ຄູຝຶກ ຢູ 16 ລາວ ພໍໃຈຜົນງານ ໃນການຊີງແຊ້ມອາຊຽນ
ຄູຝຶກນັກກິລາບານເຕະທີມຊາດ ຢູ16 ລາວ ພໍໃຈຕໍ່ຜົນງານ ຫລັງຈາກເຂົ້າຮ່ວມການແຂ່ງຂັນບານເຕະ ຊີງແຊ້ມອາຊຽນ ຮຸ່ນອາຍຸ 16 ປີ ຫລື AFF U16 CHAMPIONSHIP 2018 ຈັດຂຶ້ນໃນລະຫວ່າງ 29 ກໍລະກົດ ຫາ 11 ສິງຫາ 2018 ທີ່ປະເທດບຣູໄນ.
ທ່ານ ກັນລະຍາ ສີສົມຫວັງ ຄູຝຶກນັກກິລາທີມຊາດລາວ ຢູ 16 ໃຫ້ສໍາພາດວ່າ: ການແຂ່ງຂັນບານເຕະຊາຍຊີງແຊ້ມອາຊຽນ ຮຸ່ນອາຍຸ 16 ປີ ຫລື AFF U16 CHAMPIONSHIP 2018 ມີທີມເຂົ້າຮ່ວມທັງຫມົດ 11 ປະເທດ ແບ່ງອອກເປັນ 2 ກຸ່ມ ຄື: ກຸ່ມ ເອ ປະກອບມີ: ຫວຽດນາມ, ມຽນມາ, ກຳປູເຈຍ, ອິນໂດເນເຊຍ, ຕີມໍ ເລສເຕ ແລະ ຟີລິບປິນ. ສ່ວນກຸ່ມ ບີ ປະກອບມີ: ໄທ, ມາເລເຊຍ, ລາວ, ບຣູໄນ ແລະ ສິງກະໂປ ເຊິ່ງທີມຊາດລາວເຮົາຢູ່ໃນກຸ່ມທີ່ແຂ່ງແກ່ນຫລາຍພໍສົມຄວນ ໂດຍສະເພາະ ທີມຊາດໄທ ແຕ່ພວກເຮົາກໍສາມາດສ້າງຜົນງານໂດດເດັ່ນ ໂດຍເອົາຊະນະໄດ້ 2 ຄັ້ງ, ສະເໝີ 1 ຄັ້ງ, ແຕ່ໜ້າເສຍດາຍ ພວກເຮົາເສຍໃຫ້ ທີມຊາດມາເລເຊຍ ຈຶ່ງເຮັດໃຫ້ຕົກຮອບໃນຮອບແບ່ງກຸ່ມມີພຽງແຕ່ 7 ຄະແນນເທົ່ານັ້ນ ຈຶ່ງເຮັດໃຫ້ຕົກຮອບທັນທີ. ແນວໃດກໍຕາມ ຕົນເອງຮູ້ສຶກພາກພູມໃຈທີ່ສຸດ ແລະ ພໍໃຈຕໍ່ຜົນງານ ເພາະວ່ານັກກິລາຂອງຕົນເອງໄດ້ເຮັດສຸດຄວາມສາມາດແລ້ວ ເຖິງຈະບໍ່ຜ່ານເຂົ້າຮອບ 4 ທີມກໍຕາມ.
ປັດຈຸບັນ ທີມຊາດຢູ 16 ໄດ້ຝຶກຊ້ອມທຸກໆອາທິດ ຢູ່ເດີ່ນສະຫະພັນບານເຕະແຫ່ງຊາດລາວ ບ້ານຫ້ວຍຫົງ ເມືອງ ຈັນທະບູລີ ນະຄອນຫລວງວຽງຈັນ.
