ບ້ານແຫ່ງໜຶ່ງຢູ່ອິນເດຍຫ້າມຜູ້ຍິງໃຊ້ໂທລະສັບມືຖື

     ນິວ​ເດ​ລີ 3 ພຶດສະພາ: ຕຳຫລວດ​ອິນ​ເດຍ​ເປີດ​ເຜີຍ​ວ່າ: ມີ​ບ້ານ​ຂອງ​ຊາວ​ມຸດ​ສະລິ​ມ​ແຫ່ງ​ໜຶ່ງ​ຢູ່​ລັດ​ອຸດ​ຕໍ​ປະ​ເທດ​ທາງ​ຕອນ​ເໜືອ​ຂອງ​ປະ​ເທດ ອອກ​ກົດ​ຫ້າມ​ບໍ່​ໃຫ້​ຜູ້ຍິງ​ໃຊ້​ໂທລະສັບ​ມື​ຖື​ໃນ​ບ່ອນ​ສາທາລະນະ ​ເພື່ອ​ປ້ອງ​ກັນ​ບໍ່​ໃຫ້​ລັກລອບ​ຕິດ​ຕໍ່​ກັບ​ຜູ້​ຊາຍ, ຜູ້​ຝ່າຝືນ​ຈະ​ຖືກ​ປັບ​ໄໝ​ເປັນ​ເງິນ 21.000 ຣູປີ.

ບ້ານ​ແຫ່ງ​ນີ້​ມີ​ຊື່ວ່າ: ມາ​ໂດຣາ ​ເຊິ່ງສະພາ​ຜູ້​ອາວຸ​ໂສ​ອອກ​ກົດໝາຍ​ພາຍ​ໃນ​ບ້ານ​ຫ້າມ​ຜູ້ຍິງ​ໃຊ້​ໂທລະສັບ​ມື​ຖື​ນອກ​ທີ່​ພັກ​ອາ​ໄສ ​ໂດຍ​ຜູ້​ຝ່າຝືນ​ຈະ​ຖືກ​ປັບ​ໄໝ 21.000 ຣູປີ ​ເຊິ່ງຖື​ວ່າ​ເປັນ​ເງິນ​ຈຳນວນ​ຫລາຍ ​ໂດຍ​ສະ​ເພາະ​ສຳລັບ​ຜູ້​ທີ່​ອາ​ໄສ​ຢູ່​ເຂດ​ຊົນນະບົດ. ກົດ​ດັ່ງກ່າວ​ມີ​ຈຸດປະສົງ​ເພື່ອ​ປ້ອງ​ກັນ​ບໍ່​ໃຫ້​ຜູ້ຍິງ​ທີ່​ຍັງ​ບໍ່​ໄດ້​ແຕ່ງດອງ​ໃຊ້​ມື​ຖື​ເປັນ​ເຄື່ອງມື​ໃນ​ການ​ຕິດ​ຕໍ່​ສື່ສານ ​ແລະ ໜີ​ຕາມ​ຜູ້​ຊາຍ​ໄປ.

​ເຖິງ​ຢ່າງ​ໃດ​ກໍ​ດີ, ຕຳຫລວດ​ທ້ອງ​ຖິ່ນ​ກ່າວ​ວ່າ: ຄຳ​ສັ່ງ​ດັ່ງກ່າວ​ຂັດ​ແຍ່ງ​ກັບ​ລັດຖະທຳ​ມະນູນ ​ແລະ ຈະ​ຕ້ອງ​ມີ​ການ​ດຳ​ເນີນ​ການ ​ເພາະ​ຖື​ເປັນ​ການ​ຈຳກັດ​ສິດທິ​ເສລີພາບ​ຂອງ​ແມ່ຍິງ.