ເລັ່ງກໍ່ສ້າງສູນພັກຊົ່ວຄາວໃຫ້ຜູ້ປະສົບໄພນ້ຳຖ້ວມຢູ່ແຂວງອັດຕະປືໃຫ້ພຽງພໍ
ຄະນະກຳມະການກູ້ໄພແຂວງອັດຕະປື ໃຫ້ຮູ້ວ່າ: ເນື່ອງຈາກມີຜູ້ປະສົບໄພເປັນຈໍານວນຫລາຍຢູ່ສູນພັກຊົ່ວຄາວທີ່ເມືອງສະໜາມໄຊ ແລະ ກໍ່ໃຫ້ເກີດຄວາມແອອັດ ແລະ ຫ້ອງນ້ຳໃຊ້ບໍ່ພຽງພໍ, ດັ່ງນັ້ນທາງໜ່ຍງານກ່ຽວຂ້ອງຈຶ່ງໄດ້ເລັ່ງການກໍ່ສ້າງສູນພັກຊົ່ວຄາວ ແລະ ຫ້ອງນໍ້າສາທາລະນະໃຫ້ແກ່ຜູ້ໄພດັ່ງກ່າວ ຢູ່ບໍລິເວນເດີ່ນໂຮງຮຽນປະຖົມບ້ານຫາດຍາວ ຫ່າງຈາກເທສະບານເມືອງສະໜາມໄຊໄປປະມານ 1 ກິໂລແມັດ, ໂດຍບໍລິສັດ ເອັສເຄ (SK) ສ.ເກົາຫລີ ຈະເປັນອາຄານຊັ້ນດຽວ 14 ຫລັງ, ແຕ່ລະຫລັງປະກອບມີ 10 ຫ້ອງ ເພື່ອ ກຽມຍົກຍ້າຍຜູ້ປະສົບໄພຢູ່ທີ່ພັກຊົ່ວຄາວໃນໂຮງຮຽນເທສະບານເມືອງເຂົ້າມາຢູ່ທີ່ນີ້. ຄາດວ່າການກໍ່ສ້າງຈະສຳເລັດພາຍໃນໄລຍະເວລາ 60 ວັນ.
ທ່ານ ສຸກສະໄໝ ຈັນທະມາດ ຮອງເຈົ້າແຂວງອັດຕະປື ໃຫ້ຮູ້ວ່າ: ໄພທໍາມະຊາດດັ່ງກ່າວສົ່ງຜົນກະທົບຕໍ່ປະຊາຊົນຫລາຍກວ່າ 13.000 ຄົນໃນ 13 ບ້ານຜູ້ອາໃສຢູ່ເຂດດັ່ງກ່າວ. ໃນນີ້ມີ 6 ບ້ານໄດ້ຮັບຄວາມເສຍຫາຍຢ່າງໜັກໜ່ວງ, ເຊິ່ງເຈົ້າໜ້າທີ່ໄດ້ຍົກຍ້າຍ ແລະ ຈັດສັນທີ່ພັກຊົ່ວຄາວໃຫ້ຜູ້ໄດ້ຮັບຜົນກະທົບ ມີທັງໝົດ 5 ຈຸດຄື: ໂຮງຮຽນ ມສ ຈັນທາ ເມືອງ ສະໜາມໄຊ, ຈຸດເທດສະບານເມືອງ ສະໜາມໄຊ, ຈຸດບ້ານຕໍມະຢອດ, ຈຸດບ້ານ ດອນບົກ ແລະ ບ້ານ ປິນດົງ ເຊິ່ງເຫັນວ່າມີຄວາມແອອັດ, ແລະ ນອກຈາກການເບິ່ງແຍງດູແລໃນດ້ານຕ່າງໆແລ້ວ, ທາງແຂວງ ຍັງໄດ້ເລັ່ງສ້າງສູນພັກຊົ່ວຄາວໃຫ້ແກ່ຜູ້ປະສົບໄພເຫລົ່ານີ້ໄດ້ພຽງພໍ, ພ້ອມນັ້ນໄດ້ສືບຕໍ່ມອບເຄື່ອງຊ່ວຍເຫລືອບັນເທົາທຸກເບື້ອງຕົ້ນໃຫ້ປະຊາຊົນຜູ້ປະສົບໄພໃຫ້ທົ່ວເຖິງ, ເຊິ່ງມາຮອດປັດຈຸບັນໄດ້ຮັບເງິນແຮແລ້ວ 700 ກ່ວາຄອບຄົວ, ຄອບຄົວລະ 5 ແສນກີບ, ພ້ອມໄດ້ເລັ່ງຄຸ້ມຄອງບໍລິຫານເຄື່ອງຊ່ວຍເຫລືອຕ່າງໆດັ່ງກ່າວ ເພື່ອບໍ່ໃຫ້ຕົກເຮ່ຍເສຍຫາຍ ແລະ ຈັດວາງໃຫ້ເປັນລະບົບກ່ວາເກົ່າ ນັບທັງຢູ່ສູນບໍລິຈາກ, ສາງເກັບມ້ຽນທັງຢູ່ແຂວງ ແລະ ເມືອງ, ຈັດສັນສິ່ງຂອງທີ່ຈຳເປັນໃຫ້ແກ່ປະຊາຊົນຢູ່ຕາມຈຸດຕ່າງໆໃຫ້ພຽງພໍ ແລະ ຖືກຕ້ອງກັບຈຸດປະສົງຂອງຜູ້ບໍລິຈາກ, ໂດຍສະເພາະໄດ້ເນັ້ນໃສ່ການສະໜອງອາຫານການກິນໃຫ້ພຽງພໍ, ພ້ອມເຄື່ອງນຸ່ງຮົ່ມ, ເຄື່ອງສຸຂະພັນ, ຢາປົວພະຍາດ ແລະ ສິ່ງຈຳເປັນອື່ນໆ.
