ຢາກສອນລູກໃຫ້ໃຊ້ເງິນເປັນ ຢ່າເຮັດ 4 ຂໍ້ນີ້

ສໍາລັບຫຼາຍຄອບຄົວ ການເງິນຂອງລູກໜ້າຈະເລີ່ມຈາກການໄດ້ຄ່າເຂົ້າໜົມໄປໂຮງຮຽນ. 4 ຂໍ້ຄວນລະວັງ ພໍ່ແມ່ຫຼາຍຄົນມັກພາດເຮັດໃຫ້ບໍ່ໄດ້ສອນລູກໃຫ້ເຂົ້າໃຈການວາງແຜນການເງິນຕັ້ງແຕ່ນ້ອຍ ຫຼາຍຂໍ້ເປັນສິ່ງທີ່ເດັກນ້ອຍຫຼາຍຄົນຕິດນິໄສມາຈົນໃຫຍ່ ເຮັດໃຫ້ເກີດບັນຫາທີ່ໃຫຍ່ກວ່າຕາມມາເຊັ່ນ: ທ້ອນເງິນບໍ່ໄດ້, ເປັນໜີ້ເປັນສິນ ແບບນີ້ເປັນຕົ້ນ.

4 ຂໍ້ດັ່ງນີ້:

1. ບໍ່ກໍານົດຄ່າເຂົ້າໜົມຕາຍຕົວ: ພໍ່ແມ່ບາງຄົນໃຫ້ຄ່າເຂົ້າໜົມລູກເປັນຄັ້ງໆ ໂດຍໃຫ້ລູກມາຂໍອີກເມື່ອຈ່າຍເງິນທີ່ໄດ້ໄປນັ້ນໝົດແລ້ວ ຫຼື ມາຂໍເພີ່ມເມື່ອຕ້ອງການຊື້ຫຍັງ ບໍ່ຄວນເຮັດແບບນີ້ ເຮົາຈະບໍ່ໄດ້ສອນລູກໃຫ້ຮູ້ຈັກຄວາມສະໝໍ່າສະເໝີ ແລະ ບໍ່ສາມາດເຂົ້າໃຈຄອນເຊັບຂອງເງິນ ແລະ ວາງແຜນການໃຊ້ຈ່າຍ ເພາະເມື່ອໃຊ້ເງິນໝົດ ກໍຈະຂໍໄດ້ເພີ່ມ ຈຶ່ງບໍ່ຮູ້ປະຢັດເງິນ, ແຕ່ຫາກກໍານົດຄ່າເຂົ້າໜົມແບບຕາຍຕົວ ລູກຈະຮູ້ວາງແຜນການສໍາລັບອະນາຄົດ ໂດຍຈະຕ້ອງບໍລິຫານເງິນທີ່ມີຢູ່ຈົນກວ່າຈະໄດ້ເຂົ້າໜົມຮອບຕໍ່ໄປ ແລະ ຫາກຢາກໄດ້ສິ່ງໃດ ກໍຈະຮູ້ຈັກນໍາເງິນທີ່ທ້ອນໄວ້ສ່ວນໜຶ່ງ ເພື່ອຊື້ສິ່ງຂອງນັ້ນໄດ້.
2. ໃຫ້ຄ່າເຂົ້າໜົມລູກຫຼາຍເກີນໄປ: ພໍ່ແມ່ທຸກຄົນຄົງຢາກໃຫ້ລູກມີເງິນພໍກິນພໍໃຊ້ ແຕ່ຂໍແນະນໍາວ່າ ຢ່າໃຫ້ຄ່າເຂົ້າໜົມລູກຫຼາຍເກີນໄປ ການມີງົບປະມານຈໍາກັດ ຈະຊ່ວຍສອນລູກໃຫ້ເຂົ້າໃຈວ່າຄົນເຮົາບໍ່ຈໍາເປັນຕ້ອງໄດ້ທຸກຢ່າງໃນທັນທີ ແລະ ສອນລູກວ່າຄວນຊື້ສິ່ງທີ່ຈໍາເປັນຫຼາຍກວ່າສິ່ງຂອງທີ່ຢາກໄດ້.
3. ບໍ່ລົມເລື່ອງການທ້ອນເງິນ: ເຖິງວ່າລູກໆມີໜ້າທີ່ຮຽນໜັງສືໃຫ້ສູງໆ ແລະ ພໍ່ແມ່ມີໜ້າທີ່ຫາເງິນໃຫ້ລູກຮຽນເທົ່ານັ້ນ ແຕ່ວ່າໜ້າທີ່ອີກໜຶ່ງຂໍ້ຂອງພໍ່ແມ່ທັງຫຼາຍກໍຄື ການສອນລູກໃຫ້ຮູ້ຈັກຮັບຜິດຊອບຕົນເອງ ລວມທັງການເກັບທ້ອນເງິນດ້ວຍ ຊຶ່ງເຮົາສາມາດສອນລູກເກັບເງິນເປັນກ້າວທໍາອິດຂອງການວາງແຜນການເງິນໃຫ້ລູກໆ ລອງທ້ອນເງິນສ່ວນໜຶ່ງຈາກຄ່າເຂົ້າໜົມທຸກເດືອນ ບໍ່ວ່າຈະຈໍານວນໜ້ອຍ ຫຼືຫຼາຍກໍໄດ້ ສອນລູກໃຫ້ຮູ້ຈັກຄວາມສະໝໍ່າສະເໝີເປັນຫຼັກ.
4. ຕິດສິນບົນກັບຄະແນນການຮຽນຂອງລູກ: ຈ່າງໃຫ້ລູກຕັ້ງໃຈຮຽນ ແລະ ໄດ້ຄະແນນດີໆ ຂາດແຮງບັນດານໃຈໃນການຮຽນຮູ້ດ້ວຍຕົນເອງ ແລະ ເຮັດເພື່ອເງິນແທນ ຄິດວ່າສິ່ງສໍາຄັນທີ່ສຸດຄືການສອນລູກໃຫ້ມີນິໄສ​ໄຝ່ຮູ້ ແລະ ຕັ້ງໃຈດ້ວຍຕົນເອງໃຫ້ໄດ້ ເພື່ອທີ່ລູກໆຈະໄດ້ຕັ້ງໃຈເຮັດວຽກທຸກຢ່າງໃຫ້ສໍາເລັດບໍ່ວ່າຈະໄດ້ຜົນຕອບແທນ ຫຼື ບໍ່ ການໃຫ້ລາງວັນລູກເປັນສິ່ງທີ່ດີ ແຕ່ຢ່າໃຫ້ເຖິງຂັ້ນສັນຍາກັນໄວ້ກ່ອນ ລູກໆໃຫຍ່ມາຈະໄດ້ບໍ່ຕັ້ງເງື່ອນໄຂໃນການເຮັດງານ.