ເດືອນຜ່ານມາ, ຈໍານວນຜູ້ເສຍຊີວິດຈາກອຸປະຕິເຫດຢູ່ນະຄອນຫລວງວຽງຈັນເພີ່ມຂຶ້ນເປັນ 32 ຄົນ
May 4, 2017 - 10:55 AM
ພະແນກຕຳຫຼວດຈະລາຈອນນະຄອນຫຼວງວຽງຈັນ ໃຫ້ຮູ້ວ່າ: ເດືອນເມສາ ທີ່ຜ່ານມາ, ທົ່ວນະຄອນຫຼວງວຽງຈັນ, ມີອຸບັດຕິເຫດເກີດຂຶ້ນຢູ່ຕາມເສັ້ນທາງ ຕ່າງໆ 159 ກໍລະນີ, ສົ່ງຜົນໃຫ້ມີຜູ້ເສຍຊີວິດ 32 ຄົນ, ໃນນັ້ນເປັນຍິງ 4 ຄົນ, ທຽບໃສ່ເດືອນມີນາເພີ່ມຂຶ້ນ 21 ກໍລະນີ ແລະ ມີຜູ້ເສຍຊີວິດເພີ່ມຂຶ້ນ 6 ຄົນ, ເມືອງທີ່ມີອຸປະຕິເຫດເກີດຂຶ້ນຫລາຍກວ່າໝູ່ແມ່ນເມືອງໄຊທານີ 26 ກໍລະນີ.
ສາເຫດຕົ້ນຕໍຂອງການເກີດອຸບັດຕິເຫດແມ່ນຂັບຂີ່ ໄວເກີນກຳນົດ, ເມົາແລ້ວຂັບ, ລວມໄປເຖິງສະພາບເຕັກນິກຂອງລົດບໍ່ໄດ້ ມາດຕະຖານ, ເພື່ອຫຼີກເວັ້ນຈາກອຸບັດຕິເຫດດັ່ງກ່າວຜູ້ຂັບຂີ່ຕ້ອງເອົາໃຈໃສ່ປະຕິ ບັດຕາມກົດລະບຽບຈະລາຈອນໃຫ້ເຂັ້ມງວດ, ພິເສດແມ່ນໃຫ້ເຂັ້ມງວດຄວບຄຸມຄວາມໄວ, ດື່ມສິ່ງມຶນເມົາແລ້ວບໍ່ຂັບ ແລະ ຕ້ອງຂັບຂີ່ຢ່າງມີມາລະຍາດ, ປະຕິບັດລະບຽບຈະລາຈອນໃຫ້ດີ. ຖ້າປະຕິບັດໄດ້ຄືແນວນີ້ ກໍຈະຊ່ວຍຫຼຸດຜ່ອນອຸບັດຕິເຫດລົງໄດ້.
