ເວລາວ່າງຄົນປະສົບຄວາມສຳເລັດພາກັນເຮັດຫຍັງ ?
- ຜ່ອນຄາຍຄວາມອິດເມື່ອຍ ແລະ ວາງແຜນວຽກ : “ບາງເທື່ອເຮົາກໍຫຍຸ້ງວຽກຈົນລືມຄິດເຖິງສາເຫດທີ່ເຮັດໃຫ້ເຮົາເລີ່ມກໍ່ຕັ້ງບໍລິສັດ ຫລື ມາເຮັດວຽກດ້ານນີ້,ການໄດ້ຢູ່ໃນພື້ນທີ່ສີຂາວ ຫລື ສະຖານທີ່ມິດງຽບ ເຮັດໃຫ້ເຮົາສາມາດຍ້ອນກັບໄປທົບທວນເຖິງສາເຫດເບື້ອງເລິກໃນໃຈນັ້ນ ແລະ ກັບມາເຮັດວຽກຢ່າງມີເປົ້າໝາຍໄດ້ອີກເທື່ອໜຶ່ງ” ເອຄາເທຣີນາ ວໍເຕີ (Ekaterina Walter) ຜູ້ຂຽນໜັງສື The Power of Visual Storytelling ກ່າວ.
ໃນເວລາວ່າງຈາກການເຮັດວຽກໃຫ້ທ່ານລອງນັ່ງພັກໃຫ້ສະບາຍ, ຜ່ອນຄາຍຕົນເອງ ແລະ ຄິດທົບທວນເປົ້າໝາຍຂອງທ່ານ, ປະເມີນສິ່ງທ່ີທ່ານໄດ້ເຮັດໄປແລ້ວ, ວາງແຜນ ແລະ ຄິດຫາແນວທາງໃນການປັບປຸງຂະບວນການເຮັດວຽກໃນປະຈຸບັນ ເຊິ່ງການໃຊ້ເວລາວ່າງມາວາງແຜນ ແລະ ທົບທວນເປົ້າໝາຍວຽກອີກເທື່ອໜຶ່ງຈະສາມາດຊ່ວຍທ່ານໄດ້ເມື່ອ ຕ້ອງພະເຊີນກັບການເຮັດວຽກອັນໜັກໜ່ວງໃນອະນາຄົດ.
“ທຸກສິ່ງທີ່ຈຳເປັນຕໍ່ທ່ານມີພຽງແຕ່ແຜນການ, ເສັ້ນທາງ ແລະຄວາມກ້າທີ່ຈະຍຶດໝັ້ນໃນຈຸດໝາຍເທົ່ານັ້ນ” – ເອີດ ໄນຕິງເກລ (Earl Nightingale) ກ່າວ.
- ກະຕຸ້ນຄວາມຄິດສ້າງສັນ ແລະ ສຳຫລວດຄວາມສົນໃຈອື່ນໆ : ຄວາມຄິດສ້າງສັນເປັນສິ່ງທີ່ມະນຸດທຸກຄົນມີ ດັ່ງນັ້ນ ຢ່າລັງເລທີ່ຈະຄົ້ນຫາຄວາມຄິດສ້າງສັນໃນໂຕທ່ານ ເຖິງວ່າທ່ານຈະກຳລັງເຮັດວຽກໃນອຸດສາຫະກຳທີ່ຕ້ອງໃຊ້ຄວາມຄິດສ້າງສັນຢູ່ແລ້ວ ແຕ່ທ່ານກໍຍັງສາມາດລອງເຮັດກິດຈະກຳອື່ນໆທີ່ທ່ານບໍ່ເຄີຍເຮັດມາກ່ອນໄດ້ສະເໝີ.
“ສະໝອງຂອງເຮົາຈະມີໜ້າທີ່ຄິດວິເຄາະ ແລະ ຫາວິທີແກ້ໄຂບັນຫາຕ່າງໆ ໂດຍສະເພາະຕອນທີ່ຕ້ອງເຮັດວຽກສຳຄັນໆ, ແຕ່ໃນເວລາວ່າງແມ່ນຊ່ວງທີ່ຄວາມຄິດສ້າງສັນຂອງເຮົາຈະສະແດງສັກກະຍະພາບອອກມາ ແລະ ບາງເທື່ອມັນກໍເຮັດໃຫ້ເຮົາປະເມີນໄດ້ວ່າຈະກ້າວຕໍ່ໄປໃຫ້ໄປເຖິງຈຸດມຸ່ງໝາຍໄດ້ແນວໃດ ”ອາວີ ໂລເປສ (Arvi Lopez) ກ່າວ.
- ອ່ານໜັງສື : ການຮຽນຮູ້ເປັນຂະບວນການທີ່ເກີດຂຶ້ນຢ່າງຕໍ່ເນື່ອງຕະຫລອດຊີວິດ ແລະການອ່ານກໍເປັນສິ່ງທີ່ຊ່ວຍເປີດໂລກກະທັດຂອງທ່ານສູ່ຄວາມຄິດໃໝ່ໆທີ່ນຳທາງໄປສູ່ການເປັນຜູ້ປະກອບທຸລະກິດທີ່ມີຄຸນນະພາບໄດ້. ທຸກຄົນຮູ້ດີວ່າການຮຽນຮູ້ນັ້ນສຳຄັນຫລາຍຕໍ່ການບໍລິຫານທຸລະກິດ ໜັງສືຈຶ່ງເປັນດັ່ງຄົນທີ່ຄອຍຊ່ວຍໃຫ້ຄຳປຶກສາ ໃຫ້ເຮົາໄດ້ຮັບຮູ້ຂໍ້ມູນຫລວງຫລາຍ ລວມໄປເຖິງປະສົບການໂດຍກົງຈາກບຸກຄົນໂຕຢ່າງຂອງເຮົານຳ ທ່ານລອງອ່ານໜັງສືກ່ຽວກັບບຸກຄົນທີ່ໜ້າສົນໃຈຂອງໂລກ ຫລື ໜັງສືທີ່ກະຕຸ້ນຄວາມຄິດຜູ້ອ່ານ ແມ່ນແຕ່ນະວະນິຍາຍໂຣແມນຕິກກໍສາມາດເຮັດໃຫ້ທ່ານເກີດການຮຽນຮູ້ໄດ້ຄືກັນ.
“ການອ່ານໂດຍປາສະຈາກການພິຈາລະນາ ກໍປຽບດັ່ງການກິນອາຫານໂດຍບໍ່ຍ່ອຍ” ເອັດມັນ ເບີກ (Edmund Burke) ກ່າວ.
- ເຮັດວຽກທີ່ຈຳເປັນແຕ່ບໍ່ຮີບດ່ວນ : ແຮງກົດດັນຈາກວຽກປະຈຳວັນເຮັດໃຫ້ເຮົາຕ້ອງຈັດລຳດັບຄວາມສຳຄັນໃຫ້ວຽກດ່ວນກ່ອນສະເໝີ ຈົນເຮົາບໍ່ມີເວລາເຮັດວຽກທີ່ຈຳເປັນ, ແຕ່ບໍ່ເຖິງຂັ້ນຮີບດ່ວນ ເຊັ່ນ : ການທົດລອງກົນລະຍຸດໃໝ່ໆ, ການເຮັດຄວາມສະອາດ ແລະ ຈັດລະບຽບແຟ້ມຂໍ້ມູນ ແລະ ການຄິດຄົ້ນວິທີໃໝ່ໆໃນການເຮັດວຽກ ເປັນຕົ້ນ.
ມື້ນີ້ລອງຖາມໂຕເອງເບິ່ງວ່າອັນໃດທີ່ສຳຄັນ ແລະ ມີປະໂຫຍດກັບທຸລະກິດຂອງທ່ານ, ແຕ່ຊຳ້ພັດບໍ່ມີໂອກາດໄດ້ເຮັດມັນຈັກເທື່ອ ຈົ່ງໃຊ້ເວລາວ່າງໃນການເຮັດສິ່ງເຫລົ່ານີ້ ເພື່ອໃຫ້ທ່ານພູມໃຈໃນໂຕເອງທີ່ໄດ້ໃຊ້ເວລາວ່າງຢ່າງກຸ້ມຄ່າ.
