ຊຳຊຸງກຽມປິດໂຮງງານຜະລິດມືຖືໃນຈີນ
ຊຳຊຸງ ເອເລັກໂຕຣນິກ ຈຳກັດ ເປີດເຜີຍວ່າ: ກຳລັງພິຈາລະນາຢຸດການຜະລິດມືຖືທີ່ໂຮງງານແຫ່ງໜຶ່ງໃນຈີນ ຫລັງຈາກຍອດຂາຍມືຖືຫລຸດລົງຫລາຍໄຕມາດຕິດຕໍ່ກັນ ບວກກັບບໍລິສັດກຳລັງຜະເຊີນບັນຫາຕົ້ນທຶນແຮງງານສູງ.
ສຳນັກຂ່າວຣອຍເຕີ ລາຍງານວ່າ: ຊຳຊຸງ ອາດຈະຢຸດການຜະລິດມືຖືທີ່ໂຮງານທຽນຈິນ ຊຳຊຸງ ເທເລຄອມ ເຕັກໂນໂລຊີ ໃນປີນີ້ ໂດຍແຮງງານແຫ່ງນີ້ຕັ້ງຢູ່ທາງຕອນເໜືອຂອງເມືອງທຽນຈິນ ໂດຍປັດຈຸບັນນີ້ ຕະຫລາດໂທລະສັບມືຖືຢູ່ໃນໄລຍະຂາລົງ ເນື່ອງຈາກຍອດຂາຍຫລຸດລົງ ແລະ ຊຳຊຸງຕ້ອງການຫັນໄປເນັ້ນກິດຈະກຳທາງທຸລະກິດທີ່ຊ່ວຍເສີມສ້າງຄວາມສາມາດດ້ານການແຂ່ງຂັນ ແລະ ເພີ່ມປະສິດທິພາບໃຫ້ບໍລິສັດ.
ໄລຍະຫລາຍປີຜ່ານມາ, ຊຳຊຸງທຸ້ມເທເງິນລົງທຶນດ້ານໂທລະສັບມືຖື ເພື່ອເພີ່ມກຳລັງການຜະລິດທີ່ໂຮງງານໃນຫວຽດນາມ ແລະ ອິນເດຍ. ຫລ້າສຸດ ໃນເດືອນຜ່ານມາ, ບໍລິສັດຫາກໍເປີດໂຮງງານຜະລິດສະມາດໂຟນຂະໜາດໃຫຍ່ສຸດໃນໂລກນະຄອນຫລວງນິວເດລີ ປະເທດອິນເດຍ ໂດຍມີເປົ້າໝາຍໃຫ້ອິນເດຍເປັນສູນກາງດ້ານການສົ່ງອອກຜະລິດຕະພັນຂອງບໍລິສັດ.
