ການຄົ້ນຫາຜູ້ສູນຫາຍ ແລະ ເສຍຊີວິດຈາກເຫດນໍ້າຖ້ວມຢູ່ເມືອງສະໜາມໄຊຍັງພົບຄວາມລໍາບາກ

ຄະນະພາກສະໜາມຟື້ນຟູ ແລະ ແກ້ໄຂໄພພິບັດນໍ້າຖ້ວມຢູ່ເມືອງສະໜາມໄຊແຂວງອັດຕະປື ລາຍງານໃຫ້ຮູ້ໃນວັນທີ 13 ສິງຫານີ້ວ່າ: ພາລະກິດການຊອກຄົ້ນຫາຜູ້ສູນຫາຍ ແລະ ເສຍຊີວິດຈາກເຫດການນໍ້າຖ້ວມຄັ້ງນີ້ຍັງພົບຄວາມຫຍຸ້ງຍາກລໍາບາກຫລາຍ, ເນື່ອງຈາກເຂດພື້ນທີ່ເປົ້າໝາຍທີ່ຍາດພີ່ນ້ອງຜູ້ສູນຫາຍໄດ້ແຈ້ງແມ່ນມີຂີ້ຕົມລະດັບສູງ, ເສດສາກຕົ້ນໄມ້, ກິ່ງໄມ້ ແລະ ເຕັມໄປດ້ວຍແກ້ວ, ເຫລັກຕາປູ ແລະ ບວກກັບສະພາບອາກາດບໍ່ໍອໍານວຍ,​ໂດຍສະເພາະມີຝົນຕົກມາເປັນໄລຍະ, ອັນໄດ້ເຮັດໃຫ້ການຄົ້ນຫາພົບຄວາມຫຍຸ້ງຍາກ ແລະ ຊັກຊ້າ, ນອກນີ້, ເຄື່ອງມືຊ່ວຍຄົ້ນຫາທີ່ທັນສະໄໝນໍາມາຈາກຕ່າງປະເທດກໍບໍ່ສາມາດນໍ້າໃຊ້ໄດ້ໃນສະພາບທີ່ມີຂີ້ຕົມ ແລະ ໃນນໍ້າທີ່ຂຸ້ນ, ຈຶ່ງໃຊ້ວີທີເອົາກໍາລັງຄົນງົມທາວຫາໄປເປັນໜ້າກະດານຕາມຈຸດເປົ້າໝາຍ ແລະ ມາຮອດປັດຈຸບັນ, ສາມາດພົບເຫັນຜູ້ເສຍຊີວິດແລ້ວ 39 ສົບ, ໃນນີ້ເກັບກູ້ຢູ່ພາກສະໜາມ 34 ສົບ ແລະ ເສຍຊີວິດຢູ່ໂຮງໝໍແຂວງ-ເມືອງ 5 ສົບຍ້ອນໄດ້ຮັບກະທົບໜັກຈາກໄພພິບັດ.

ຄະນະດັ່ງກ່າວ ໃຫ້ຮູ້ວ່າ: ສໍາລັບການກໍ່ສ້າງເຮືອນພັກຊົ່ວຄາວຢູ່ໂຮງຮຽນປະຖົມບ້ານຫາດຍາວຈໍານວນ 140 ຫ້ອງແມ່ນມຄວາມຄືບໜ້າຫລາຍກວ່າ 45% ແລະ ຄາດວ່າຈະສໍາເລັດຕາມແຜນການວາງໄວ້ພາຍໃນ 60 ມື້. ສ່ວນການສ້າງເຮືອນພັກຊົ່ວຄາວຢູ່ຈຸດຄຸ້ມດອນບົກແມ່ນໄດ້ມີການຖາກຖາງອະນາໄມ ແລະ ບຸກເບີກພື້ນທີ່, ພ້ອມທັງໄດ້ກວດກູ້ລະເບີດບໍ່ທັນແຕກຢູ່ພື້ນທີ່ດັ່ງກ່າວຫລາຍກວ່າ 10.000 ຕາແມັດ. ສໍາລັບແຜນວຽກເລັ່ງດ່ວນໃນຕໍ່ໜ້ານີ້, ແມ່ນຈະສຸມໃສ່ການຊອກຄົ້ນຜູ້ຫາຍສາບສູນ ແລະ ເສຍຊີວິດໃຫ້ເຫັນໂດຍໄວ, ເລັ່ງສ້ອມແປງບ່ອນພັກຊົ່ວຄາວໃຫ້ສໍາເລັດ, ອອກບັດໃຫ້ຜູ້ປະສົບໄພໃຫ້ສໍາເລັດ, ພ້ອມທັງແຈກຢາຍເງິນແຮເບື້ອງຕົ້ນຄອບຄົວລະ 5 ແສນກີບໃຫ້ຄົບຖ້ວນ, ລວມທັງຈາກຢາຍເຄື່ອງຊ່ວຍເຫລືອ ເປັນຕົ້ນເຂົ້າສານ, ອາຫານແຫ້ງ ແລະ ເຄື່ອງໃຊ້ຕ່າງໆໃຫ້ປະຊາຊົນຜູ້ໄດ້ຮັບຜົນກະທົບຢ່າງທົ່ວເຖິງ.