ປສກ ຕົກລົງສ້າງໂຮງງານຜະລິດອຸປະກອນສະກັດກັ້ນ ແລະ ຕ້ານອັກຄີໄພ

ກົມໃຫຍ່ພາລາທິການ ກະຊວງ ປ້ອງກັນຄວາມສະຫງົບ ໄດ້ຕົກລົງ ຮ່ວມກັບ ບໍລິສັດ ອີຈິນ ວິສະວະກໍາກໍ່ສ້າງລາວ ສ້າງຕັ້ງໂຮງງານຜະລິດອຸປະກອນສະກັດກັ້ນ ແລະ ຕ້ານອັກຄີໄພທຸກຊະນິດ, ຊຶ່ງພິທິລົງນາມຮ່ວມທຸລະກິດດັ່ງກ່າວໄດ້ມີຂຶ້ນໃນວັນທີ 8 ສິງຫາ ນີ້ທີ່ນະຄອນຫຼວງວຽງຈັນ ລະຫວ່າງທ່ານ ພົນຈັດຕະວາ ຄໍາໄຕ ຄໍາແພງເພັດ ຫົວໜ້າກົມໃຫຍ່ພະລາທິການ ແລະ ທ່ານ ເຈີ້ງ ເຈີ່ນຢົ່ງ ອໍານວຍການ ບໍລິສັດ ອີຈິນ ວິສະວະກໍາກໍ່ສ້າງລາວ, ມີ ທ່ານ ພົຕ ສິນທະວົງ ໄຊຍະກອນ ຮອງລັດຖະມົນຕີກະຊວງ ປກສ ເຂົ້າຮ່ວມເປັນສັກຂີພະຍານ.

ການສ້າງຕັ້ງໂຮງງານກໍເພື່ອເປັນການປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດ ໃຫ້ເຕີບໃຫຍ່ເຂັ້ມແຂງຂຶ້ນເທື່ອລະກ້າວ ແລະ ເພື່ອເຮັດໃຫ້ກຳລັງປ້ອງກັນຄວາມສະຫງົບ ມີຄວາມອາດສາມາດໃນການຜະລິດ-ທຸລະກິດ ເຂັ້ມແຂງດີຂຶ້ນ, ໂດຍການ ຮ່ວມລົງທຶນ ກັບນັກທຸລະກິດ (ສປຈີນ), ໃນມູນຄ່າ 20 ລ້ານໂດລາສະຫະລັດ, ໃນໄລຍະເວລາ 30 ປີ ແລະ ໃນນັ້ນຝ່າຍກະຊວງປ້ອງກັນຄວາມສະຫງົບ ຖືຮຸ້ນ 20%, ບໍລິສັດ ຖືຮຸ້ນ 80%, ເພື່ອຜະລິດ-ຈໍາໜ່າຍອຸປະກອນສະກັດກັ້ນ ແລະ ຕ້ານອັກຕີໄພທຸກຊະນິດ ເພື່ອນໍາໃຊ້ເຂົ້າໃນວຽກງານປ້ອງກັນຄວາມສະຫງົບ ມີປະສິດທິຜົນດີຂຶ້ນ, ແທດເໝາະກັບທິດນໍາຂອງຂັ້ນເທິງ ໃນການສ້າງພະລາທິການກັບທີ່ ຕາມທິດເພິ່ງຕົນເອົາກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງເທື່ອລະກ້າວ.