20 ວັນ ພົບສົບຜູ້ເສຍຊີວິດຈາກເຫດນ້ຳຖ້ວມເມືອງສະໜາມໄຊແລ້ວ 38 ສົບ
ຄະນະພາກສະໜາມຟື້ນຟູ ແລະ ແກ້ໄຂໄພພິບັດຈາກເຫດນ້ຳຖ້ວມເມືອງສະໜາມໄຊ ແຂວງອັດຕະປື ລາຍງານໃຫ້ຮູ້ໃນຕອນແລງວັນທີ 12 ສິງຫານີ້ວ່າ: ຜ່ານໄປ 20 ວັນຂອງພາລະກິດຄົ້ນຫາຜູ້ສູນຫາຍ ແລະ ເສຍຊີວິດຈາກເຫດການດັ່ງກ່າວພົບແລ້ວ 38 ສົບ (ຍິງ 17 ສົບ) ໃນນີ້ເກັບກູ້ຢູ່ພາກສະໜາມ 33 ສົບ (ຍິງ 16), ເດັກນ້ອຍ 13 ສົບ (ຍິງ 6 ສົບ) ແລະ ໃນວັນທີ 12 ສິງຫານີ້ ມີຜູ້ເສຍຊີວິດຢູ່ໂຮງໝໍແຂວງ 1 ຄົນ ເປັນເພດຍິງ ຍ້ອນໄດ້ຮັບຜົນກະທົບໜັກຈາກໄພພິບັດດັ່ງກ່າວ. ມາຮອດປັດຈຸບັນຕົວເລກຜູ້ໄດ້ຮັບຜົນກະທົບແມ່ນມີ 13 ບ້ານ, 2.717 ຄອບຄົວ, 13.067 ຄົນ. ສະເພາະ 6 ບ້ານທີ່ເສຍຫາຍ 100% ມີ 1.611 ຄອບຄົວ, ມີຜູ້ໄດ້ຮັບຜົນກະທົບ 7.095 ຄົນ ໂດຍຄະນະສະເພາະກິດໄດ້ຈັດສັນໄປຢູ່ບ່ອນພັກຊົ່ວຄາວຄື: ຈຸດເທສະບານເມືອງສະໜາມໄຊມີ 725 ຄອບຄົວ, ມີ 3.435 ຄົນ, ບ້ານຕະມໍຢອດມີ 138 ຄອບຄົວ, ມີ 915 ຄົນ, ຄຸ້ມດອນບົກມີ 97 ຄອບຄົວ, ມີ 414 ຄົນ ແລະ ຈຸດບ້ານປິນດົງມີ 73 ຄອບຄົວ, ມີ 277 ຄົນ. ສ່ວນຄວາມຄືບໜ້າໃນວຽກງານອື່ນໆແມ່ນສຳເລັດການຕິດຕັ້ງໄຟຟ້າເຂົ້າໃສ່ເຕັ້ນພັກຜູ້ປະສົບໄພ 400 ກວ່າຫລັງ, ຕິດຕັ້ງຈັກໄຟຟ້າ 5 kw ເຂົ້າໃສ່ສຸກສາລາບ້ານຕະມໍຢອດ ແລະ ໂຮງໝໍເມືອງສະໜາມໄຊ 1 ເຄື່ອງ ເພື່ອສະໜອງກະແສໄຟໃຫ້ພຽງພໍ, ສ່ວນການປຸກສ້າງເຮືອນພັກຊົ່ວຄາວຈຳນວນ 140 ຫ້ອງແມ່ນກຳລັງສຸມໃສ່ຈັດຕັ້ງປະຕິບັດຢ່າງຮີບດ່ວນເພື່ອໃຫ້ສຳເລັດຕາມແຜນການພາຍໃນ 60 ມື້, ພ້ອມທັງສືບຕໍ່ຊອກຄົ້ນຜູ້ຫາຍສາບສູນ ແລະ ເສຍຊີວິດ, ອອກບັດ ແລະ ແຈກຢາຍເງິນແຮເບື້ອງຕົ້ນ 5 ແສນກີບຕໍ່ຄອບຄົວໃຫ້ສຳເລັດ.
