ຂະແໜງທຸລະກິດເລັ່ງຜູ້ນຳອາເມລິກາ ແລະ ຕວກກີຫາລືກັນຫລັງກະທົບການລົງທຶນ
ກຸ່ມທຸລະກິດອາເມລິກາ ແລະ ຕວກກີ ຖະແຫລງເຕືອນວ່າ: ຄວາມຂັດແຍ່ງທາງການເມືອງລະຫວ່າງສອງປະເທດສະມາຊິກອົງການນາໂຕ ສົ່ງຜົນກະທົບຕໍ່ຄວາມເຊື່ອໝັ້ນຂອງນັກລົງທຶນ ແລະ ບາງບໍລິສັດຕ້ອງຢຸດແຜນການລົງທຶນ.
ຜູ້ອຳນວຍການສະພາການຄ້າອາເມລິກາ-ຕວກກີ ແລະ ສະພາທຸລະກິດຕວກກີ-ອາເມລິກາ ເຊິ່ງປະກອບມີຜູ້ແທນຈາກ 250 ບໍລິສັດ ຖະແຫລງຮຽກຮ້ອງໃຫ້ປະທານາທິບໍດີ ໂດນັລ ທຣຳ ຂອງອາເມລິກາ ແລະ ປະທານາທິບໍດີ ເຣເຈບ ທາຍຍິບ ແອໂດອານ ຂອງຕວກກີ ພົບປະເຈລະຈາກັນເພື່ອຢຸດຄວາມຂັດແຍ່ງ ກໍລະນີອາເມລິກາຮຽກຮ້ອງໃຫ້ຕວກກີປ່ອຍຕົວບາດຫລວງຊາວອາເມລິກາຕາມຂໍ້ກ່າວຫາພົວພັນແຜນໂຄ່ນລົ້ມອຳນາດຜູ້ນຳຕວກກີເມື່ອ 2 ປີກ່ອນ. ຖະແຫລງການສະພາທຸລະກິດຕວກກີ-ອາເມລິກາ ຂໍໃຫ້ປະທານາທິບໍດີທັງສອງຫາລືເພື່ອຮື້ຟື້ນການພົວພັນຄືເກົ່າ ກ່ອນຄວາມຂັດແຍ່ງຈະສົ່ງຜົນເສຍຫາຍຕໍ່ການພົວພັນໃນໄລຍະຍາວ.
