ອຸຕຸເຕືອນໃຫ້ຜູ້ຢູ່ໃກ້ແຄມແມ່ນ້ຳຂອງ ແລະ ສາຍນ້ຳຕ່າງໆຮີບຮ້ອນເຄື່ອນຍ້າຍສິ່ງຂອງໄວ້ບ່ອນສູງ
ກົມອຸຕຸນິຍົມ ແລະ ອຸທົກກະສາດ ໄດ້ແຈ້ງເຕືອນໃຫ້ປະຊາຊົນບັນດາເຜົ່າທີ່ອາໄສຢູ່ລຽບຕາມແມ່ນ້ຳຂອງ ແລະ ແມ່ນ້ຳສາຂາຕ່າງໆ ໃຫ້ຮີບຮ້ອນເຄື່ອນຍ້າຍວັດຖຸສິ່ງຂອງມີຄ່າ ພ້ອມສັດລ້ຽງໄປໄວ້ບ່ອນປອດໄພ, ພາຍຫລັງເຫັນວ່າລະດັບນ້ຳຂອງ ແລະ ສາຂາແມ່ນ້ຳດັ່ງກ່າວຈະເພີ່ມຂຶ້ນແຕ່ວັນທີ 30 ກໍລະກົດເປັນຕົ້ນໄປ ເນື່ອງຈາກຍັງຈະມີຝົນຕົກເປັນບໍລິເວນກວ້າງຢູ່ທົ່ວທຸກພາກຂອງປະເທດ, ປັດຈຸບັນນ້ຳຂອງຢູ່ນະຄອນປາກເຊມີລະດັບ 12,43 ແມັດ ຖືວ່າກາຍເຂດອັນຕະລາຍ 12 ແມັດແລ້ວ, ສ່ວນແມ່ນ້ຳເຊຈຳພອນແກ້ງກອກຢູ່ລະດັບເຂດອັນຕະລາຍ 8,50 ແມັດ ແລະ ລ້ອງແມ່ນ້ຳເຊບັ້ງໄຟ ເຂດມະຫາໄຊ ປັດຈຸບັນຢູ່ລະດັບ 16,78 ແມັດ ກາຍລະດັບອັນຕະລາຍ 15 ແມັດ, ຂົວເຊບັ້ງໄຟມີລະດັບ 21,60 ແມັດ ເຂດລະວັງໄພ 18,50 ແມັດ, ລະດັບນ້ຳຈຸດຕົ້ນແຫນສູງ 14,15 ແມັດ ກາຍເຂດອັນຕະລາຍ 13 ແມັດ, ຈຸດເຊໂດນສຸວັນນະຄີລີ ມີລະດັບ 10,40 ແມັດ ໃກ້ເຂດອັນຕະລາຍ 11 ແມັດ, ສ່ວນແມ່ນ້ຳຄານ ເມືອງຮ້ຽມ ແຂວງຫົວພັນ ແລະ ສາຍນ້ຳອື່ນໆ ກໍມີລະດັບນ້ຳເພີ່ມຂຶ້ນເລື້ອຍໆ ຈຶ່ງແຈ້ງໃຫ້ປະຊາຊົນທີ່ອາໄສຢູ່ລຽບຕາມແຄມສາຍນ້ຳທັງຫລາຍກຽມຮັບມືໃຫ້ດີ ໂດຍສະເພາະຍົກຍ້າຍວັດຖຸສິ່ງຂອງມີຄ່າ ແລະ ສັດລ້ຽງໄປໄວ້ບ່ອນປອດໄພ, ພ້ອມທັງໃຫ້ຕິດຕາມຂ່າວພະຍາກອນອາກາດ ແລະ ລະດັບນ້ຳຈາກອຸຕຸນິຍົມຢ່າງໃກ້ຊິດ.
