ມອບ-ຮັບໜ້າທີ່ເຈົ້າແຂວງອຸດົມໄຊຜູ້ໃໝ່

ພິທີມອບ-ຮັບໜ້າທີ່ເລຂາພັກແຂວງ, ເຈົ້າແຂວງອຸດົມໄຊລະຫວ່າງທ່ານ ເພັດສາຄອນ ຫລວງອາໄພ ເຈົ້າແຂວງຜູ້ເກົ່າ ແລະ ທ່ານ ຄໍາພັນ ເຜີຍຍະວົງ ເຈົ້າແຂວງຜູ້ໃໝ່ ໄດ້ຈັດຂຶ້ນໃນວັນທີ 16 ສິງຫານີ້ທີ່ຫ້ອງວ່າການປົກຄອງແຂວງອຸດົມໄຊ, ໂດຍການໃຫ້ກຽດເຂົ້າຮ່ວມຂອງທ່ານ ຈັນສີ ໂພສີຄໍາ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ, ມີການນໍາຈາກສູນກາງ ແລະ ແຂວງເຂົ້າຮ່ວມຢ່າງພ້ອມພຽງ ເພື່ອປະຕິບັດຕາມມະຕິຕົກລົງຂອງກົມການເມືອງສູນກາງພັກ.

ໃນໂອກາດນີ້, ທ່ານຫົວໜ້າຄະນະຈັດຕັ້ງສູນກາງພັກ ຈັນສີ ໂພສີຄໍາ ໄດ້ໂອ້ລົມຕໍ່ພິທີວ່າ: ການມອບ-ຮັບໜ້າທີ່ຄັ້ງນີ້ແມ່ນປະຕິບັດຕາມການສັບຊ້ອນພະນັກງານນໍາພາຄຸ້ມຄອງຂັ້ນສູນກາງ ແລະ ເປັນການປັບປຸງການຈັດຕັ້ງໃຫ້ຖືກຕ້ອງຕາມຄວາມຮຽກຮ້ອງຕ້ອງການຂອງໜ້າທີ່ການເມືອງໄລຍະໃໝ່, ພ້ອມທັງເນັ້ນໃຫ້ຜູ້ໄດ້ຮັບການແຕ່ງຕັ້ງເປັນເຈົ້າແຂວງຄົນໃໝ່ຈົ່ງຕັ້ງໜ້າປະຕິບັດໜ້າທີ່ວຽກງານທີ່ໄດ້ຮັບມອບໝາຍໃຫ້ມີຜົນສໍາເລັດສູງ.