ຈຳນວນຜູ້ເສຍຊີວິດຈາກນ້ຳຖ້ວມ ຢູ່ອິນເດຍເພີ່ມຂຶ້ນເກີນ 357 ຄົນ
ເຈົ້າໜ້າທີ່ອິນເດຍກ່າວໃນວັນທີ 19 ສິງຫານີ້ວ່າ: ຈຳນວນຜູ້ເສຍຊີວິດຈາກອຸທົກກະໄພຄັ້ງຮ້າຍແຮງໃນຮອບສະຕະວັດທີ່ລັດເກຣລະຂອງອິນເດຍເພີ່ມຈຳນວນຂຶ້ນ 357 ກວ່າຄົນ ແລະ ໂຄງສ້າງພື້ນຖານເສຍຫາຍຄິດເປັນມູນຄ່າປະມານ 3.000 ລ້ານໂດລາສະຫະລັດ.
ລັດເກຣລະເຊິ່ງເປັນແຫລ່ງທ່ອງທ່ຽວທາງພາກໃຕ້ຂອງອິນເດຍ ຜະເຊີນຝົນມໍລະສຸມຢ່າງໜັກມາແຕ່ທ້າຍເດືອນພຶດສະພາ ເຮັດໃຫ້ດິນເຈື່ອນ ແລະ ນ້ຳຖ້ວມກະທັນຫັນໃນຫລາຍທ້ອງຖິ່ນ. ເຈົ້າໜ້າທີ່ຖະແຫລງວ່າ: ຈາກສະພາບຝົນຕົກໜັກໃນລັດເກຣລະນັບແຕ່ວັນທີ 29 ພຶດສະພາ ເຮັດໃຫ້ມີຜູ້ເສຍຊີວິດ 357 ຄົນແລ້ວ ໂດຍໃນໄລຍະ 24 ຊົ່ວໂມງຜ່ານມາ ມີລາຍງານຜູ້ເສຍຊີວິດສູງເຖິງ 33 ຄົນ. ຖະແຫລງການລະບຸວ່າ: ປະຊາຊົນປະມານ 353.000 ຄົນຕ້ອງຍ້າຍໄປອາໄສຢູ່ສູນພັກຊົ່ວຄາວທີ່ຈັດໄວ້ 3.026 ແຫ່ງ. ຂະນະທີ່ກອງທັບບົກ, ກອງທັບເຮືອ ແລະ ກອງທັບອາກາດ ອອກກະຈາຍກຳລັງກັນຄົ້ນຫາປະຊາຊົນທີ່ຍັງຕົກຄ້າງຢູ່ໃນພື້ນທີ່ປະສົບອຸທົກກະໄພ, ຖະໜົນ ແລະ ຂົວ 134 ແຫ່ງໄດ້ຮັບຄວາມເສຍຫາຍ, ພື້ນທີ່ຖືກຕັດຂາດ.
PM Modi conducted an aerial survey of flood affected areas. He has announced a financial assistance of Rs 500 crore to the state and an ex-gratia of Rs. 2 lakh per person to the next kin of the deceased and Rs. 50,000 to those seriously injured. #PMModiWithKeralam pic.twitter.com/6CU6YWTohW
— BJP (@BJP4India) August 18, 2018
ນາຍົກລັດຖະມົນຕີ ນາເຣນທຣາ ໂມດີ ກ່າວຫລັງລົງພື້ນທີ່ຫລາຍແຫ່ງໃນລັດເກຣລະວ່າ: ລັດຖະບານຈັດສັນງົບປະມານສຸກເສີນເພື່ອຊ່ວຍເຫລືອລັດເກຣລະໃນເບື້ອງຕົ້ນ 75 ລ້ານໂດລາສະຫະລັດ. ຂະນະທີ່ລັດຖະບານທ້ອງຖິ່ນຂອງອີກຫລາຍລັດສາມາດລະດົມທຶນຮ່ວມກັນໄດ້ແລ້ວຢ່າງໜ້ອຍ 20 ລ້ານໂດລາສະຫະລັດ ເພື່ອສະໜັບສະໜູນປະຕິບັດການກູ້ໄພ ແລະ ໃຫ້ການຊ່ວຍເຫລືອດ້ານມະນຸດສະທຳຜູ້ປະສົບໄພໃນລັດເກຣລະ.
