ຈີນຈະປະເມີນກົດໝາຍປ້ອງກັນປະເທດ ທີ່ທ່ານ ທຣຳ ຫາກໍລົງນາມ
ກະຊວງການຄ້າຈີນຈະປະເມີນເນື້ອໃນກົດໝາຍປ້ອງກັນປະເທດໃໝ່ຂອງອາເມລິກາຢ່າງລະອຽດ, ພາຍຫລັງປະທານາທິບໍດີ ໂດນັລ ທຣຳ ລົງນາມກົດໝາຍດັ່ງກ່າວທີ່ໃຫ້ອຳນາດຄວບຄຸມການເຮັດສັນຍາຈັດຊື້ຈັດຈ້າງກັບບໍລິສັດເຕັກໂນໂລຊີຈີນ.
ກະຊວງການຄ້າຈີນ ຖະແຫລງຜ່ານເວັບໄຊໃນວັນທີ 14 ສິງຫານີ້ວ່າ: ອາເມລິກາຄວນປະຕິບັດຕໍ່ນັກລົງທຶນຢ່າງເປັນທາງການ ແລະ ເປັນທຳ, ພາຍຫລັງປະທານາທິບໍດີ ທຣຳ ລົງນາມຮ່າງກົດໝາຍທີ່ກອງທັບໃນລັດນິວຢອກ ໃນວັນທີ 13 ສິງຫາ ເປັນກົດໝາຍນະໂຍບາຍປ້ອງກັນປະເທດປະຈຳປີທີ່ອະນຸມັດງົບປະມານ 716.000 ລ້ານໂດລາສະຫະລັດ ສຳລັບໃຊ້ຈ່າຍທາງທະຫານໃນປີງົບປະມານໜ້າ ແລະ ມີມາດຕະການຕໍ່ຕ້ານນະໂຍບາຍລັດຖະບານຈີນຫລາຍຢ່າງ ທັງເລື່ອງທີ່ຈີນເພີ່ມກິດຈະກຳທາງທະຫານໃນທະເລຈີນໃຕ້, ຕ້ອງການຮັບການຖ່າຍທອດເຕັກໂນໂລຊີອາເມລິກາ, ເຜີຍແຜ່ການໂຄສະນາຊວນເຊື່ອຂອງພັກກອມມູນິດຕາມສະຖາບັນໃນອາເມລິກາ, ເພີ່ມການຄວບຄຸມສັນຍາຈັດຊື້ຈັດຈ້າງຂອງລັດຖະບານອາເມລິກາກັບແຊດທີອີຄອບ ແລະ ຮົວເຫວີຍເຕັກໂນໂລຊີ ເຊິ່ງເປັນບໍລິສັດຂອງຈີນ.
ລັດຖະສະພາອາເມລິກາຕັ້ງຊື່ກົດໝາຍນີ້ວ່າ: ກົດໝາຍການໃຫ້ອຳນາດປ້ອງກັນປະເທດແຫ່ງຊາດ ຈອນ ເອສ ແມກ ເຄນ ເພື່ອເປັນກຽດແກ່ທ່ານ ຈອນ ແມກເຄນ ຂອງພັກລີພັບບລິກັນທີ່ເປັນອະດີດທະຫານຜ່ານເສິກ ແລະ ປະທານຄະນະກຳມະການທະຫານໃນວຸດທິສະພາ ເຊິ່ງປັດຈຸບັນນີ້ກຳລັງປິ່ນປົວມະເຮັງ, ແຕ່ປະທານາທິບໍດີ ທຣຳ ເອີ້ນກົດໝາຍນີ້ໂດຍບໍ່ມີຊື່ແມກເຄນແຕ່ຢ່າງໃດ.
