ນໍ້າໃຈນັກເຕະຍັງບໍ່ເຫືອດແຫ້ງ ລາວໂຕໂຢຕ້າ ລະດົມທຶນຊ່ວຍເຫລືອອັດຕະປື
ນໍ້າໃຈນັກເຕະຍັງບໍ່ເຫືອດແຫ້ງ ສະໂມສອນລາວໂຕໂຢຕ້າ ລະດົມທຶນຊ່ວຍເຫລືອອັດຕະປື ໃນວັນທີ 31 ກໍລະກົດຜ່ານມາ ທີ່ສູນການຄ້າວຽງຈັນ ເຊັນເຕີ ສະໂມສອນ ລາວໂຕໂຢຕ້າ ເອັຟຊີ ແຊ້ມລາວພຣີເມຍລີກ 2018 ນໍາໂດຍ ທ່ານ ໂພແກ້ວ ພິລາພັນເດຊ ຜູ້ຈັດການທີມສະໂມສອນ ພ້ອມດ້ວຍນັກກິລາທັງໝົດເຂົ້າຮ່ວມ.
ສະໂມສອນລາວໂຕໂຢຕ້າ ຖືວ່າເປັນສະໂມສອນໜຶ່ງທີ່ເປັນແບບຢ່າງໃນວົງການກິລາບານເຕະ ເຊິ່ງໄດ້ຈັດກິດຈະກໍາດີໆເພື່ອຊ່ວຍເຫລືອຜູ້ປະສົບໄພພິບັດນໍ້າຖ້ວມ ທີ່ແຂວງອັດຕະປື ເຊິ່ງກິດຈະກໍາຄັ້ງນີ້ມີຫລາກຫລາຍລາຍການ ເພື່ອໃຫ້ຜູ້ເຂົ້າມາທ່ຽວຊົມວຽງຈັນເຊັນເຕີໄດ້ມີສ່ວນຮ່ວມໃນການຊ່ວຍເຫລືອພີ່ນ້ອງລາວທີ່ກໍາລັງປະສົບໄພດັ່ງກ່າວ. ສໍາລັບການລະດົມທຶນຄັ້ງນີ້ຍອດລວມທັງໝົດ 2 ລ້ານກວ່າກີບ ເຊິ່ງລາຍໄດ້ທັງໝົດຈະສົ່ງໄປມອບໃຫ້ແກ່ຜູ້ປະສົບໄພ.
ນອກຈາກນັ້ນ, ທ້າວ ຄາຊູ ໂຮມມະ ນັກເຕະສະໂມສອນ ລາວໂຕໂຢຕ້າ ເອັຟຊີ ຍັງໄດ້ປະມູນເສື້ອຂອງຕົນເອງທີ່ໃຊ້ລົງແຂ່ງຂັນເປບຊີລາວ ພຣີເມຍລີກ 2018 ແຕ່ລະຄັ້ງ ເພື່ອນໍາລາຍໄດ້ສົມທົບຊ່ວຍຜູ້ປະສົບໄພພິບັດນໍ້າຖ້ວມ ເຊິ່ງລາຄາເລີ່ມຕົ້ນ 150.000 ກີບ ໂດຍເລີ່ມປະມູນແຕ່ວັນທີ 29 ກໍລະກົດຜ່ານມາ ແລະ ຈະປິດປະມູນໃນວັນທີ 4 ສິງຫານີ້. ດັ່ງນັ້ນ ຖ້າທ່ານໃດສົນໃຈການປະມູນດັ່ງກ່າວ ສາມາດຕິດຕາມໄດ້ໃນເພສ LAO TOYOTA FC.
