ພາຍຸຖະຫລົ່ມຊ້ຳພື້ນທີ່ ປະສົບໄພພິບັດໃນຍີ່ປຸ່ນ
ພາຍຸກຳລັງແຮງພັດເຂົ້າທາງພາກກາງຂອງຍີ່ປຸ່ນໃນວັນທີ 29 ກໍລະກົດນີ້ ເຮັດໃຫ້ເກີດຝົນຕົກໜັກ ຂະນະທີ່ເຄື່ອນທີ່ໄປໃນພື້ນທີ່ຝັ່ງຕາເວັນຕົກ ເຊິ່ງຫາກໍໄດ້ຮັບຄວາມເສຍຫາຍຈາກອຸທົກກະໄພ ແລະ ດິນເຈື່ອນກ່ອນໜ້ານີ້.
ສະຖານີອຸຕຸນິຍົມວິທະຍາຍີ່ປຸ່ນລາຍງານວ່າ: ໄຕ້ຝຸ່ນຊົງດາຣີ ເຊິ່ງມີກຳລັງລົມສູງສຸດເຖິງ 180 ກິໂລແມັດຕໍ່ຊົ່ວໂມງ ຂຶ້ນຝັ່ງແຂວງມິເອະ ເມື່ອເວລາປະມານ 01:00 ໂມງວັນທີ 29 ກໍລະກົດຕາມເວລາທ້ອງຖິ່ນ ແລະ ໄດ້ອ່ອນກຳລັງລົງພາຍຫລັງຂຶ້ນຝັ່ງ ແລະ ຫລຸດລະດັບລົງເປັນພາຍຸເຂດຮ້ອນ, ແຕ່ທາງການຍັງປະກາດເຝົ້າລະວັງຕາມແຂວງຫລາຍແຫ່ງ. ພາຍຸດັ່ງກ່າວເຊິ່ງເຮັດໃຫ້ເກີດຝົນຕົກໜັກທາງພາກຕາເວັນອອກມາແລ້ວໄດ້ເຄື່ອນທີ່ໄປທາງຕາເວັນຕົກໃນວັນທີ 29 ກໍລະກົດນີ້. ເຈົ້າໜ້າທີ່ທາງຕາເວັນຕົກຂອງຍີ່ປຸ່ນຂໍໃຫ້ປະຊາຊົນຫລາຍໝື່ນຄົນອົບພະຍົບອອກຈາກພື້ນທີ່ກ່ອນຝົນຕົກໜັກຮຸນແຮງຂຶ້ນ. ສະຖານີໂທລະພາບແຜ່ພາບຄື້ນສູງພັດເຂົ້າທາງຝັ່ງຕາເວັນຕົກສຽງໃຕ້ຂອງນະຄອນຫລວງໂຕກຽວ, ຕົ້ນໄມ້ຫັກຈາກລົມພັດແຮງ ແລະ ຝົນຕົກໜັກ. ສະຖານີໂທລະພາບ NHK ລາຍງານວ່າ: ມີຜູ້ບາດເຈັບເກືອບ 20 ຄົນໃນພື້ນທີ່ 6 ແຂວງ, ສະຖານີອຸຕຸນິຍົມວິທະຍາຍີ່ປຸ່ນປະກາດເຕືອນວ່າ: ຈະມີຝົນຕົກໜັກ, ດິນເຈື່ອນ, ລົມພັດແຮງ ແລະ ຄື້ນສູງ ຈຶ່ງຂໍໃຫ້ປະຊາຊົນກຽມອົບພະຍົບໄວ້ກ່ອນ.
