ເມັກຊິກຢຶດຢາໄອສ໌ 50 ໂຕນ ພົບໃນຫ້ອງແລັບແກ້ງຄ້າຢາ
ທະຫານເມັກຊິກຢຶດຢາໄອສ໌ໄດ້ຫລາຍເປັນປະຫວັດສາດເຖິງ 50 ໂຕນ ໂດຍພົບໃນຫ້ອງແລັບຂອງແກ້ງຄ້າຢາເສບຕິດໃນລັດຊີນາໂລອາ ທາງຕາເວັນຕົກສຽງເໜືອຂອງປະເທດ.
ກອງທັບເມັກຊິກຖະແຫລງວ່າ: ພົບຢາເສບຕິດໃນຫ້ອງແລັບເມືອງອັລໂກຢອນກີ ໃກ້ກັບເມືອງກູເລຍກັງ ເມືອງເອກຂອງລັດຊີນາໂລອາ ລະຫວ່າງການບຸກໂຈມຕີໃນວັນທີ 16 ສິງຫາ. ຂະນະທີ່ກອງທັບຖະແຫລງວ່າ: ບຸກຄົ້ນ ແລະ ຮື້ທຳລາຍຫ້ອງແລັບຜະລິດຢາເສບຕິດ ແລະ ຫ້ອງເກັບຢາເສບຕິດໃຕ້ດິນອີກ 2 ຫ້ອງ ພົບຢາໄອສ໌ປະມານ 50 ໂຕນ. ສື່ເມັກຊິກລາຍງານວ່າ: ຫ້ອງແລັບນີ້ເປັນຂອງແກ້ງຢາເສບຕິດຊີນາໂລອາ. ຫົວໜ້າແກ້ງຄົນກ່ອນຄືທ້າວ ຮົວຄິນ ເອລ ຊາໂປ ກຸມານ ລາຊາຢາເສບຕິດຊື່ດັງທີ່ຖືກທາງການເມັກຊິກຈັບໄດ້ ແລະ ເນລະເທດໄປອາເມລິກາໃນເດືອນມັງກອນປີກ່ອນ.
ລັດຖະບານເມັກຊິກໃຫ້ກອງທັບເຂົ້າມາເຮັດສົງຄາມປາບປາມຢາເສບຕິດນັບແຕ່ປີ 2006 ນຳມາເຊິ່ງການຈັບກຸມລາຊາຢາເສບຕິດຊື່ດັງຫລາຍຄົນ ແລະ ຢຶດຢາເສບຕິດໄດ້ເປັນຈຳນວນຫລາຍ, ແຕ່ຂະນະດຽວກັນໄດ້ເຮັດໃຫ້ເກີດເຫດຮຸນແຮງຕາມມາ ມີຄົນເສຍຊີວິດແລ້ວຫລາຍກວ່າ 200.000 ຄົນ.
