ຊົມເຊີຍ 68 ປີສື່ມວນຊົນລາວ
ໂດຍ: ຊາຍພະເນຈອນ.
ວຽກງານສື່ມວນຊົນແມ່ນວຽກງານໜຶ່ງທີ່ສໍາຄັນໃນການໂຄສະນາເຜີຍແຜ່ຂໍ້ມູນຂ່າວສານໃຫ້ແກ່ສັງຄົມ ເຊິ່ງໃນນັ້ນປະກອບມີ ສື່ສິ່ງພິມ ສະຖານີວິທະຍຸກະຈາຍສຽງ, ສະຖານີໂທລະພາບ ທີ່ໄດ້ກະຈາຍ ແລະ ອອກອາກາດທົ່ວພາກພື້ນຂອງປະເທດເຊິ່ງເຮັດໃຫ້ປະຊາຊົນທີ່ຢູ່ທັງໃນຕົວເມືອງ ແລະ ເຂດຫ່າງໄກສອກຫຼີກກໍສາມາດໄດ້ເບິ່ງ ໄດ້ຟັງ, ໄດ້ອ່ານຂ່າວສານ ແລະ ສາລະ ຕ່າງໆຢ່າງສະດວກສະບາຍ.
ຕະຫຼອດໄລຍະ 68 ປີຜ່ານມາ ສື່ມວນຊົນເຮົາ ໄດ້ຜ່ານຜ່ານາໆອຸປະສັກ ຄວາມຫຍຸ້ງຍາກ ແລະ ສິ່ງທ້າທາຍຕ່າງໆໃນການເຄື່ອນໄຫວວຽກງານຂອງຕົນ ໂດຍສະເພາະແມ່ນໃນສະໄໝ ແຫ່ງການຕໍ່ສູ້ກູ້ຊາດ ເຄື່ອງມືອຸປະກອນຫຼ້າຫຼັງ, ສົ່ງຂ່າວຫາກັນດ້ວຍຈົດໝາຍ ,ພະນັກງານນັກຂ່າວຜູ້ເຮັດວຽກສື່ມີຈໍາກັດແຕ່ໜ້າວຽກພັດຫຼາຍ. ມາຮອດໄລຍະໜຶ່ງຈຶ່ງໄດ້ມີພິມດີດເຂົ້າມາຊ່ວຍ,ໃນໄລຍະນັ້ນທົ່ວປະເທດມີວິທະຍຸກະຈາຍສຽງພຽງສອງແຫ່ງເຊັ່ນ: ຝ່າຍວຽງຈັນມີວິທະຍຸແຫ່ງຊາດ ແລະ ຢູ່ເຂດປົດປ່ອຍກໍມີວິທະຍຸກະຈາຍສຽງຂອງແນວລາວຮັກຊາດເຊິ່ງແຕ່ລະມື້ແຕ່ລະວັນສື່ຂອງແຕ່ລະຝ່າຍກໍຈະມີການອອກຂ່າວຄາວ ແລະ ເວົ້າສຽດສີກັນໄປແບບຕ່າງໆນາໆເອີ້ນວ່າການຕໍ່ສູ້ທາງສື່, ແຕ່ຍ້ອນວ່າສື່ຂອງຝ່າຍແນວລາວຮັກຊາດແມ່ນໄດ້ຮັບໃຊ້ພັກ-ລັດ , ຮັບໃຊ້ ປະຊາຊົນ ແລະ ປະເທດຊາດ ຈຶ່ງເຮັດໃຫ້ສື່ຝ່າຍແນວລາວຮັກຊາດຂອງພວກເຮົາຍືນຍົງຄົງຕົວ, ສ່ວນສື່ຂອງຝ່າຍວຽງຈັນຖືກຍຸບ. ພາຍຫຼັງປະເທດຊາດໄດ້ຮັບການປົດປ່ອຍປີ 1975, ຈຶ່ງເຮັດໃຫ້ສື່ຂອງພວກເຮົາເລີ່ມມີໃບໜ້າໃໝ່ໃນການພັດທະນາຕົນເອງ ໂດຍໄດ້ຮັບການຊ່ວຍເຫຼືອຈາກປະເທດເພື່ອນມິດເຊັ່ນ:ສສ.ຫວຽດນາມ ແລະ ອະດີດສະຫະພາບໂຊວຽດ ຈົນຮອດເທົ່າທຸກວັນນີ້ຈຶ່ງເຮັດໃຫ້ວຽກງານສື່ມວນຊົນຂອງພວກເຮົາໄດ້ເຕີບໃຫຍ່ຂະຫຍາຍຕົວ ແລະ ມີຜົນງານພົ້ນເດັ່ນຫຼາຍດ້ານ, ໃນການເຄື່ອນໄຫວໂຄສະນາເຜີຍແຜ່ແນວທາງນະໂຍບາຍຂອງພັກ ແລະ ວຽກງານການພັດທະນາເສດຖະກິດ, ວັດທະນະທໍາ-ສັງຄົມໄດ້ຢ່າງກວ້າງໄກ, ວ່ອງໄວ ແລະ ທັນເຫດການ ນັບແຕ່ຂັ້ນສູນກາງລົງຮອດທ້ອງຖິ່ນ ແລະ ແຕ່ພາຍໃນອອກສູ່ສາກົນດ້ວຍເຄື່ອງມື ແລະ ອຸປະກອນທີ່ທັນສະໄໝພໍສົມຄວນ ນີ້ກໍເນື່ອງຈາກ ພັກ-ລັດຖະບານເພິ່ນກໍເຫັນໄດ້ຄວາມສໍາຄັນວຽກງານສື່ ແລະ ໄດ້ເອົາໃຈໃສ່ທຸ້ມເທທຶນຮອນທັງເຮື່ອແຮງ ແລະ ສະຕິປັນຍາເຂົ້າໃນວຽກງານດັ່ງກ່າວເຊິ່ງປະກອບມີບຸກຄະລາກອນທີ່ໜຸ່ມນ້ອຍ ທີ່ພຽງພ້ອມດ້ວຍລະດັບຄວາມຮູ້ຄວາມສາມາດທີ່ແນ່ນອນມີຫົວຄິດປະດິດສ້າງ ແລະ ມີຄວາມຮັບຜິດຊອບຕໍ່ໜ້າທີ່ວິຊາສະເພາະຂອງຕົນເປັນຢ່າງດີ.
ແຕ່ມາໃນຍຸກໂລກາພິວັດ ສໍາລັບວຽກງານສື່ຂອງພວກເຮົາ ເຫັນວ່າຍັງບໍ່ທັນຕອບສະໜອງໄດ້ຕາມຄວາມຮຽກຮ້ອງຕ້ອງການ, ເພື່ອບັນລຸຍຸດທະສາດໃນການສືບຕໍ່ສ້າງສື່ມວນຊົນລາວໃຫ້ເປັນກະບອກສຽງອັນແຫຼມຄົມຂອງພັກ ແລະລັດຢ່າງເລິກເຊິ່ງ, ກວ້າງໄກ, ຄົມຊັດ, ມີຫຼາກຫຼາຍສີສັນ ແລະ ອຸດົມສົມບູນທາງດ້ານເນື້ອໃນຂໍ້ມູນຂ່າວສານຕ່າງໆເຊິ່ງພວກເຮົາຈະຕ້ອງໄດ້ປັບປຸງຕົນເອງຫຼາຍຂຶ້ນໂດຍສະເພາະ ລາຍການໂທລະພາບ ແລະ ວິທະຍຸແບບໃໝ່ໃຫ້ຫຼາກຫຼາຍ ແລະ ອຸດົມສົມບູນໄປດ້ວຍ ພ້ອມທັງຂະຫຍາຍ ສື່ທາງໂທລະພາບ, ວິທະຍຸ, ເນື້ອຫາສະລະ ແລະ ຂໍ້ມູນຂ່າວສານຕ່າງໆໃຫ້ໄດ້ມາດຕະຖານສາກົນ, ບັນຈຸນັກຂ່າວ ແລະ ໂຄສົກໃຫ້ຫຼາຍຂຶ້ນພ້ອມທັງຍົກລະດັບວິຊາສະເພາະໃຫ້ເຂົາເຈົ້າເພື່ອຕອບສະໜອງຕາມຄວາມຮຽກຮ້ອງຕ້ອງການຂອງວຽກງານ, ສ້າງເຄືອຄ່າຍສື່ມວນຊົນ, ພັດທະນາລາຍການໂທລະພາບໃຫ້ມີຫຼາຍສີສັນເພື່ອດຶງດູດຄວາມສົນໃຈຂອງມວນຊົນທັງພາຍໃນ ແລະ ຕ່າງປະເທດໃຫ້ຫຼາຍຂຶ້ນ, ເປີດກວ້າງຕະຫຼາດສື່ມວນຊົນລາວໃຫ້ກວ້າງຂວາງດ້ວຍການພັດທະນາຜະລິດຕະພັນສື່ຂອງຕົນໃຫ້ມີຄວາມຫຼາກຫຼາຍ ແລະ ທັນສະໄໝຂຶ້ນກວ່າເກົ່າ, ເພີ່ມທະວີການຊອກແຫຼ່ງລາຍຮັບດ້ວຍການນໍາໃຊ້ທ່າແຮງທີ່ມີໃຫ້ນັບມື້ຫຼາຍຂຶ້ນ, ສ້າງເຄືອຄ່າຍປະສານງານເພື່ອເຊື່ອມໂຍງເຂົ້າເຖິງພາກພື້ນ ແລະ ໃນໂລກໄດ້ເທື່ອລະກ້າວ.
