ເອຊີມິລານ ໃຫ້ເງິນກ້ອນໃຫຍ່ ບວກ ບໍຣິນີ ເພື່ອ ຊາວິຊ
ເອຊີ ມິລານ ສະໂມສອນຊັ້ນນຳແຫ່ງ ກັລໂຊ ເຊເຣຍ ອາ ອີຕາລີ ຈະຍື່ນຂໍ້ສະເໜີຂໍຊື້ ເຊີເກ ມິລິນໂຄວິຊ ຊາວິຊ ກອງກາງຄົນເກັ່ງຂອງ ລາຊິໂອ ມາຮ່ວມທີມ ດ້ວຍການໃຫ້ເງິນລວມກັນ 98,5 ລ້ານປອນ ພ້ອມແຖມ ຟາບິໂອ ບໍຣິນີ ໃຫ້ນຳ. ຕາມລາຍງານຂອງ ກັລໂຊແມຄາໂຕ້ ສື່ຂອງອີຕາລີ.
ມິລິນໂຄວິຊ ຊາວິຊ ເຮັດຜົນງານໄດ້ໂດດເດັ່ນກັບ ລາຊິໂອ ໃນລະດູການກ່ອນ ຫລັງຈາກຍິງໄປ 14 ປະຕູຈາກການລົງຫລິ້ນໃນທຸກລາຍການ 47 ນັດ ຈົນເຮັດໃຫ້ລາວເປັນຈຸດສົນໃຈຂອງຫລາຍທີມທົ່ວທະວີບເອີຣົບເຊັ່ນ: ມິລານ, ແມນເຊັສເຕີ ຢູໄນເຕັດ ແລະ ຣີລ ມາດຣິດ ເປັນຕົ້ນ.
ເຖິງວ່າກ່ອນໜ້ານີ້ ເລໂອນາໂດ້ ຜູ້ອຳນວຍການກິລາຂອງທີມຈະອອກມາໃຫ້ສຳພາດໃນທາງຍອມລົ້ມແຜນຄວ້າ ມິລິນໂຄວິຊ ຊາວິຊ ແລ້ວ, ແຕ່ຫລ້າສຸດ ກັລໂຊແມຄາໂຕ້ ລາຍງານວ່າ: ບໍ່ໄດ້ເປັນແບບນັ້ນ ໂດຍ “ຣອສໂຊເນຣີ” ຈະເຮັດຄືໃນກໍລະນີດຶງ ກອນຊາໂລ ອິກວາອິນ ມາຈາກ ຢູເວນຕຸສ ນັ້ນຄືການຢືມລາວມາຮ່ວມທີມ ພ້ອມກັບຈ່າຍເງິນໄປກ່ອນ 35,8 ລ້ານປອນ ແລ້ວຄ່ອຍຈ່າຍເພີ່ມອີກ 63 ລ້ານປອນ ຫລັງຈົບລະດູການ ເພື່ອເຮັດໃຫ້ການຍ້າຍທີມສຳເລັດ.
