ແລ່ນ-ລານລາວຍາດໄດ້ຫລຽນເງິນທີ່ຫວຽດນາມ

ສະຫະພັນແລ່ນ-ລານແຫ່ງຊາດລາວ ໄດ້ສົ່ງນັກກິລາແລ່ນ-ລານ 2 ຄົນເຂົ້າຮ່ວມການແຂ່ງຂັນແລ່ນ-ລານ ຊີງແຊ້ມນາໆຊາດ ຄັ້ງທີ 25 ທີ່ ສສ ຫວຽດນາມ ຈັດຂຶ້ນລະຫວ່າງວັນທີ 26-27 ກໍລະກົດຜ່ານມານີ້ ມີ 12 ປະເທດ ແລະ 35 ສະໂມສອນຈາກ ສສ ຫວຽດນາມ ເຂົ້າຮ່ວມ. ຂະນະທີ່ ນັກກິລາລາວສາມາດຍາດໄດ້ຫລຽນເງິນໃນລາຍການແລ່ນຂ້າມຮົ້ວ 110 ແມັດ.

ທ່ານ ສິດທິໄຊ ເລຂາສະຫະພັນແລ່ນ-ລານແຫ່ງຊາດລາວ ໃຫ້ສໍາພາດວ່າ: ການແຂ່ງຂັນຄັ້ງນີ້ ພວກເຮົາໄດ້ສົ່ງນັກກິລາເຂົ້າຮ່ວມຮ່ວມ 2 ຄົນຄື: ທ້າວ ອານຸສອນ ໄຊສາ ຈະລົງແຂ່ງ 2 ລາຍການຄື: ແລ່ນ 100 ແມັດ ແລະ ແລ່ນຂ້າມຮົ້ວ 110 ແມັດ, ສ່ວນນາງ ສີລິນາ ພະອາໄພ ແລ່ນ 100 ແມັດ ແລະ 200 ແມັດ. ຜ່ານການແຂ່ງຂັນ ທ້າວ ອານຸສອນ ໄຊສາ ສາມາດຍາດໄດ້ອັນດັບທີ 2 ຂອງການແຂ່ງໃນລາຍການແລ່ນຂ້າມຮົ້ວ 110 ແມັດ ດ້ວຍເວລາ 14,20 ວິນາທີໄດ້ຫລຽນເງິນມາຄອງ, ສ່ວນອັນດັບທີ 1 ປະເທດຟີລິບປິນ ດ້ວຍເວລາ 14,18 ວິນາທີ, ອັນດັບທີ 3 ຮົງກົງ ດ້ວຍເວລາ 14,24 ວິນາທີ.

ທ່ານເລຂາສະຫະພັນແລ່ນ-ລານແຫ່ງຊາດລາວ ຍັງໄດ້ເວົ້າຕື່ມອີກວ່າ: ການແຂ່ງຂັນຄັ້ງນີ້ ພວກເຮົາສາມາດສ້າງຜົນງານໄດ້ຢ່າງໂດດເດັ່ນຫລາຍ ເຖິງວ່າພວກເຮົາບໍ່ສາມາດຍາດໄດ້ຫລຽນຄໍາມາຄອງກໍຕາມ ແຕ່ໄດ້ສ້າງຄວາມປະທັບໃຈໃຫ້ແກ່ພວກເຮົາ ເພື່ອໃຫ້ມີແຮງບັນດານໃຈສ້າງນັກກິລາລາວໃຫ້ກ້າວທຽບເທົ່າກັບບັນດາປະເທດທັງພາຍໃນ ແລະ ສາກົນ.