ເຂື່ອນນໍ້າງື່ມ 5 ປ່ອຍນໍ້າອອກຈາກອ່າງແລ້ວ
ໃນວັນທີ 29 ກໍລະກົດນີ້, ເຈົ້າຂອງໂຄງການເຂື່ອນນ້າງື່ມ 5 ຈໍາກັດ ໄດ້ເຮັດໜັງສືສະເໜີຫາອໍານາດການປົກຄອງເມືອງພູຄູນແຂວງຫລວງພະບາງ ແລະ ເມືອງພູກູດແຂວງຊຽງຂວາງ ເພື່ອຊ່ວຍແຈ້ງໃຫ້ປະຊາຊົນຜູ້ຢູ່ລຸ່ມເຂື່ອນໄດ້ກະກຽມຄວາມພ້ອມຍົກຍ້າຍວັດຖຸສິ່ງຂອງມີຄ່າໄປໄວ້ບ່ອນປອດໄພ, ຫລັງຈາກເຫັນວ່າປະລິມານນໍ້າໃນອ່າງເຂື່ອນນີ້ມີລະດັບສູງຂຶ້ນເລື້ອຍໆ ແລະ ຮັບປະກັນບໍ່ໃຫ້ນໍ້າລົ້ນເຂື່ອນຈຶ່ງມີຄວາມຈໍາເປັນຕ້ອງໄດ້ປ່ອຍນໍ້າທີ່ມີຢູ່ອ່າງອອກນັບແຕ່ໃນວັນທີ 30 ກໍລະກົດໄປຈົນຮອດວັນທີ 25 ຕຸລາ 2018 ໂດຍປະລິມານນໍ້າທີ່ປ່ອຍອອກປະມານ 85-3.332 ແມັດກ້ອນຕໍ່ວິນາທີ, ດັ່ງນັ້ນຂໍໃຫ້ປະຊາຊົນທີ່ອາໃສ່ຢູ່ລຸ່ມເຂື່ອນໂດຍສະເພາະບ້ານນໍ້າຕິ່ງ ແລະ ບ້ານຊຽງແດດ ໃຫ້ເອົາໃຈໃສ່ປ້ອງກັນບໍ່ໃຫ້ເດັກນ້ອຍໄປຫລີ້ນໃກ້ແຄມນໍ້າເດັດຂາດ, ພ້ອມທັງຍົກຍ້າຍວັດຖຸສິ່ງຂອງຊັບສີນມີຄ່າ ແລະ ສັດລ້ຽງໄປໄວ້ບ່ອນປອດໄພ ແລະ ໃຫ້ຕິດຕາມລະດັບນໍ້າທີ່ຈະມີການປ່ຽນແປງຢ່າງໃກ້ຊິດໃນໄລຍະລະດູຝົນນີ້.
ຂ່າວໃຫ້ຮູ້ຕື່ມວ່າ: ໃນວັນທີ 29 ກໍລະກົດນີ້, ອໍານາດການປົກຄອງແຂວງສະຫວັນນະເຂດໄດ້ອອກແຈ້ງການໃຫ້ເຈົ້ານະຄອນ, ອໍານາດປົກຄອງເມືອງ, ກົມກອງອ້ອມຂ້າງ ແລະ ປະຊາຊົນໃນທົ່ວແຂວງ ໃຫ້ກະກຽມຄວາມພ້ອມຮັບມືກັບໄພພິບັດນໍ້າຖ້ວມທີ່ອາດຈະເກີດຂຶ້ນ, ພາຍຫລັງເຫັນວ່າໄລຍະຫລາຍວັນຜ່ານມາໄດ້ມີຜົນຕົກຕໍ່ເນື່ອງໃນທົ່ວແຂວງ ເຮັດໃຫ້ສະພາບແມ່ນໍ້າຂອງ, ແມ່ນໍ້າລໍາເຊ ແລະ ຫ້ວຍນໍ້າຕ່າງໆ ມີລະດັບນໍ້າເພີ່ມຂຶ້ນຢ່າງໄວວາໃກ້ລະດັບເຂດອັນຕະລາຍແລ້ວ, ຈຶ່ງຂໍໃຫ້ປະຊາຊົນທີ່ອາໃສຢູ່ຕາມແຄມແມ່ນໍ້າລໍາເຊຕ່າງໆ ໃຫ້ມີສະຕິເຝົ້າລະວັງກະກຽມຍົກຍ້າຍສິ່ງຂອງທີ່ມີຄ່າ ແລະ ສັດລ້ຽງ ໄປໄວ້ບ່ອນປອດໄພ, ພ້ອມທັງໃຫ້ແຕ່ລະເມືອງ, ພະແນກການ, ກົມກອງອ້ອມຂ້າງແຂວງເອົາໃຈໃສ່ຕິດຕາມຂ່າວຂໍ້ມູນຂ່າວສານກ່ຽວກັບພະຍາກອນອາກາດ ແລະ ລະດັບນໍ້າຢ່າງໃກ້ຊິດ ແລະ ແຕ່ງຕັ້ງໜ່ວຍເຝົ້າລະວັງປະຈໍາການຕະ ຫລອດ 24 ຊົ່ວໂມງ ເພື່ອກຽມຄວາມພ້ອມໃນການຊ່ວຍເຫລືອປະຊາຊົນຢູ່ແຕ່ລະເຂດໃຫ້ທັນການ.
