ຄໍາເວົ້າສຸດທ້າຍຈາກເສດຖີອັນດັບຕົ້ນໆຂອງໂລກ ສຕີຟ ຈ໊ອບສ໌ ເລື່ອງໜ້າຄິດຊີວິດເຮັດວຽກ
“ຂ້ອຍປະສົບຄວາມສໍາເລັດຫຼາຍໃນດ້ານທຸລະກິດ ຫຼື ອາດກ່າວວ່າ ຊີວິດຂ້ອຍເປັນຕົວຢ່າງເດັ່ນຊັດຂອງຄວາມສໍາເລັດ ນອກຈາກການເຮັດວຽກແລ້ວ ຂ້ອຍບໍ່ໄດ້ມີຄວາມສຸກຫຼາຍ ເພາະໃນທີ່ສຸດຄວາມຮັ່ງມີກໍກາຍເປັນສິ່ງດຽວທີ່ຂ້ອຍມີ, ຂ້ອຍກໍາລັງນອນປ່ວຍຢູ່ເທິງຕຽງ ພະຍາຍາມລະນຶກເຖິງຊີວິດທີ່ຜ່ານມາ ພົບວ່າຄວາມຮັ່ງມີທີ່ເຄີຍພູມໃຈ ພັດບໍ່ມີຄ່າຫຍັງໃນຊ່ວງສຸດທ້າຍທີ່ຂ້ອຍກໍາລັງຈະຕາຍ” ໃນຄວາມມືດ ຂ້ອຍເບິ່ງເຫັນພຽງແສງສີຂຽວ ແລະ ສຽງຂອງເຄື່ອງຊ່ວຍຫາຍໃຈ ເຮັດໃຫ້ຂ້ອຍຮູ້ສຶກວ່າຄວາມຕາຍໃກ້ເຂົ້າມາແລ້ວ, ຕອນນີ້ເຮັດໃຫ້ຂ້ອຍຮູ້ສຶກວ່າ ເມື່ອເຮົາຮັ່ງມີພໍແລ້ວ ຄວນຫັນໄປໃສ່ໃຈເລື່ອງອື່ນໆແດ່ ຊຶ່ງອາດເປັນສິ່ງອື່ນທີ່ສໍາຄັນເຊັ່ນ: ງານສິລະປະທີ່ເຄີຍໄຝ່ຝັນໃນຕອນຍັງນ້ອຍ.
ການບໍ່ຍອມຢຸດສ້າງຄວາມຮັ່ງມີຈະເຮັດໃຫ້ມີຊີວິດຄືທີ່ຂ້ອຍເປັນ ພະເຈົ້າໄດ້ມອບຄວາມຮັກໄວ້ໃນຫົວໃຈຂອງມະນຸດທຸກຄົນ ຊຶ່ງບໍ່ສາມາດຊື້ຫາໄດ້ດ້ວຍເງິນ, ເມື່ອຂ້ອຍຕາຍຂ້ອຍເອົາຄວາມຮັ່ງມີໄປນຳບໍ່ໄດ້ ສິ່ງທີ່ຂ້ອຍຈະນໍາຕິດຕົວໄປ ຄືຄວາມຊົງຈໍາກ່ຽວກັບຄວາມຮັກເທົ່ານັ້ນ ຊຶ່ງເປັນຄວາມຮັ່ງມີທີ່ແທ້ຈິງ ແລະ ຈະເປັນແສງນໍາທາງໃຫ້ເຮົາຕໍ່ໄປ. ຄວາມຮັກຈະຕິດຕາມເຮົາໄປໄດ້ທຸກທີ່ ເພາະມັນຢູ່ໃນຫົວໃຈ ແລະ ໃນມືຂອງເຮົາເອງ.
ຕຽງທີ່ແພງທີ່ສຸດໃນໂລກຄື: ຕຽງຄົນປ່ວຍ ເຮົາສາມາດຈ້າງຄົນມາຂັບລົດໃຫ້, ມາເຮັດວຽກຫາເງິນໃຫ້ ແຕ່ບໍ່ມີໃຜມາປ່ວຍແທນເຮົາໄດ້, ສິ່ງຂອງທີ່ຫາຍໄປ ເຮົາອາດຫາພົບໄດ້ ແຕ່ເຮົາເອົາຊີວິດທີ່ເສຍໄປກັບຄືນມາບໍ່ໄດ້. ເມື່ອເຮົາເຂົ້າໄປຢູ່ຫ້ອງຜ່າຕັດ ຈະຮູ້ສຶກໄດ້ວ່າ ເຮົາໃສ່ໃຈສຸຂະພາບຂອງຕົນເອງໜ້ອຍເກີນໄປ ແຕ່ມັກຈະຮູ້ຕົວເມື່ອຊ້າເກີນໄປສະເໝີ.
ຈົ່ງໃຫ້ຄວາມຮັກກັບຄອບຄົວ, ກັບຄົນຮັກ ແລະ ໝູ່ເພື່ອນ, ໝັ່ນເບິ່ງແຍງສຸຂະພາບຂອງຕົນເອງ ແລະ ໃສ່ໃຈຄົນອ້ອມຂ້າງໃຫ້ຫຼາຍໆ.
ສິ່ງທີ່ພິສູດແລ້ວ ເງິນ, ເວລາ ແລະ ສຸຂະພາບ, ສຸຂະພາບຄືສິ່ງສໍາຄັນທີ່ສຸດ, ເວລາ ແລະ ເງິນ ຄືສິ່ງສໍາຄັນຮອງລົງມາ.
ສຕີຟ ຈ໊ອບສ໌ ເປັນເສດຖີອັນດັບຕົ້ນໆຂອງໂລກ ຜົນງານແຫ່ງຄວາມສໍາເລັດ, ຄວາມຮັ່ງມີບໍ່ມີໃຜປະຕິເສດໄດ້ ແຕ່ຄໍາເວົ້າສຸດທ້າຍແຫ່ງຊີວິດ ກໍໄດ້ເປັນຂໍ້ຄິດແກ່ຄົນທົ່ວໂລກໄດ້ເປັນຢ່າງດີ ໂດຍສະເພາະຢ່າງຍິ່ງ ຜົນຕອບແທນທີ່ເຂົາໄດ້ຮັບ ຄືຕຽງຄົນໄຂ້ທີ່ແພງທີ່ສຸດໃນໂລກ, ເງິນທີ່ມີຈ້າງຄົນມາປ່ວຍແທນບໍ່ໄດ້, ຫາກ ສຕີຟ ຈ໊ອບສ໌ ໄດ້ເຫັນສັດຈະທໍາຂອງຊີວິດທີ່ມີເກີດ ແກ່ ເຈັບ ແລະ ຕາຍ ເປັນວັດທະຈັກ ຫາກໄດ້ສຶກສາ ແລະ ເຂົ້າໃຈຄໍາສອນຂອງພຸດທະສາສະໜາ ທີ່ວ່າ ຕາຍເສຍກ່ອນຕາຍ, ທົດລອງເຂົ້າຫ້ອງນິພານທີ່ອະນຸສອນພຸດທະສາສະໜາ ຄົງບໍ່ຕ້ອງປະສົບຊີວິດຊ່ວງສຸດທ້າຍດັ່ງທີ່ສະທ້ອນໄວ້.
ເຮົາຈະນໍາຕົວຢ່າງ ບົດຮຽນຈາກ ສຕີຟ ຈ໊ອບສ໌ ມາປັບປຸງ, ພັດທະນາການດໍາເນີນຊີວິດຂອງເຮົາທີ່ເຫຼືອໄດ້ຢ່າງມີຄຸນນະພາບ, ຢ່າງມີຄວາມສຸກໄດ້ຫຼາຍໜ້ອຍເທົ່າໃດ ກໍສຸດແຕ່ທ່ານຈະໄຂວ່ຄວ້າໄດ້ຫຼາຍໜ້ອຍຕາມອັດທະຍາໄສສ່ວນຕົນ. ສຸດທ້າຍຂອງສຸດທ້າຍ ທຸກຄົນບໍ່ອາດຫຼີກພົ້ນກົດແຫຼ່ງກໍາໄດ້, ການເຮັດແຕ່ກໍາດີ ທັງກາຍ, ວາຈາ ແລະ ໃຈ ຈຶ່ງເປັນຈຸດເລີ່ມຕົ້ນທີ່ດີ.
