ລາວ-ໄທລົງນາມບົດບັນທຶກຄວາມເຂົ້າໃຈພັດທະນາຊັບພະຍາກອນມະນຸດ

 

ວັນທີ 9 ມີ

ນານີ້, ຢູ່ນະຄອນຫລວງວຽງຈັນ, ສະມາຄົມນັກຂ່າວແຫ່ງ ສປປ ລາວ, ສະຖາບັນການພາລະສຶກສາວິທະຍາເຂດເພັດຊະບູນ ແລະ ສະມາຄົມນັກວິທະຍຸໂທລະພາບແຂວງເພັດຊະບູນ, ໄດ້ຮ່ວມລົງນາມບົດບັນທຶກຄວາມເຂົ້າໃຈວ່າດ້ວຍການຮ່ວມມືດ້ານວິຊາການ, ສົ່ງເສີມແລກປ່ຽນຄວາມຮູ້ປະສົບການດ້ານສື່ມວນຊົນ ແລະ ພັດທະນາຊັບພະຍາກອນມະນຸດ, ໃນນັ້ນ ໃຫ້ສະມາຄົມນັກຂ່າວແຫ່ງ ສປປ ລາວ ຄັດເລືອກ ແລະ ສົ່ງບຸກຄະລາກອນເຂົ້າສຶກສາຕໍ່ໃນລະດັບປະລິນຍາຕີ 2 ສາຂາເຊັ່ນ: ສື່ສານການກິລາ ແລະ ຈັດການການກິລາ; ຄັດເລືອກບຸຄະລາກອນເຂົ້າຮ່ວມອົບຮົມໃນຫລັກສູດໄລຍະສັ້ນຕາມຄວາມເໝາະສົມ ແລະ ສະໜັບສະໜູນວິທະຍາກອນທີ່ມີຄວາມສາມາດສະເພາະທາງດ້ານສື່ມວນຊົນ ແລະ ອຸປະກອນການຮັບໃຊ້ໃນການຮຽນ-ການສອນ, ມີມາດຕະຖານທັນສະໃໝ.

ການລົງນາມຄັ້ງນີ້ມີທ່ານ ບຸນເຈົ້າ ພິຈິດ ຮອງປະທານ, ຫົວໜ້າກຳມາທິການພົວພັນຕ່າງປະເທດ ສະມາຄົມນັກຂ່າວແຫ່ງ ສປປ ລາວ, ທ່ານຜູ້ຊ່ວຍສາສະດາຈານ ດຣ. ທົງໄຊ ສຸຂະດີ ຮອງອະທິການບໍດີສະຖາບັນການພາລະສຶກສາເຂດເພັດສະບູນ ແລະ ທ່ານ ວິລິດທະພົນ ຫິຣັນຣັດ ປະທານສະມາຄົມນັກວິທະຍຸ ແລະ ໂທລະພາບແຂວງເພັດຊະບູນ, ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

1. ໃຫ້ສົ່ງເສີມສະໜັບສະໜູນການຈັດກິດຈະກຳທາງວິຊາການແລກປ່ຽນຄວາມຮູ້ປະສົບການດ້ານສື່ມວນຊົນ ແລະ ກິດຈະກຳອື່ນໆ ເພື່ອການພັດທະນາບຸກຄະລາກອນແຫ່ງ ສປປ ລາວ, ບຸກຄະລາກອນສະຖາບັນການພາລະສຶກສາ ວິທະຍາເຂດເພັດຊະບູນ ແລະ ບຸກຄະລາກອນນັກວິທະຍຸ ແລະ ໂທລະພາບແຂວງເພັດຊະບູນ; 2. ໃຫ້ສະຖາບັນພາລະສຶກສາ ວິທະຍາເຂດເພັດຊະບູນ ໃຫ້ທຶນການສຶກສາປີ 2017, ໃນລະດັບປະລິນຍາຕີສາຂາສື່ສານການກິລາ ແລະ ສາຂາການຈັດການກິລາ, ສຳລັບບຸກຄະລາກອນສະມາຄົມນັກຂ່າວແຫ່ງ ສປປ ລາວ ຈຳນວນ 10 ທຶນ ແລະ ສະມາຄົມນັກຂ່າວວິທະຍຸ ແລະ ໂທລະພາບແຂວງເພັດຊະບູນ ຈຳນວນ 5 ທຶນ, ຊຶ່ງທຶນດັ່ງກ່າວແມ່ນຍົກເວັ້ນຄ່າໜ່ວຍກິດ ຕະຫລອດຈົບຫລັກສູດການສຶກສາ ໃນ 4 ປີ, ມີຫໍພັກ ແລະ ທຶນການສຶກສາຕາມຄວາມເໝາະສົມ; 3. ໃຫ້ສະຖາບັນໃຫ້ສະມາຄົມນັກຂ່າວວິທະຍຸໂທລະພາບແຂວງເພັດຊະບູນ ສະໜັບສະໜູນວິທະຍາກອນທີ່ມີຄວາມສາມາດສະເພາະດ້ານສື່ມວນຊົນ ແລະ ອຸປະກອນທີ່ຮັບໃຊ້ໃນການຮຽນ, ການສອນ, ການເຝິກປະສົບການວິຊາຊີບ ແລະ ປະສານງານແຫລ່ງເຝິກປະສົບການວິຊາສະເພາະທີ່ມີມາດຕະຖານເໝາະສົມທັນສະໃໝ, ພ້ອມທັງຊອກຫາທຶນການສຶກສາໃຫ້ແກ່ນັກສຶກສາຈາກສະມາຄົມນັກຂ່າວແຫ່ງ ສປປ ລາວ ຕາມຄວາມເໝາະສົມ.