ທ່ານ ຮຸນເຊນ ກຽມຂຶ້ນເວທີສະມັດຊາໃຫຍ່ UN ເທື່ອທຳອິດໃນຮອບ 3 ປີ
ທ່ານ ຮຸນເຊນ ປະກາດຈະຂຶ້ນກ່າວຖະແຫລງໃນເວທີປະຊຸມສະມັດຊາໃຫຍ່ສະຫະປະຊາຊາດ ທີ່ນະຄອນນິວຢອກ ໃນເດືອນກັນຍານີ້ ເຊິ່ງຈະເປັນການຮ່ວມງານດັ່ງກ່າວເທື່ອທຳອິດນັບແຕ່ປີ 2015 ເພື່ອຢືນຢັນ “ເອກະລາດ” ຂອງກຳປູເຈຍ ທີ່ບໍ່ຕ້ອງການໃຫ້ໃຜມາຮັບຮອງຜົນການເລືອກຕັ້ງ.
Cambodia's Hun Sen says will give speech to UN after 'flawed election' https://t.co/PwEwW90OSo pic.twitter.com/w1NlEmDyYW
— CNA (@ChannelNewsAsia) August 6, 2018
ສຳນັກຂ່າວຕ່າງປະເທດລາຍງານວ່າ: ທ່ານ ຮຸນເຊນ ນາຍົກລັດຖະມົນຕີກຳປູເຈຍ ກ່າວໃນວັນທີ 6 ສິງຫາວ່າ: ທ່ານຈະຂຶ້ນກ່າວປາໄສໃນເວທີປະຊຸມສະມັດຊາໃຫຍ່ສະຫະປະຊາຊາດ (UN) ທີ່ນະຄອນນິວຢອກ ໃນເດືອນກັນຍານີ້ ເພື່ອຢືນຢັນຄວາມເປັນເອກະລາດຂອງກຳປູເຈຍ ເຊິ່ງຈັດການເລືອກຕັ້ງໄດ້ດ້ວຍຕົນເອງ “ໂດຍບໍ່ຈຳເປັນຕ້ອງຂໍການຮັບຮອງຈາກໃຜ”. ຖ້າຄຳກ່າວຂອງຜູ້ນຳກຳປູເຈຍເປັນຄວາມຈິງ ຈະຖືເປັນການປາກົດຕົວໃນເວທີ UN ເປັນເທື່ອທຳອິດໃນຮອບ 3 ປີ ຂອງທ່ານ ຮຸນເຊນ.
ທັງນີ້, ພັກປະຊາຊົນກຳປູເຈຍ (CPP) ຂອງທ່ານ ຮຸນເຊນ ປະກາດໄຊຊະນະ “ຂາດລອຍ” ຈາກການເລືອກຕັ້ງທົ່ວໄປໃນວັນທີ 29 ກໍລະກົດຜ່ານມາ ໂດຍການກວາດ 125 ບ່ອນນັ່ງໃນສະພາຜູ້ແທນລາຊະດອນ. ຄະນະກຳມະການການເລືອກຕັ້ງແຫ່ງຊາດມີກຳນົດປະກາດຜົນຄະແນນຢ່າງເປັນທາງການໃນວັນທີ 15 ສິງຫານີ້. ເຖິງຢ່າງໃດກໍຕາມ, ການເລືອກຕັ້ງຄັ້ງນີ້ເກີດຂຶ້ນທ່າມກາງການວິຈານຢ່າງໜັກຈາກກຸ່ມປະເທດຕາເວັນຕົກ ໂດຍສະເພາະອາເມລິກາ ແລະ ສະຫະພາບເອີຣົບ (EU) ວ່າ: ເປັນການເລືອກຕັ້ງທີ່ບໍ່ມີຄວາມປອດໃສ ແລະ ເປັນກາງ, ປາສະຈາກພັກຝ່າຍຄ້ານຢ່າງແທ້ຈິງ ເນື່ອງຈາກສານສູງສຸດຍຸບພັກກູ້ຊາດກຳປູເຈຍ (CNRP) ໃນທ້າຍປີຜ່ານມາ ແລະ ຕັດສິດສະມາຊິກ 118 ຄົນ ເປັນເວລາ 5 ປີ, ພ້ອມທັງດຳເນີນຄະດີກັບທ່ານ ເກິມ ສຸຂາ ຫົວໜ້າພັກ ໃນຂໍ້ຫາເປັນກະບົດ.
