U 12 ລາວ ຖືກຕ້ອນຮັບຢ່າງສົມກຽດ

ໃນວັນທີ 18 ສິງຫາ 2018 ທີ່ສະໜາມບິນວັດໄຕ ນະຄອນຫລວງວຽງຈັນ, ທ່ານ ພອນປະເສີດ​ ເພັດຊົມພູ ຕາງໜ້າສະຫະພັນບານເຕະແຫ່ງຊາດລາວ ໄດ້ຕ້ອນຮັບທ່ານ ອາລ໋ອບ ມະນີບົດ ປະທານ ອາຄາເດມີ ລ໋ອບສະເຕດ້ຽມ ພ້ອມ ຄະນະນໍາ ແລະ ຄູຝຶກທີມຊາດລາວ U 12 ( KIETTISACK INTERNATTIONAL BY LOB STADIUM ) ທີ່ຍາດໄດ້ແຊ້ມຂອງການແຂ່ງຂັນ ຊູງຊີງລີງ ຄັບ 2018 ທີ່ ສປ ຈີນ.

ທ່ານ ອາລ໋ອບ ມະນີບົດ ໄດ້ໃຫ້ສໍາພາດວ່າ: ການແຂ່ງຂັນຄັ້ງນີ້ຖືວ່າເປັນຄັ້ງທີ 2 ຂອງພວກເຮົາທີ່ໄດ້ເຂົ້າຮ່ວມລາຍການດັ່ງກ່າວ ເຊິ່ງຄັ້ງທໍາອິດຍາດໄດ້ພຽງອັນດັບທີ 3 ເທົ່ານັ້ນ, ແຕ່ມາຄັ້ງນີ້ພວກເຮົາສາມາດຍາດໄດ້ແຊ້ມດັ່ງກ່າວ ເຊິ່ງໄດ້ສ້າງຄວາມພາກພູມໃຈໃຫ້ແກ່ຄະນະນໍາທີ່ສຸດ ແລະ ທີ່ຂາດບໍ່ໄດ້ນັ້ນກໍຄືກໍາລັງໃຈທີ່​ພໍ່ແມ່ພີ່ນ້ອງທົ່ວປະເທດໄດ້ສົ່ງໃຫ້ແກ່ນັກກິລາຂອງພວກເຮົາໄດ້ມີກໍາລັງໃຈລົງສະໜາມແຕ່ລະຄັ້ງ. ສໍາລັບການແຂ່ງຂັນຄັ້ງນີ້ມີ 8 ປະເທດເຂົ້າຮ່ວມ ແບ່ງອອກເປັນ 2 ກຸ່ມ ຄື: ກຸ່ມເອ ປະກອບມີ ຈີນ, ອິນໂດເນເຊຍ, ກໍາປູເຈຍ, ຟີລິບປິນ; ສ່ວນກຸ່ມບີ ປະກອບມີ ລາວ, ມຽນມາ, ໄທ, ຫວຽດນາມ. ໂດຍການແຂ່ງຂັນໄດ້ດໍາເນີນແຕ່ວັນທີ 11 ຫາ 17 ສິງຫາຜ່ານມານີ້ ທີມຊາດຂອງພວກເຮົາສາມາດສ້າງຜົນງານໂດດເດັ່ນໂດຍຜ່ານເຂົ້າຮອບ 4 ທີມແບບງ່າຍດາຍ ແລະ ສາມາດຍາດໄດ້ແຊ້ມໃນທີ່ສຸດ.

ການແຂ່ງຂັນຊູງຊີງລີງ ຄັບ 2018 ທີ່ ສປ ຈີນ ອັນດັບທີ 1 ທີມຊາດລາວ, ອັນດັບທີ 2 ທີມຊາດໄທ, ອັນດັບທີ 3 ທີມຊາດຈີນ, ອັນດັບທີ 4 ທີມຊາດຟີລິປິນ.