ຄວາມໂປ່ງໃສ ໃນສິ່ງບໍລິຈາກ

ໂດຍ : ມຶກບໍ່ແຫ້ງ

ການບໍລິຈາກບໍ່ວ່າທາງດ້ານວັດຖຸ ເຄື່ອງໃຊ້ ແລະເງິນສົດ ແມ່ນມີຫຼາຍສົມຄວນຈາກພາກສ່ວນຕ່າງໆ ທັງພາຍໃນ ແລະ ຕ່າງປະເທດ ເພື່ອສົມທົບ ຊ່ວຍເຫຼືອຜູ້ປະສົບໄພພິບັດຂອງຊາດໃນປັດຈຸບັນ  ແຕ່ຫຼາຍຄົນຍັງມີ ຄວາມສົງໄສ ແລະເປັນກັງວົນໃຈວ່າ ເຄື່ອງ ແລະເງິນ ທີ່ໄດ້ຮັບຈາການບໍລິຈາກນັ້ນ ອາດບໍ່ໄປຮອດ ມືປະຊາຊົນຜູ້ໄດ້ຜົນກະທົບ ຢ່າງເຕັມສ່ວນ.

ໄພພິບັດ ທີ່ເກີດຈາກເຂື່ອນໄຟຟ້າເຊປຽນ ເຊນໍ້ານ້ອຍແຕກ ບວກກັບໄພນໍ້າຖ້ວມຢູ່ຫຼາຍແຂວງຂອງປະເທດ ນັ້ນນໍາມາເຊິ່ງການສູນເສຍຫຼາຍທີ່ສຸດຂອງຊາດ ນັບທັງຊີວິດ ແລະຊັບສິນ. ສິ່ງດັ່ງກ່າວ ໄດ້ເຮັດໃຫ້ພີ່ນ້ອງ ຮ່ວມຊາດ ແລະຊາວຕ່າງປະເທດ ເຫັນອົກເຫັນໃຈ ໃຫ້ການຊ່ວຍເຫຼືອ ໂດຍການບໍລິຈາກເງິນ, ເຄື່ອງໃຊ້ ແລະອາຫານ ຢ່າງຫຼວງຫຼາຍ.

ມາຮອດວັນທີ 3 ສິງຫາ 2018 ກະຊວງ ແຮງງງານ ແລະສະຫວັດດິການສັງຄົມໄດ້ແຈ້ງວ່າ :  ໄດ້ຮັບການ ບໍລິຈາກ ເງິນສົດຈາກພາກສ່ວນຕ່າງໆ ຜ່ານກະຊວງດັ່ງກ່າວ ແລ້ວ ຈຳນວນ 14 ຕື້ກີບ ແລະ ຍັງມີສະກຸນເງິນຕ່າງປະເທດຕຶ່ມອີກຄື 16,6 ລ້ານບາດ ແລະ 1,9 ລ້ານໂດລາສະຫະລັດ.  ນອກນັ້ນ ພວກເຮົາຍັງໄດ້ຮັບເຄື່ອງຊ່ວຍເຫຼືອ, ເປັນອາຫານ ແລະນໍ້າດຶ່ມ ລວມກັນແລ້ວແມ່ນຫຼາຍສິບຕື້ກີບ.

ຈາກຈຳນວນເງິນ ແລະເຄື່ອງທີ່ໄດ້ຮັບການບໍລິຈາກນັ້ນ ປະຊາຊົນ ຍັງມີຄວາມກັງວົນວ່າ “ ຢ້ານບໍ່ມີຄວາມໂປ່ງໄສ, ເຄື່ອງຂອງ ເງິນຄຳ ຈະບໍ່ໄປຮອດມືປະຊາຊົນຜູ້ໄດ້ຜົນກະທົບ” ສິ່ງດັ່ງກ່າວກາຍເປັນຄວາມເຊື່ອ ແລະຕິດໃນມະໂນພາບຂອງຄົນຈຳນວນຫຼາຍໄປແລ້ວ.

ແຕ່ຜູ້ຂຽນກໍເຊື່ອໝັ້ນວ່າລັດບານເຮົາເພິ່ນຈະເອົາໃຈໃສ່ເລື່ອງນີ້ເປັນພິເສດ, ທ່ານ ທອງລຸນ ສີສຸລິດ ນາຍົກລັດຖະມົນຕີ  ແຫ່ງສປປລາວ ໄດ້ໃຫ້ທິດຊີ້ນຳໃນວັນທີ 1 ສິງຫາ 2018 ຕໍ່ປະທານ ຄະນະກຳມະການສະເພາະກິດແກ້ໄຂໄພພິບັດລະດັບຊາດ ພ້ອມການນໍາແຂວງອັດຕະປື, 1 ໃນ 4 ວຽກສຳຄັນ ແມ່ນ “ຕ້ອງຈັດສັນແບ່ງປັນ ແຈກຢາຍ ແລະ ຄຸ້ມຄອງເຄື່ອງຊ່ວຍເຫລືອ ລວມທັງເງິນ ແລະ ອື່ນໆ ໃຫ້ວ່ອງໄວ, ຈະແຈ້ງ, ທົ່ວເຖິງ ແລະ ໂປ່ງໃສຢ່າງຫນັກແຫນ້ນ”

ແລະ ພ້ອມນັ້ນ ທ່ານ ນາງ ຄຳໃບ ຂັນທິຍະ ຮອງລັດຖະມົນຕີ ກະຊວງແຮງງານ ແລະສະຫວັດດີການສັງຄົມ ກໍໃຫ້ສຳພາດຕໍ່ນັກຂ່າວ (ຂ່າວສານປະເທດລາວ) ໃນວັນທີ 31 ກໍລະກົດ 2018 ທີ່ບາງຕອນເວົ້າວ່າ “ເງິນ​ ​ທີ່​ໄດ້​ຮັບ​ຈາກ​ການ​ຊ່ວຍ​ເຫລືອ​  ຈາກ​ສັງຄົມທັງ​ພາຍ​ໃນ ​ແລະ ຕ່າງປະ​ເທດນັ້ນ  ​ແມ່ນ​ບໍ່​ໄດ້​ນຳ​ເອົາ​ໄປ​ໃຊ້​ເຂົ້າ​ໃນບ້ວງ ​ບໍລິຫານ​ຈັດການ​​ໃດໆ​ທັງ​ສິ້ນ,  ​ເຊິ່ງ​ເງິນ​ທັງ​ໝົດ ຈະ​ໄດ້​ນຳ​ໃຊ້​ເຂົ້າ​ຢູ່​ໃນ​ການ​ຊ່ວຍ​ເຫລືອ​ ສຸກ​ເສີນ​ຕົວ​ຈິງ​ໃຫ້​ແກ່​ປະຊາຊົນ  ​ແລະ ນຳ​ໃຊ້​ເຂົ້າ​ຢູ່​ໃນ​ໄລຍະ​ການ​ຟື້ນ​ຟູ ໃຫ້​ມີ​ປະສິດທິພາບ​ທີ່​ສຸດ”

ຖ້າເປັນໄປໄດ້ກໍອາດສ້າງແຜນຈະແຈ້ງໃນການໃຊ້ຈ່າຍ ໃນຍະສັ້ນ, ກາງ ແລະ ຍາວ ເພື່ອຟື້ນຟູຊີວິດການເປັນຢູ່ຂອງຜູ້ປະສົບໄພໃຫ້ດີຂຶ້ນ, ມີກົນໄກການຕິດຕາມ ແລະລາຍງານ ຢ່າງຈະແຈ້ງ ແລະ ລາຍງານຕໍ່ສັງຄົມຮັບຮູ້ ເປັນແຕ່ໄລຍະ. ສິ່ງດັ່ງກ່າວນີ້ ພວກເຮົາຄວນຕ້ອງມີການພັດທະນາ ແລະປັບປຸງ ເປັນ ອັນລະອຽດ ເຂັ້ມແຂງ ເພື່ອຕອບຕ້ານໄພພິບັດຕ່າງທີ່ອາດຈະເກີດຂຶ້ນກັບປະເທດໃນປັດຈຸບັນ ແລະອະນາຄົດ.

ຈາກບົດຮຽນ ໄພພິບັດ ອັນຮ້າຍແຮງໃນປີນີ້ ພວກເຮົາຈະເຂັ້ມແຂງຂຶ້ນ, ຮອບຄອບ ແລະມີຄວາມເປັນມື ອາຊີບໃນການຕອບໂຕ້ ຕໍ່ໄພພິບັດຕ່າງຫຼາຍຂຶ້ນ ແລະ ສ້າງຄວາມເຊື່ອໝັ້ນແກ່ປະຊາຊົນ ທີ່ບໍລິຈາກເງິນສົດ, ເຄື່ອງໃຊ້ ແລະອາຫານຕ່າງໆໃຫ້ດີຂຶ້ນ.

ເຖິງວ່າ ເງິນຄຳ ແລະເຄື່ອງຂອງທີ່ບໍລິຈາກນັ້ນ ຈະບໍ່ສາມາດທົດແທນຕໍ່ສິ່ງທີ່ສູນເສຍໄປ ແຕ່ຄວາມໂປ່ງໃສ ຈະເຮັດໃຫ້ປະຊາຊົນຮ່ວມຊາດອຸ່ນໃຈວ່າ ພວກເຮົາຈະເຮັດດີທີ່ສຸດ ຕໍ່ຜູ້ປະສົບໄພ ໃຫ້ມີຄວາມທຸ່ນທ່ຽງ ແລະດຳລົງຊີວິດຕໍ່ໄປຢ່າງເຂັ້ມແຂງ.