັນເວລາຫລາຍວັນ, ພາຍຫລັງນ້ຳຫລຸດລົງ ໜ່ວຍງານ ຍທຂ ແຂວງ ກໍໄດ້ຮີບຮ້ອນວາງແຜນສ້ອມແປງເສັ້ນທາງດັ່ງກ່າວໂດຍໄວ ເພື່ອເຮັດໃຫ້ການສັນຈອນໄປມາມີຄວາມສະດວກ ໂດຍສະເພາະການຂົນສົ່ງເຄື່ອງຊ່ວຍເຫລືອບັນເທົາທຸກທາງລົດໃຫ້ໄປຮອດໄປເຖິງຜູ້ປະສົບໄພໄວຂຶ້ນກວ່າເກົ່າ.
