ລາວ-ໄທເພີ່ມທະວີຮ່ວມມືວຽກງານປ້ອງກັນຄວາມສະຫງົບ
ກອງປະຊຸມຄະນະກຳມະການຮ່ວມລາວ-ໄທວ່າດ້ວຍການຮ່ວມມືວຽກງານປ້ອງກັນຄວາມສະຫງົບຄັ້ງທີ VI ລະຫວ່າງກົມໃຫຍ່ຕຳຫລວດກະຊວງປ້ອງກັນຄວາມສະຫງົບລາວ ແລະ ສຳນັກງານຕຳຫລວດແຫ່ງຣາຊະອານາຈັກໄທ ໄດ້ຈັດຂຶ້ນໃນວັນທີ 15 ສິງຫານີ້ທີ່ນະຄອນຫລວງພະບາງ, ໂດຍການເປັນປະທານຮ່ວມຂອງທ່ານພັນເອກ ຄຳຮຸ່ງ ແສງປະເສີດ ຮອງຫົວໜ້າກົມໃຫຍ່ຕຳຫລວດ ແລະ ພົນເອກ ວິທະຍາ ປຣະຍົງພັນ ທີ່ປຶກສາພິເສດສຳນັກງານຕຳຫລວດແຫ່ງຣາຊະອານາຈັກໄທ, ເພື່ອແນໃສ່ຊຸກຍູ້ສົ່ງເສີມການຮ່ວມມືໃນການປ້ອງກັນ, ສະກັດກັ້ນ, ຕ້ານອາຊະຍາກຳຕ່າງໆທີ່ມີລັກສະນະຂ້າມຊາດລະຫວ່າງສອງປະເທດ.
ທ່ານພັນເອກ ຄຳຮຸ່ງ ແສງປະເສີດ ກ່າວວ່າ: ກອງປະຊຸມຄັ້ງນີ້, ຖືເປັນໂອກາດດີໃຫ້ກຳລັງຕຳຫລວດລາວ-ໄທ ໄດ້ທົບທວນຄືນຜົນຂອງການຈັດຕັ້ງປະຕິບັດບົດບັນທຶກຂອງກອງປະຊຸມຄັ້ງຜ່ານມາ ແລະ ເປັນການແລກປ່ຽນຂໍ້ມູນຂ່າວສານ, ບົດຮຽນ, ປະສົບການທີ່ດີໃນການຮ່ວມມື ແລະ ປະສານງານໃນການສະກັດກັ້ນ ແລະ ຕ້ານອາຊະຍາກຳຕ່າງໆທີ່ສົ່ງຜົນກະທົບທາງກົງ ແລະ ທາງອ້ອມຕໍ່ການພັດທະນາປະເທດ, ຄວາມສະຫງົບສຸກຂອງປະຊາຊົນ ແລະ ຄວາມເປັນລະບຽບຮຽບຮ້ອຍທາງດ້ານສັງຄົມຂອງສອງປະເທດ.
ໃນໂອກາດນີ້, ຝ່າຍລາວໄດ້ລາຍງານສະພາບອາຊະຍາກຳທີ່ເກີດຂຶ້ນໃນໄລຍະຜ່ານມາ ເຊັ່ນ: ຢາເສບຕິດ, ການສໍ້ໂກງຊັບ, ການຄ້າມະນຸດ, ອາຊະຍາກຳທາງດ້ານອິນເຕີເນັດ ແລະ ຄະດີອາຍາຕ່າງໆທີ່ເກີດຂຶ້ນໃນປີ 2017 ມີທັງໝົດ 6.206 ເລື່ອງ, ມ້າງໄດ້ 5.011 ເລື່ອງ, ກັກຜູ້ຕ້ອງຫາໄດ້ 7.157 ຄົນ (ຍິງ 816 ຄົນ), ໃນນັ້ນເດັ່ນກວ່າໝູ່ແມ່ນຄະດີຢາເສບຕິດມ້າງໄດ້ທັງໝົດ 2.770 ເລື່ອງ, ກັກຜູ້ຖືກຫາ 4.241 ຄົນ (ຍິງ 526 ຄົນ), ຄົນຕ່າງປະເທດ 100 ຄົນ (ຍິງ 18 ຄົນ). ຈາກນັ້ນ, ສອງຝ່າຍໄດ້ຮ່ວມລົງນາມບົດບັນທຶກກອງປະຊຸມຄະ ນະກໍາມະການຮ່ວມລາວ-ໄທວ່າດ້ວຍການຮ່ວມມືດ້ານວຽກງານຕຳຫລວດຄັ້ງທີ VI ເຊິ່ງສອງຝ່າຍເຫັນດີເປັນເອກະພາບກັນໃນການຊຸກຍູ້ສົ່ງເສີມການຮ່ວມມືໃນການປ້ອງກັນ, ສະກັດກັ້ນ, ຕ້ານອາຊະຍາກຳຂ້າມຊາດລະຫວ່າງສອງປະເທດ, ໂດຍຈະສືບຕໍ່ແລກປ່ຽນຂໍ້ມູນຂ່າວສານ, ການປ້ອງກັນ ແລະ ປາບປາມການລັກລອບຄ້າຂາຍຢາເສບຕິດ, ສະກັດກັ້ນການລັກລອບເຂົ້າ-ອອກເມືອງຜິດກົດໝາຍ, ຕ້ານການຄ້າມະນຸດ, ການປ້ອງກັນການລັກລອບຄ້າຂາຍສັດປ່າ-ພືດຫວງຫ້າມ ແລະ ຊັບພະຍາກອນທຳມະຊາດທີ່ຜິດກົດໝາຍ, ສະກັດກັ້ນການກໍ່ການຮ້າຍ, ການໂຈລະກຳ, ການສົ່ງຜູ້ຮ້າຍຂ້າມແດນ ແລະ ວຽກງານອື່ນໆ.
