ອານຸສອນ ຍັງບໍ່ພໍໃຈຕໍ່ຜົນງານທີ່ ສສ ຫວຽດນາມ

ທ້າວ ອານຸສອນ ໄຊສາ ນັກກິລາແລ່ນ-ລານທີມຊາດ ຍັງບໍ່ພໍໃຈຕໍ່ຜົນງານທີ່ຍາດມາໄດ້ໃນການແຂ່ງຂັນແລ່ນ-ລານ ຊີງແຊ້ມນາໆຊາດຄັ້ງທີ 25 ທີ່ ສສ ຫວຽດນາມ ຈັດຂຶ້ນທ້າຍເດືອນກໍລະກົດຜ່ານມານີ້ ມີ 12 ປະເທດ ແລະ 35 ສະໂມສອນຈາກ ສສ ຫວຽດນາມ ເຂົ້າຮ່ວມ.

ທ້າວ ອານຸສອນ ໄຊສາ ໃຫ້ສໍາພາດວ່າ: ການແຂ່ງຂັນຄັ້ງຜ່ານມາທີ່ ສສ ຫວຽດນາມ ໄດ້ລົງສະໜາມແຂ່ງຂັນ 2 ລາຍການຄື: ແລ່ນ 100 ແມັດ ແລະ ແລ່ນຂ້າມຮົ້ວ 110 ແມັດ ແລະ ສາມາດຍາດໄດ້ອັນດັບທີ 2 ຂອງການແຂ່ງໃນລາຍການ ແລ່ນຂ້າມຮົ້ວ 110 ແມັດ ດ້ວຍເວລາ 14,20 ວິນາທີ ໄດ້ຫລຽນເງິນມາຄອງ, ສ່ວນອັນດັບທີ 1 ປະເທດຟີລິບປິນ ດ້ວຍເວລາ 14,18 ວິນາທີ, ອັນດັບທີ 3 ຮົງກົງ ດ້ວຍເວລາ 14,24 ວິນາທີ ເຊິ່ງຜົນງານຜ່ານມາຕົນເອງຍັງບໍ່ທັນພໍໃຈປານໃດ ເພາະການລົງສະໜາມໃນຮອບຮອງຊະນະເລີດຕົນເອງເກີດອຸປະຕິເຫດ ໃນຂະນະທີ່ກໍາລັງແຂ່ງຂັນຢູ່. ດັ່ງນັ້ນ, ຈຶ່ງເຮັດໃຫ້ພາດໂອກາດດັ່ງກ່າວ ແລະ ສາມາດຍາດໄດ້ພຽງແຕ່ຫລຽນເງິນເທົ່ານັ້ນ.

ທ້າວ ອານຸສອນ ໄຊສາ ຍັງເວົ້າຕື່ມວ່າ: ປັດຈຸບັນຕົນເອງໄດ້ຝຶກຊ້ອມຢູ່ປະເທດໄທ ເພື່ອກຽມຄວາມພ້ອມເຂົ້າຮ່ວມການແຂ່ງຂັນອາຊຽນເກມທີ່ປະເທດອິນໂດເນເຊຍ ທີ່ຈະຈັດຂຶ້ນໃນທ້າຍເດືອນສິງຫານີ້ ເຊິ່ງເລີ່ມເຂົ້າສູນຝຶກຊ້ອມແຕ່ວັນທີ 20 ມິຖຸນາຫາ 20 ສິງຫານີ້.