ວຽກງານຊາຍແດນແຫ່ງຊາດມີຜົນສຳເລັດຫລາຍດ້ານ
ກອງປະຊຸມວຽກງານຊາຍແດນແຫ່ງຊາດໄດ້ຈັດຂຶ້ນໃນວັນທີ 8 ສິງຫານີ້, ທີ່ນະຄອນຫລວງວຽງຈັນ, ໂດຍການເຂົ້າຮ່ວມຂອງທ່ານ ສະເຫລີມໄຊ ກົມມະສິດ ລັດຖະມົນຕີກະຊວງການຕ່າງປະເທດ, ຮອງປະທານ ແລະ ຜູ້ປະຈຳການຄະນະກຳມາທິການຊາຍແດນແຫ່ງຊາດ, ມີບັນດາລັດຖະມົນຕີ, ຮອງລັດຖະມົນຕີ, ເຈົ້າແຂວງ, ຮອງເຈົ້າແຂວງ ໃນຂອບເຂດທົ່ວປະເທດ ແລະ ຜູ້ຕາງໜ້າຈາກອົງການຈັດຕັ້ງຕ່າງໆເຂົ້າຮ່ວມເປັນຈໍານວນຫລາຍ.
ໃນກອງປະຊຸມ, ທ່ານ ແສງເພັດ ຮຸ່ງບຸນຍວງ ຮອງລັດຖະມົນຕີກະຊວງການຕ່າງປະເທດລາຍງານໃຫ້ຮູ້ວ່າ: ປັດຈຸບັນ ການຈັດຕັ້ງປະຕິບັດວຽກງານຊາຍແດນແຫ່ງຊາດ ໄດ້ປະສົບຜົນສຳເລັດໃນຫລາຍດ້ານ ໂດຍສະເພາະ ໄດ້ສຳເລັດການສຳຫລວດ ແລະ ປັກຫລັກໝາຍຊາຍແດນ ກັບ 3 ປະເທດ ຄື: ສສ.ຫວຽດນາມ, ສປ ຈີນ ແລະ ສສ.ມຽນມາ ແລະ ກຳລັງສືບຕໍ່ດຳເນີນການສຳຫລວດ ແລະ ປັກຫລັກໝາຍກັບ ຣາຊະອານາຈັກໄທ ແລະ ຣາຊະອານາຈັກກຳປູເຈຍ. ໃນໄລຍະຜ່ານມາ ລັດຖະບານ ໄດ້ຖືເອົາວຽກງານຊາຍແດນແຫ່ງຊາດ ເປັນວຽກງານໜຶ່ງທີ່ສຳຄັນ ໃນການປົກປັກຮັກສາເອກະລາດ, ອຳນາດອະ ທິປະໄຕ ແລະ ຜືນແຜ່ນດິນອັນຄົບຖ້ວນຂອງຊາດໃຫ້ໝັ້ນຄົງ ແລະ ເປັນພື້ນຖານໃຫ້ແກ່ການປົກປັກຮັກສາສະຖຽນລະພາບທາງດ້ານການເມືອງ, ການພັດທະນາເສດຖະກິດ-ສັງຄົມ ແລະ ສ້າງຄວາມໄວ້ເນື້ອເຊື່ອໃຈເຊິ່ງກັນ ແລະ ກັນ ກັບປະເທດອ້ອມຂ້າງ ແນໃສ່ເສີມຂະຫຍາຍການພົວພັນຮ່ວມມືໃນຂົງເຂດພາກພື້ນ ແລະ ສາກົນ ໂດຍໄດ້ກຳນົດຊາຍແດນກັບບັນດາປະເທດໃກ້ຄຽງ ໃຫ້ມີຄວາມຈະແຈ້ງ, ຊັດເຈນ, ຫລີກເວັ້ນບໍ່ໃຫ້ມີບັນຫາຂັດແຍ່ງທີ່ເກີດຂຶ້ນ ແລະ ອາດນຳໄປເຖິງການປະທະກັນດ້ວຍກຳລັງຍ້ອນບັນຫາຊາຍແດນ.
ຄຽງຄູ່ກັບຜົນສຳເລັດດັ່ງກ່າວ, ໃນການຄຸມຄອງຫລັກໝາຍຊາຍແດນ ແລະ ການຄຸ້ມຄອງຊາຍແດນ ພວກເຮົາຍັງປະເຊີນກັບສິ່ງທ້າທາຍ ແລະ ປະກົດການຫຍໍ້ທໍ້ຫລາຍຢ່າງ ທີ່ເກີດຂຶ້ນຢູ່ຕາມບໍລິເວນຊາຍແດນ ເປັນຕົ້ນ ການລັກລອບຂຸດຄົ້ນຊັບພະຍາກອນທຳມະຊາດ (ປ່າໄມ້, ແຮ່ທາດ, ຫີນ, ຊາຍ ແລະ ສັດປ່າຫວງຫ້າມຕ່າງໆ), ການຄ້າຂາຍເຖື່ອນ, ຢາເສບຕິດ, ຄ້າມະນຸດ, ບັນຫາຕະຝັ່ງເຈື່ອນ, ການບຸກເບີກເສັ້ນທາງທີ່ເຕັງເສັ້ນຊາຍແດນ, ໃກ້ເສັ້ນຊາຍແດນ ແລະ ເລິກເຂົ້າໃນດິນຂອງກັນ ແລະ ກັນ, ການປູກຝັງ ແລະ ລ້ຽງສັດຂ້າມຊາຍແດນ, ການຍົກຍ້າຍຕັ້ງພູມລຳເນົາຂ້າມຊາຍແດນຕາມລຳພັງໃຈ ແລະ ບັນຫາອື່ນໆ ທີ່ພວກເຮົາທຸກຄົນ ນັບທັງສູນກາງ ແລະ ທ້ອງຖິ່ນ ຈະຕ້ອງໄດ້ເພີ່ມທະວີການຮ່ວມມື, ມີຄວາມເປັນເອກະພາບ ສຸມໃສ່ແກ້ໄຂຮ່ວມກັນໃຫ້ມີປະສິດທິຜົນ.
