ເຊລຊີ ກຽມເພີ່ມຄ່າແຮງງານໃຫ້ ເອັນໂກໂລ້ ກ໋ອງເຕ້ 2 ແສນກວ່າປອນຕໍ່ອາທິດ

ເຊລຊີ ຕ້ອງການມອບລາງວັນໃຫ້ ເອັນໂກໂລ້ ກ໋ອງເຕ້ (N’Golo Kanté) ກອງກາງຂອງທີມ ຊຶ່ງເປັນຫນຶ່ງໃນຂຸນກຳລັງນຳທີມຊາດຝຣັ່ງຄວ້າແຊ້ມໂລກ 2018. ພ້ອມກັບບໍ່ຕ້ອງການໃຫ້ ກ໋ອງເຕ້ ຍ້າຍອອກຈາກທີມ ຫລັງມີຂ່າວ ປາຣີສ ແຊັງແຊກແມັງ ໃຫ້ຄວາມສົນໃຈ ຊຶ່ງ ເຊລຊີ ພ້ອມມອບຄ່າແຮງໃຫ້ ກ໋ອງເຕ້ ຈາກ 120.000 ປອນ ເປັນ 290.000 ປອນຕໍ່ອາທິດ ຫລາຍສຸດເປັນປະຫວັດສາດຂອງທີມ ໂດຍສັນຍາຂອງ ກ໋ອງເຕ້ ກັບ ເຊລຊີ ແມ່ນຈະສິ້ນສຸດໃນເດືອນມິຖຸນາ 2021.

ສຳລັບ ກ໋ອງເຕ້ ອາຍຸ 27 ປີ ເປັນຄົນເຊື້ອສາຍມາລີ ຍ້າຍຈາກເລັສເຕີ ຊິຕີ້ ມາຢູ່ກັບ ເຊລຊີ ໃນກາງເດືອນກໍລະກົດ 2016 ມູນຄ່າ 32 ລ້ານປອນ ຫລັງຈາກພາເລັສເຕີ ສ້າງປະຫວັດສາດຄວ້າແຊ້ມພຣີເມຍລີກ ລະດູການ 2015-16. ມາຢູ່ກັບ ເຊລຊີ ລະດູການຕໍ່ມາພາ ເຊລຊີ ຄວ້າແຊ້ມພຣີເມຍລີກ ພ້ອມຮັບລາງວັນນັກເຕະດີເດັ່ນຂອງພຣີເມຍລີກ ແລະ ສະມາຄົມນັກເຕະບານອາຊີບອັງກິດ.