ຄະນະຊີ້ນຳວຽກງານສໍາຫລວດ ແລະ ຂຸດຄົ້ນເພື່ອຊອກຫາຮ່ອງຮອຍ ແລະ ສິ່ງເສດເຫລືອຂອງທະຫານອາເມລິກາທີ່ຫາຍສາບສູນໃນປາງສົງຄາມຢູ່ລາວລົງປະຕິບັດງານຢູ່ແຂວງຫົວພັນ

ໃນລະຫວ່າງວັນທີ 3-6 ສິງຫານີ້, ທ່ານ ແສງເພັດ ຮຸ່ງບຸນຍວງ ຮອງລັດຖະມົນຕີກະຊວງການຕ່າງປະເທດ, ຜູ້ຊີ້ນຳວຽກງານການສຳຫລວດ ແລະ ຂຸດຄົ້ນເພື່ອຊອກຫາຮ່ອງຮອຍ ແລະ ສິ່ງເສດເຫລືອຂອງທະຫານອາເມລິກາທີ່ຫາຍສາບສູນໃນປາງສົງຄາມຢູ່ລາວ, ທ່ານພົນຕີ ຄໍາສີ ວົງຄໍາຊາວ ຫົວໜ້າຫ້ອງວ່າການກະຊວງປ້ອງກັນປະເທດ, ພ້ອມດ້ວຍຄະນະໄດ້ໄປຢ້ຽມຢາມການປະຕິບັດງານຮ່ວມລາວ-ອາເມລິກາໃນການສໍາຫລວດ ແລະ ຂຸດຄົ້ນ ເພື່ອຊອກຫາຮ່ອງຮອຍ ແລະ ສິ່ງເສດເຫລືອຂອງທະຫານອາເມລິກາທີ່ຫາຍສາບສູນໃນປາງສົງຄາມຢູ່ລາວ (MIA) ຄັ້ງທີ 5 ປະຈໍາສົກປີ 2017-2018 ຢູ່ເຂດບ້ານນາແທ່ນ ແລະ ບ້ານບັກ, ເມືອງວຽງໄຊແຂວງຫົວພັນ, ເພື່ອຕິດຕາມຊຸກຍູ້ການປະຕິບັດງານຂອງຄະນະວິຊາການຮ່ວມລາວ-ອາເມລິກາ ໃນການປະຕິບັດວຽກງານດ້ານມະນຸດສະທຳຮ່ວມກັນ ແລະ ທັງເປັນການສະແດງເຖິງຄວາມເອົາໃຈໃສ່ຊີ້ນໍານໍາພາຈາກເຈົ້າໜ້າທີ່ຂັ້ນສູງຂອງລາວ ໃນການແກ້ໄຂບັນຫາຜູ້ຫາຍສາບສູນໃນປາງສົງຄາມຢູ່ລາວຕາມການຮ້ອງຂໍຈາກລັດຖະບານອາເມລິກາ.

ໃນໂອກາດດັ່ງກ່າວ, ທ່ານຮອງລັດຖະມົນຕີກະຊວງການຕ່າງປະເທດ, ຜູ້ຊີ້ນໍາວຽກງານ MIA ໄດ້ພົບປະ ແລະ ໂອ້ລົມກັບບັນດາພະນັກງານວິຊາການປະຈໍາພາກສະໜາມ ແລະ ອໍານາດການປົກຄອງທ້ອງຖິ່ນທີ່ຄ້າຍພັກເມືອງຊໍາເໜືອແຂວງຫົວພັນ, ຢ້ຽມຢາມການປະຕິບັດງານຕົວຈິງຢູ່ຈຸດຂຸດຄົ້ນ ແລະ ຮັບຟັງການລາຍງານສະພາບການປະຕິບັດວຽກງານຢູ່ແຕ່ລະຈຸດຂຸດຄົ້ນຈາກຫົວໜ້າພາກສະໜາມຝ່າຍລາວ ແລະ ຝ່າຍອາເມລິກາ, ຊຶ່ງເຫັນເປັນເອກະພາບກັນວ່າ ການຮ່ວມມືມີປະສິດທິຜົນ, ທັງນີ້, ກໍຍ້ອນພະນັກງານວິຊາການທັງສູນກາງ ແລະ ທ້ອງຖິ່ນ ພ້ອມດ້ວຍປະຊາຊົນລາວໄດ້ປະກອບສ່ວນຢ່າງຕັ້ງໜ້າ ແລະ ມີຄວາມເອົາໃຈໃສ່ຕໍ່ການປະຕິບັດໜ້າທີ່ວຽກງານຂອງຕົນເປັນຢ່າງດີ. ຊຶ່ງຜົນການຂຸດຄົ້ນຄັ້ງນີ້ຈະໄດ້ຈັດພິທີມອບ-ຮັບຢ່າງເປັນທາງການໃນອະນາຄົດອັນໃກ້ນີ້.