UN ເຜີຍ ສປປ ເກົາຫລີ ຍັງເດີນໜ້າ ໂຄງການພັດທະນາອາວຸດ
ລາຍງານຂອງສະຫະປະຊາຊາດ ລະບຸວ່າ: ສປປ ເກົາຫລີ ຍັງບໍ່ຢຸດໂຄງການພັດທະນາອາວຸດນິວເຄຼຍ ແລະ ລູກສອນໄຟ ອີກທັງຍັງລັກລອບເຮັດທຸລະກຳໃນລະດັບເກີນກວ່າທີ່ UN ກຳນົດໄວ້.
North Korea has not stopped nuclear, missile program – confidential U.N. report https://t.co/kSmJRRl5po pic.twitter.com/84O1v3bGl2
— Reuters (@Reuters) August 4, 2018
ສຳນັກຂ່າວຕ່າງປະເທດລາຍງານວ່າ: ຄະນະຜູ້ຊ່ຽວຊານພິເສດດ້ານສະຖານະການໃນແຫລມເກົາຫລີຂອງສະຫະປະຊາຊາດ (UN) ສະເໜີລາຍງານຄວາມຍາວ 62 ໜ້າຕໍ່ສະພາຄວາມໝັ້ນຄົງແຫ່ງສະຫະປະຊາຊາດ (UNSC) ໃນວັນທີ 3 ສິງຫາ ມີເນື້ອໃນສຳຄັນວ່າ: ສປປ ເກົາຫລີ ຍັງບໍ່ຢຸດໂຄງການພັດທະນາອາວຸດນິວເຄຼຍ ແລະ ລູກສອນໄຟ ອີກທັງຍັງມີພຶດຕິກຳລະເມີດມະຕິຂອງ UNSC ທັງການລັກລອບຊື້ຂາຍນ້ຳມັນດິບ, ຜະລິດຕະພັນປີໂຕຣລຽມ ແລະ ອວຸດສົງຄາມຂະໜາດກາງ ແລະ ຂະໜາດເບົາ ຜ່ານ “ຄົນກາງຊາວຕ່າງປະເທດ” ໃນຊີຣີ ເພື່ອສົ່ງຕໍ່ໄປເຢເມນ, ຊູດັງ ແລະ ລີບີ. ຂະນະດຽວກັນ ສປປ ເກົາຫລີ ຍັງສົ່ງອອກຖ່ານຫີນ, ແຮ່ເຫລັກ ແລະ ອາຫານທະເລ ໃນປະລິມານເກີນກວ່າທີ່ UNSC ລະບຸໄວ້.
ລາຍງານດັ່ງກ່າວໄດ້ຮັບການເປີດເຜີຍອອກມາໃນເວລາດຽວກັບທີ່ທ່ານ ໄມເຄິລ ປອມເປໂອ ລັດຖະມົນຕີກະຊວງການຕ່າງປະເທດອາເມລິກາ, ທ່ານ ຫວັງອີ້ ລັດຖະມົນຕີກະຊວງການຕ່າງປະເທດຈີນ, ທ່ານ ເຊີເກ ລາຟຣອຟ ລັດຖະມົນຕີກະຊວງການຕ່າງປະເທດຣັດເຊຍ ແລະ ທ່ານ ຣີ ຢອງໂຮ ລັດຖະມົນຕີກະຊວງການຕ່າງປະເທດ ສປປ ເກົາຫລີ ເຂົ້າຮ່ວມກອງປະຊຸມສະມາຄົມປະຊາຊາດແຫ່ງອາຊີຕາເວັນອອກສຽງໃຕ້ (ອາຊຽນ) ທີ່ສິງກະໂປ.
