ອິນໂດເນເຊຍເລັ່ງຊ່ວຍເຫລືອ ເຫຍື່ອແຜ່ນດິນໄຫວ
ເຈົ້າໜ້າທີ່ກູ້ໄພ ແລະ ທະຫານອິນໂດເນເຊຍ ເລັ່ງຊ່ວຍເຫລືອຜູ້ປະສົບໄພແຜ່ນດິນໄຫວຢູ່ເກາະລອມບອກ ຫລັງເກີດຊ້ຳອີກໃນວັນທີ 5 ສິງຫາ ມີຜູ້ເສຍຊີວິດແລ້ວຢ່າງໜ້ອຍ 91 ຄົນ.
ໂຄສົກສຳນັກງານໄພພິບັດແຫ່ງຊາດອິນໂດເນເຊຍ ຖະແຫລງວ່າ: ເຈົ້າໜ້າທີ່ກູ້ໄພຍັງຄົ້ນຫາຜູ້ລອດຊີວິດໃນຊາກຫັກພັງຂອງເຮືອນ, ມັດສະຢິດ ແລະ ໂຮງຮຽນ ທີ່ໄດ້ຮັບຄວາມເສຍຫາຍໜັກຫລາຍພັນຫລັງຈາກແຮງສັ່ນສະເທືອນຂອງແຜ່ນດິນໄຫວໃນວັນທີ 5 ສິງຫາ ໂດຍຄາດວ່າຍອດຜູ້ເສຍຊີວິດໃນປັດຈຸບັນນີ້ມີຈຳນວນຢ່າງໜ້ອຍ 91 ຄົນຈະເພີ່ມຂຶ້ນອີກ. ຂະນະທີ່ມີລາຍງານຜູ້ໄດ້ຮັບບາດເຈັບປະມານ 200 ຄົນ.
Debris fills streets after 7.0-magnitude earthquake hits Indonesian tourist island of Lombok, killing at least 82 people and shaking neighboring Bali, one week after another quake killed more than a dozen. https://t.co/qzOmRiGONP pic.twitter.com/hIKVG0NGNc
— ABC News (@ABC) August 6, 2018
ແຜ່ນດິນໄຫວຄັ້ງຫລ້າສຸດນີ້ມີຂະໜາດ 6,9 ຣິກເຕີ ແລະ ເກີດເລິກລົງໄປພຽງ 10,5 ກິໂລແມັດ ໃນບໍລິເວນຕອນເໜືອຂອງເກາະລອມບອກ ແລະ ຮູ້ສຶກໄປເຖິງເກາະບາຫລີ ທີ່ຢູ່ໃກ້ຄຽງ, ແຮງສ່ັນສະເທືອນຮຸນແຮງຈົນຕ້ອງມີການປະກາດເຕືອນໄພຄື້ນສຶນາມິ, ປະຊາຊົນ ແລະ ນັກທ່ອງທ່ຽວທີ່ຕື່ນຕົກໃຈພາກັນໜີອອກຈາກເຮືອນ ແລະ ໂຮງແຮມທີ່ພັກໄປຢູ່ພື້ນທີ່ສູງ, ແຕ່ໄດ້ຍົກເລີກການເຕືອນໄພໃນເວລາຕໍ່ມາ ຈົນຮອດປັດຈຸບັນເກີດແຮງສັ່ນສະເທືອນຕາມມາ ຫລື ອາບເຕີຊ໊ອກ 120 ກວ່າຄັ້ງ.
ນາຍົກລັດຖະມົນຕີ ມັລຄອມ ເທິນບຸລ ຂອງອົດສະຕຣາລີ ໄດ້ສະເໜີໃຫ້ການຊ່ວຍເຫລືອຟື້ນຟູ ແລະ ກູ້ໄພແກ່ອິນໂດເນເຊຍ ເຖິງວ່າປັດຈຸບັນນີ້ຍັງບໍ່ມີຊາວອົດສະຕຣາລີໄດ້ຮັບບາດເຈັບຈາກແຜ່ນດິນໄຫວຄັ້ງນີ້. ເກາະລອມບອກແຫ່ງນີ້ຫາກໍຜະເຊີນແຜ່ນດິນໄຫວຂະໜາດ 6,4 ໃນໜຶ່ງອາທິດກ່ອນ ເຮັດໃຫ້ມີຜູ້ເສຍຊີວິດ 17 ຄົນ ແລະ ບາດເຈັບຫລາຍຮ້ອຍຄົນ. ນອກຈາກນີ້ ຍັງເຮັດໃຫ້ນັກທ່ອງທ່ຽວຕ່າງຊາດຫລາຍຮ້ອຍຄົນຕົກຄ້າງຢູ່ເທິງພູເຂົາໄຟຣິນຈານີ ກ່ອນຈະໄດ້ຮັບການຊ່ວຍເຫລືອ.
