ລັດຖະມົນຕີກະຊວງການຕ່າງປະເທດຊີ້ແຈງໄພທໍາມະຊາດຢູ່ລາວຕໍ່ສາກົນ
ໃນວັນທີ 7 ກໍລະກົດນີ້, ຢູ່ນະຄອນຫລວງວຽງຈັນ, ທ່ານ ສະເຫລີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ໄດ້ຊີ້ແຈງຜົນກະທົບຈາກໄພທໍາມະຊາດຢູ່ລາວເຮົາຕໍ່ບັນດາອົງການຈັດຕັ້ງສາກົນ ແລະ ສື່ມວນຊົນວ່າ: ນັບແຕ່ຕົ້ນປີມານີ້, ມີ 10 ແຂວງຂອງ ສປປ ລາວ ໄດ້ຮັບຜົນກະທົບໜັກຈາກໄພນ້ຳຖ້ວມຄື: ສະຫວັນນະເຂດ, ບໍລິຄຳໄຊ, ຫລວງພະບາງ, ອຸດົມໄຊ, ຫລວງນໍ້າທາ, ຈຳປາສັກ, ຄຳມ່ວນ ແລະ ແຂວງອື່ນໆ, ແຕ່ຮ້າຍແຮງທີ່ສຸດແມ່ນເຫດການເກີດຂຶ້ນຢູ່ແຂວງອັດຕະປື ໃນວັນທີ 23 ກໍລະກົດຜ່ານມານີ້, ຍ້ອນພະຍຸ ແລະ ມີຝົນຕົກໜັກຫລາຍວັນ ເຮັດໃຫ້ນ້ຳຈາກເຂື່ອນເຊປຽນ-ເຊນ້ຳນ້ອຍທະລຸລົງມາໄຫລຖ້ວມເມືອງສະໜາມໄຊ ໄດ້ຮັບຄວາມເສຍຫາຍຢ່າງຫລວງຫລາຍນັບທັງຊີວິດ ແລະ ຊັບສິນ, ເຊິ່ງລັດຖະບານກໍໄດ້ປະກາດເປັນເຂດໄພພິບັດແຫ່ງຊາດ.
ທ່ານລັດຖະມົນຕີ ໃຫ້ຮູ້ວ່າ: ໄພພິບັດທາງທຳມະຊາດໃນປີນີ້, ໄດ້ສ້າງຄວາມເສຍຫາຍເປັນຈຳນວນຫລາຍ, ໂດຍສະເພາະແມ່ນພຶ້ນຖານໂຄງລ່າງ, ລະບົບເສັ້ນທາງຄົມມະນາຄົມ, ພຶ້ນທີ່ການຜະລິດກະສິກຳ ແລະ ອື່ນໆ, ຊຶ່ງພາຍຫລັງເກີດສະພາບດັ່ງກ່າວ ລັດຖະບານກໍໄດ້ຮີບຮ້ອນແຕ່ງຕັ້ງຄະນະສະເພາະກິດໃນການແກ້ໄຂໄພພິບັດຢ່າງເລັ່ງດ່ວນ, ພ້ອມທັງຂໍຄວາມຊ່ວຍເຫລືອຈາກສາກົນ ເພື່ອຊ່ວຍແກ້ໄຂໄພພິບັດດັ່ງກ່າວ, ໂດຍສະເພາະແມ່ນຢູ່ເມືອງສະໜາມໄຊ ແຂວງອັດຕະປື ແລະ ມາຮອດປັດຈຸບັນ, ຄະນະສະເພາະກິດແກ້ໄຂໄພພິບັດດັ່ງກ່າວ, ກໍໄດ້ເຄັ່ງຮ້ອນສືບຕໍ່ຄົ້ນຫາຜູ້ຫາຍສາບສູນ ແລະ ສ້ອມແປງສຸກເສີນເສັ້ນທາງ 18A ແລະ ກໍ່ສ້າງເຮືອນພັກຊົ່ວຄາວໃຫ້ປະຊາຊົນທີ່ໄດ້ຮັບຜົນກະທົບ ຈຳນວນ 14 ຫລັງ, ມີ 140 ຫ້ອງ, ລົງສ້ອມແປງລະບົບໄຟຟ້າ, ເຈາະນ້ຳບາດານ ແລະ ຕິດຕັ້ງຫ້ອງນ້ຳເຄື່ອນທີ່ໃຫ້ທົ່ວເຖິງ ແລະ ເລັ່ງປັບປຸງພຶ້ນຖານໂຄງລ່າງ, ໂດຍສະເພາະແມ່ນເສັ້ນທາງ ແລະ ຂົວຫລາຍແຫ່ງ ເພື່ອໃຫ້ການສັນຈອນໄປມາມີຄວາມສະດວກດີຂຶ້ນ, ພ້ອມນັ້ນເລັ່ງໃສ່ສະໜອງສະບຽງອາຫານແລະ ການຊ່ວຍເຫລືອຕ່າງໆແກ່ຜູ້ປະສົບໄພໄດ້ທົ່ວເຖິງ, ພ້ອມເອົາໃຈໃສ່ປົວແປງສຸຂະພາບຈິດໃຈ ແລະ ຮ່າງກາຍຂອງຜູ້ໄດ້ຮັບບາດເຈັບ ແລະ ເພີ່ມທະວີວຽກງານສຸຂະອະນາໄມປ້ອງກັນພະຍາດທີ່ອາດຈະເກີດຂຶ້ນຫລັງນໍ້າຖ້ວມໃຫ້ມີປະສິດທິພາບດີທີ່ສຸດ.
