ຄູຝຶກສະໂມສອນຕີນ່າ ພໍໃຈຜົນງານຫລັງຍາດໄດ້ 2 ຫລຽນຄໍາ ເບຍລາວ ໂອເພັນ 2018
ຄູຝຶກສະໂມສອນດອກປີກໄກ່ຕີນ່າ ພໍໃຈຜົນງານຂອງນັກກິລາດອກປີກໄກ່ຮຸ່ນສືບທອດ ທີ່ສ້າງຜົນງານໂດດເດັ່ນ ຍາດ 2 ຫລຽນຄໍາ ແລະ 1 ຫລຽນທອງ ໃນການແຂ່ງຂັນກິລາດອກປີກໄກ່ທົ່ວປະເທດ ຄັ້ງທີ 18 ຊີງຂັນປະທານສະພາແຫ່ງຊາດ ປະຈໍາປີ 2018 ຫລື ລາຍການ ເບຍລາວ ໂອເພັນ 2018 ທີ່ຈັດຂຶ້ນອາທິດຜ່ານມານີ້.
ທ່ານ ພັນຄຳ ອຸໄທທານີ ຫົວໜ້າຄູເຝີກສະໂມສອນດອກປີກໄກ່ຕີນ່າ ໃຫ້ສຳພາດວ່າ: ການແຂ່ງຂັນດອກປີກໄກ່ ລາຍການ ເບຍລາວ ໂອເພັນ ຄັ້ງທີ 18 ຊີງຂັນປະທານສະພາແຫ່ງຊາດ ປະຈໍາປີ 2018 ໃນຄັ້ງນີ້ ສະໂມສອນຕີນ່າ ໄດ້ສົ່ງນັກກິລາໃນຮຸ່ນເຍົາວະຊົນເຂົ້າຮ່ວມແຂ່ງຂັນທັງໝົດ 7 ຄົນ, ຍິງ 1 ຄົນ ແລະ ສາມາດຍາດໄດ້ 2 ຫລຽນຄໍາ ຈາກນາງ ພຸດສະຫວັນ ດາວປະສິດ ລາຍການດ່ຽວເຍົາວະຊົນຍິງ ຮຸ່ນອາຍຸບໍ່ເກີນ 14 ປີ ແລະ ດ່ຽວເຍົາວະຊົນຍິງ ຮຸ່ນອາຍຸບໍ່ເກີນ 17 ປີ. ຕໍ່ຜົນງານດັ່ງກ່າວ ສາມາດຕີລາຄາໄດ້ວ່າ ນັກກິລາພວກເຮົາປະສົບຜົນສຳເລັດໄດ້ລື່ນຄາດໝາຍ ແລະ ສ້າງຄວາມພໍໃຈໃຫ້ແກ່ຄະນະນໍາ. ສໍາລັບແຜນອະນາຄົດ ສະໂມສອນໄດ້ມີການວາງແຜນພັດທະນານັກກິລາຢ່າງຕໍ່ເນື່ອງ ໂດຍຈະຝຶກແອບນັກກິລາມືໃໝ່ໃຫ້ມີຄຸນນະພາບສູງ ສົ່ງເສີມຜູ້ທີ່ມີຜົນງານໄດ້ເຄື່ອນໄຫວເຝິກຊ້ອມ ແລະ ທົດສອບຄວາມສາມາດນຳບັນດາສະໂມສອນຕ່າງໆທັງພາຍໃນ ແລະ ຕ່າງປະເທດ.
