ນາຍົກມາເລເຊຍຢືນຢັນຍົກເລີກ 3 ໂຄງການ ທີ່ຈີນສະໜັບສະໜູນຈົນກວ່າ ຈະແກ້ບັນຫາໜີ້ໄດ້
ທ່ານ ມະຫາເທ ໂມຮຳໝັດ ນາຍົກລັດຖະມົນຕີມາເລເຊຍ ກ່າວຢືນຢັນລະຫວ່າງການຢ້ຽມຢາມນະຄອນຫລວງປັກກິ່ງຂອງຈີນ ໃນວັນທີ 21 ສິງຫາວ່າ: ຈະຍົກເລີກໂຄງການ 3 ໂຄງການ ມູນຄ່າ 22.000 ລ້ານໂດລາສະຫະລັດ ທີ່ຈີນໃຫ້ການສະໜັບສະໜູນຈົນກວ່າມາເລເຊຍຈະຫາທາງຊຳລະໜີ້ທີ່ຄ້າງຢູ່ໄດ້.
ໂຄງການດັ່ງກ່າວໄດ້ແກ່ ໂຄງການລົດໄຟທີ່ເຊື່ອມແຄມຝັ່ງຕາເວັນອອກຂອງມາເລເຊຍກັບພາກໃຕ້ຂອງໄທ ແລະ ນະຄອນຫລວງກົວລາລຳເປີຂອງມາເລເຊຍ ແລະ ໂຄງການທໍ່ສົ່ງແກັສອີກ 2 ໂຄງການ. ນາຍົກລັດຖະມົນຕີ ມາຫາເທ ກ່າວຕໍ່ສື່ມວນຊົນກ່ອນສຳເລັດການຢ້ຽມຢາມຈີນເປັນເວລາ 5 ວັນວ່າ: ທ່ານໄດ້ຊີ້ແຈງເຫດຜົນໃນການຍົກເລີກໂຄງການລົດໄຟແຄມຝັ່ງຕາເວັນອອກກັບບັນດາຜູ້ນຳຈີນແລ້ວ ແລະ ກ່າວວ່າ: ໂຄງການດັ່ງກ່າວຕ້ອງມີການກູ້ຢືມເງິນຈຳນວນມະຫາສານ ແລະ ມາເລເຊຍບໍ່ສາມາດຈະຈ່າຍຄືນໄດ້. ດັ່ງນັ້ນ ຈຶ່ງຍັງບໍ່ຈຳເປັນຕ້ອງມີໂຄງການດັ່ງກ່າວໃນເວລານີ້ ແລະ ບັນຫາທີ່ມາເລເຊຍຕ້ອງແກ້ໄຂໃຫ້ໄດ້ໃນເວລານີ້ ຄືບັນຫາດ້ານການເງິນ. ທັງນີ້ ຜູ້ນຳມາເລເຊຍກຳລັງພະຍາຍາມຫາທາງຫລຸດພາລະໜີ້ສິນຂອງປະເທດ ເຊິ່ງມີຈຳນວນສູງເຖິງ 250.000 ລ້ານໂດລາສະຫະລັດ.
ລາຍງານລະບຸວ່າ: ນາຍົກລັດຖະມົນຕີ ມະຫາເທ ກ່າວພາຍຫລັງການພົບປະກັບນາຍົກລັດຖະມົນຕີ ຫລີ ເຄີ້ສຽງ ຂອງຈີນ ໃນວັນທີ 20 ສິງຫາວ່າ: ທ່ານເຊື່ອວ່າຈີນຈະຊ່ວຍມາເລເຊຍແກ້ໄຂບັນຫາດ້ານການເງິນໄດ້.
ກ່ອນໜ້ານີ້, ໃນເດືອນພຶດສະພາຜ່ານມາ, ນາຍົກລັດຖະມົນຕີ ມະຫາເທ ຫາກໍຢຸດພັກໂຄງການລົດໄຟຄວາມໄວສູງລະຫວ່າງ ສິງກະໂປ ແລະ ມາເລເຊຍ ເຊິ່ງຕົກລົງກັນໄວ້ໃນຫລາຍປີກ່ອນ ເນື່ອງຈາກຕ້ອງໃຊ້ເງິນລົງທຶນມະຫາສານ.
