ລາວບອນເລີ້ ເປີດສອນບານບ້ວງ ສົ່ງເສີມເຍົາວະຊົນຫັນມາຫລິ້ນກິລາ
ລາວບອນເລີ້ ຮ່ວມກັບສະຫະພັນບານບ້ວງແຫ່ງຊາດລາວ ເປີດສອນບານບ້ວງໃຫ້ເຍົາວະຊົນລາວຮຸ່ນອາຍຸ 6-18 ປີ ເພື່ອສົ່ງເສີມເຍົາວະຊົນຫັນມາຫລິ້ນກິລາປະເພດນີ້ໃຫ້ຫລາຍຂຶ້ນ ໂດຍເປີດສອນທຸກໆວັນເສົາ-ທິດເວລາ 8:00-12:00 ໂມງ ທີ່ເດີ່ນບານບ້ວງວິທະຍາໄລສັບພະວິຊາ.
ທ່ານ ລິດທິເດດ ຄໍາຮຸ່ງ ປະທານສະໂມສອນລາວບອນເລີ້ ທັງເປັນຄູຝຶກບານບ້ວງທີມຊາດລາວ ໄດ້ໃຫ້ສໍາພາດວ່າ: ປັດຈຸບັນພວກເຮົາໄດ້ເປີດສອນບານບ້ວງໃຫ້ແກ່ເຍົາວະຊົນລາວທີ່ມີອາຍຸ 6-18 ປີ ຍິງ-ຊາຍ ທີ່ມີຄວາມຮັກມັກກິລາປະເພດນີ້ ເພື່ອສານຝັນຕໍ່ໃຫ້ກາຍເປັນນັກກິລາທີມຊາດໃນອະນາຄົດ ພ້ອມທັງສົ່ງເສີມໃຫ້ນັກກິລາໃຊ້ເວລາຫວ່າງໃຫ້ເກີດປະໂຫຍດ ເຊິ່ງການຝຶກຊ້ອມ ຫລື ເປີດສອນດັ່ງກ່າວແບ່ງອອກເປັນ 3 ລຸ້ນຄື: ລຸ້ນອາຍຸ 6-8 ປີ, 8-14 ປີ ແລະ 14-18 ປີ. ສໍາລັບຄູຝຶກແມ່ນມາຈາກສະຫະພັນບານບ້ວງແຫ່ງຊາດລາວ ຈໍານວນ 12 ຄົນ ທີ່ມາຖ່າຍທອດຄວາມຮູ້ໃຫ້ແກ່ນ້ອງໆນັກກິລາ.
ທ່ານ ລິດທິເດດ ຄໍາຮຸ່ງ ຍັງເວົ້າວ່າ: ການເປີດສອນຄັ້ງນີ້ ຖືວ່າເປັນຄັ້ງທໍາອິດຂອງວົງການກິລາບານບ້ວງຂອງລາວ ແລະ ເປັນບ່ອນດຽວທີ່ໄດ້ເປີດສອນມາເປັນເວລາ 2 ເດືອນກວ່າແລ້ວ ເຊິ່ງຜ່ານການເປີດສອນເຫັນວ່ານັກກິລາໃຫ້ຄວາມສົນໃຈຫລາຍພໍສົມຄວນ, ປັດຈຸບັນນັກກິລາຂອງພວກເຮົາລວມທັງໝົດ 60 ກວ່າຄົນ. ດັ່ງນັ້ນ, ຖ້າທ່ານໃດຢາກສົ່ງເສີມລູກທີ່ມີຄວາມຮັກມັກກິລາປະເພດນີ້ສາມາດພົວພັນໄດ້ທີ່ເບີ 020 22232500.
