ນະຄອນຫລວງເຊອູນ ມອບເງິນຊ່ວຍເຫລືອຜູ້ປະສົບໄພນໍ້າຖ້ວມຢູ່ເມືອງສະໜາມໄຊ
ເມື່ອທ້າຍອາທິດຜ່ານມານີ້, ທີ່ຫ້ອງວ່າການນະຄອນຫລວງເຊອູນ ສ.ເກົາຫລີ, ໄດ້ຈັດພິທີມອບ-ຮັບເງິນຊ່ວຍເຫລືອຜູ້ປະສົບໄພນໍ້າຖ້ວມຢູ່ເມືອງສະຫນາມໄຊ ແຂວງອັດຕະປືຈຳນວນ 56 ກວ່າລ້ານວອນ (ສະກຸນເງິນເກົາຫລີ) ຫລື ປະມານ 50.000 ໂດລາສະຫະລັດ, ຈາກນະຄອນຄອນຫລວງເຊອູນ, ເຊິ່ງກ່າວມອບໂດຍທ່ານ ປັກ ວອນ ຊຸນ (Park Won Soon) ເຈົ້າຄອງນະຄອນຫລວງເຊອູນ ແລະ ກ່າວຮັບໂດຍທ່ານ ຄຳສວຍ ແກ້ວດາລາວົງ ເອກອັກຄະລັດຖະທູດລາວປະຈຳ ສ.ເກົາຫລີ, ໂດຍມີພະນັກງານຂອງທັງສອງພາກສ່ວນເຂົ້າຮ່ວມ.
ໃນໂອກາດນີ້, ທ່ານ ປັກ ວອນ ຊຸນ ໄດ້ສະແດງຄວາມເສຍໃຈເປັນຢ່າງຍິ່ງຕໍ່ກັບເຫດການໃນຄັ້ງນີ້, ອັນໄດ້ສ້າງຄວາມສູນເສຍຕໍ່ຊີວິດ ແລະ ຊັບສິນຂອງປະຊາຊົນໃນເຂດເມືອງດັ່ງກ່າວ, ໃນນາມລັດຖະບານ ສ.ເກົາຫລີ ກໍຄືນະຄອນຫລວງເຊອູນ ເຊິ່ງເປັນເມືອງແຮກສ່ຽວກັບນະຄອນຫລວງວຽງຈັນ ສປປ ລາວ ຍີນດີໃຫ້ການຊ່ວຍເຫລືອຜູ້ປະສົບໄພພິບັດດັ່ງກ່າວ. ໃນໂອກາດນີ້, ທ່ານເອກອັກຄະລັດຖະທູດໄດ້ຕາງຫນ້າລັດຖະບານ ກໍຄືປະຊາຊົນລາວ, ໂດຍສະເພາະຜູ້ປະສົບໄພພິບັດ ກ່າວສະແດງຄວາມຂອບໃຈເປັນຢ່າງສູງຕໍ່ການຊ່ວຍເຫລືອຂອງລັດຖະບານ ກໍຄືປະຊາຊົນ ສ.ເກົາຫລີ ທີ່ໄດ້ໃຫ້ການຊ່ວຍເຫລືອບໍ່ວ່າຈະເປັນການປະກອບສ່ວນດ້ານວັດຖຸປັດໄຈຕ່າງໆ ແລະ ທີມບັນເທົາໄພພິບັດ (ທີມແພດ) ເຊິ່ງເປັນການຊ່ວຍເຫລືອທີ່ສຳຄັນໃນການຟື້ນຟູຊີວິດການເປັນຢູ່ຂອງເຂົາເຈົ້າໃຫ້ກັບຄືນສູ່ສະພາບປົກກະຕິໂດຍໄວ.
