ເບຣຊິນຢຶດໂຄເຄນໄດ້ 1.320 ກິໂລກຣາມ ໃນເຮືອອີຕາລີ
ເຈົ້າໜ້າທີ່ເບຣຊິນ ກ່າວວ່າ: ເຈົ້າໜ້າທີ່ຢຶດໂຄເຄນນ້ຳໜັກ 1.320 ກິໂລກຣາມ ໄດ້ຈາກເຮືອທຸງສັນຊາດອີຕາລີ ທີ່ເມືອງທ່າຊານໂຕສ ທ່າເຮືອສຳຄັນຂອງເບຣຊິນໃກ້ກັບນະຄອນເຊົາເປົາໂລ.
ສຳນັກງານພາສີອາກອນເບຣຊິນ ເປີດເຜີຍວ່າ: ໂຄເຄນບັນຈຸຢູ່ໃນຮູບຂອງຢາເມັດ 1.202 ເມັດໃນ 41 ຫໍ່ ພາຍໃນຕູ້ສິນຄ້າ 2 ຕູ້ເທິງເຮືອກຣານເດ ຟຣານເຊຍ ເຊິ່ງເດີນທາງມາຈາກອາກຊັງຕິນ. ເວັບຂ່າວ G1 ລາຍງານວ່າ: ໂຈນສະລັດໂຈມຕີເຮືອດັ່ງກ່າວໃນວັນທີ 12 ສິງຫາ. ເຖິງຢ່າງໃດກໍຕາມ ຍັງບໍ່ແນ່ນອນວ່າເຫດການຄັ້ງນີ້ກ່ຽວຂ້ອງກັບການພົບຢາເສບຕິດເທິງເຮືອ ຫລື ບໍ່. ພາສີອາກອນເບຣຊິນເປີດເຜີຍວ່າ: ໃນປີນີ້ເຈົ້າໜ້າທີ່ກວດຢຶດຢາເສບຕິດໄດ້ 13.518 ກິໂລກຣາມ ໃນປະຕິບັດການກວດຄົ້ນ 27 ຄັ້ງທີ່ເມືອງທ່າຊານໂຕສ ເຊິ່ງເປັນທ່າເຮືອໃຫຍ່ທີ່ສຸດໃນອາເມລິກາລາຕິນ ເຊິ່ງຖືວ່າຢາເສບຕິດທີ່ຢຶດໄດ້ຜ່ານມາມີຫລາຍກວ່າຍອດລວມທັງໝົດທີ່ຢຶດໄດ້ໃນປີ 2017.
