ອຸຕຸເຕືອນຫລາຍແຂວງໃຫ້ມີສະຕິລະວັງຫລັງລະດັບແມ່ນໍ້າຂອງສູງຂຶ້ນໃກ້ເຂດອັນຕະລາຍແລ້ວ

ກົມອຸຕຸນິຍົມ ແລະ ອຸທົກກະສາດ ໄດ້ແຈ້ງເຕືອນໃຫ້ອໍານາດການປົກຄອງ ແລະ ປະຊາຊົນຫລາຍແຂວງທີ່ຢູ່ລຽບຕາມແມ່ນໍ້າຂອງໃຫ້ມີສະຕິລະວັງກຽມພ້ອມຮັບມື້ກັບສະພາບນໍ້າຖ້ວມ, ຫລັງຈາກເຫັນວ່າລະດັບແມ່ນໍ້າຂອງສູງຂຶ້ນໃກ້ເຂດອັນຕະລາຍແລ້ວໃນວັນທີ 31 ກໍລະກົດນີ້ ແລະ ອາດສູງກາຍເຂດອັນຕະລາຍໃນບໍ່ເທົ່າໃດວັນຕໍ່ໜ້ານີ້, ເຊິ່ງລະດັບນໍ້າຂອງທີ່ວັດແທກໃນວັນທີ 31 ກໍລະກົດຢູ່ບໍລິຄໍາໄຊ 12,49 ແມັດ ຖືວ່າໃກ້ເຂດລະວັງໄພ 13,50 ແມັດ ແລະ ເຂດອັນຕະລາຍ 14,50 ແມັດ. ເຂດທ່າແຂກແຂວງຄໍາມ່ວນຢູ່ລະດັບ 12,84 ແມັດຢູ່ໃກ້ເຂດລະວັງໄພ 13 ແມັດ ແລະ ເຂດອັນຕະລາຍ 14 ແມັດ. ຢູ່ແຂວງສະຫວັນນະເຂດວັດແທກໄດ້ 11,48 ແມັດ ຢູ່ໃກ້ເຂດລະວັງໄພແລ້ວຄື 12 ແມັດ ແລະ ເຂດອັນຕະລາຍ 13 ແມັດ. ສ່ວນຢູ່ປາກເຊລະດັບນໍ້າວັດແທກໄດ້ 12,68 ແມັດ ຖືວ່າກາຍເຂດອັນຕະລາຍ 12 ແມັດແລ້ວ. ສ່ວນລະດັບນໍ້າຊອງເມືອງວັງວຽງ ຢູ່ລະດັບ 3,46 ແມັດ ຊຶ່ງໃກ້ເຂດລະວັງໄພ 4 ແມັດ, ນໍ້າເຊຈໍາພອນແກ້ງກອກຢູ່ລະດັບ 8,62 ແມັດ ກາຍເຂດລະວັງໄພ 8,50 ແມັດແລ້ວ. ສ່ວນນໍ້າເຊບັ້ງໄຟຈຸດມະຫາໄຊມີລະດັບ 17,22 ແມັດ ເຊິ່ງໄດ້ກາຍລະດັບອັນຕະລາຍເຖິງ 2 ແມັດ ແລະ ສາຍນໍ້າຕ່າງໆກໍຍັງສືບຕໍ່ເພີ່ມສູງຂຶ້ນເລື້ອຍ ເນື່ອງຈາກຄວາມກົດດັນອາກາດຕໍ່າຍັງຈະສືບຕໍ່ປົກຄຸມພາກເໜືອ ແລະ ພາກກາງຂອງລາວ ເຊິ່ງຈະເຮັດໃຫ້ມີຝົນຕົກເປັນບໍລິເວນກວ້າງໃນໄລຍະ 2-3 ວັນຕໍ່ໜ້ານີ້. ດັ່ງນັ້ນຂໍໃຫ້ປະຊາຊົນທີ່ຢູ່ລຽບຕາມແຄມແມ່ນໍ້າຂອງ, ແມ່ນໍ້າສາຂາຕ່າງໆ ໄດ້ກະກຽມເກັບມ້ຽນວັດຖຸສິ່ງຂອງມີຄ່າ ແລະ ສັດລ້ຽງໄປໄວ້ບ່ອນປອດໄພ, ພ້ອມທັງໃຫ້ຕິດຕາມສະພາບອາກາດ ແລະ ລະດັບນໍ້າຢ່າງໃກ້ຊິດຈາກກົມອຸຕຸນິຍົມ ແລະ ອຸທົກກະສາດ.