ເປເຣຊ ຕັ້ງຄ່າຕົວ ໂມດຣິຊ ມະຫາໂຫດ
ຟໍເຣນຕິໂນ ເປເຣຊ ປະທານສະໂມສອນ ຣີລ ມາດຣິດ ຍັກໃຫຍ່ແຫ່ງ ລາລີກາ ສະເປນ ອອກມາຢຸດຂ່າວລືເລື່ອງການຍ້າຍທີມຂອງ ລູກາ ໂມດຣິຊ ມິດຟິລຄົນເກັ່ງຂອງທີມ ໂດຍລະບຸວ່າກໍລະນີທີ່ລາວຈະປ່ອຍດາວເຕະທີມຊາດໂຄຣເອເຊຍອອກໄປ ຄືຕ້ອງໄດ້ຄ່າຕົວ 750 ລ້ານຢູໂຣ ເທົ່ານັ້ນ ຫລັງມີຂ່າວວ່າກອງກາງອາຍຸ 32 ປີ ໄດ້ຮັບຄວາມສົນໃຈຈາກ ອິນເຕີ ມິລານ ທີມດັງໃນກັລໂຊ ເຊເຣຍ ອາ ອີຕາລີ.
ໂມດຣິຊ ຫາກໍໂຊຟອມເກັ່ງພາທີມໂຄຣເອເຊຍເຂົ້າເຖິງຮອບຊີງຊະນະເລີດ ໃນການແຂ່ງຂັນບານໂລກ 2018 ທີ່ປະເທດຣັດເຊຍ ແລະ ຍັງຄວ້າລາງວັນນັກເຕະດີເດັ່ນປະຈຳການແຂ່ງຂັນມາຄອງນຳອີກ ສົ່ງຜົນໃຫ້ລາວກາຍເປັນຈຸດສົນໃຈຂອງຫລາຍສະໂມສອນ ໂດຍມີ ອິນເຕີ ມິລານ ທີ່ຕົກເປັນຂ່າວ. ເຖິງຢ່າງໃດກໍຕາມ ເປເຣຊ ຢືນຢັນວ່າທີມໃດຕ້ອງການດາວເຕະໂຄຣເອເຊຍ ເຊິ່ງຍັງມີສັນຍາກັບ ຣີລ ມາດຣິດ ຮອດປີ 2020 ນັ້ນ ຕ້ອງເອົາເງິນ 750 ລ້ານຢູໂຣ ມາແລກເທົ່ານັ້ນ ໂດຍກ່າວວ່າ: ຄວາມເປັນໄປໄດ້ຢ່າງດຽວທີ່ຈະເຮັດໃຫ້ ໂມດຣິຊ ຍ້າຍອອກໄປ ຄືຂ້ອຍຕ້ອງໄດ້ຄ່າຕົວລາວເຖິງ 750 ລ້ານຢູໂຣເທົ່ານັ້ນ.
