ມັນຝຣັ່ງມີປະໂຫຍດຫລາຍກ່ວາແປ້ງທີ່ເຮັດໃຫ້ຕຸ້ຍ

ໃນມັນຝຣັ່ງ 3 ຂີດ ຈະມີວິຕາມິນເຊ ປະມານ 50% ຂອງຄວາມຕ້ອງການໃນແຕ່ລະມື້, ໄດ້ໄຟເບີປະມານ 7 ກຣາມ, ວິຕາມິນເບ 6 ແລະ ໂປຕັສຊຽມ ກໍປະມານ 50% ຂອງຄວາມຕ້ອງການທີ່ຄວນໄດ້ແຕ່ລະມື້.

ມັນມີແຕ່ແປ້ງ ກິນແລ້ວຈະຕຸ້ຍຫລືບໍ່ ? ມັນຝຣັ່ງກິນແລ້ວຕຸ້ຍ ສ່ວນໜຶ່ງມາຈາກຮູບພາບຂອງມັນຝຣັ່ງຈືນໃນນຳ້ມັນ ດັ່ງນັ້ນເຮົາບໍ່ໄດ້ກິນແນວນັ້ນກໍຢ່າຄິດຫລາຍຢ່າລືມວ່າເຂົ້າກໍມີແຕ່ແປ້ງຄືກັນ.

ສຳລັບຄົນທີ່ຢາກຈະກິນມັນຝຣັ່ງ ກໍອາດຈະເລືອກກິນແບບລ້າງເປືອກແລ້ວເອົາໄປອົບ ເອົາມາກິນແທນເຂົ້າໄດ້ ເປັນລົດຊາດກອບ ແຫ້ງນອກ ຊຸ່ມໃນ ແຊບໄປອີກແບບໜຶ່ງ.

ຫາກທ່ານຢ້ານຕຸ້ຍແທ້ໆ ຫລື ຄົນເປັນພະຍາດເບົາຫວານຢ້ານ ນຳ້ຕານຂຶ້ນຍ້ອນແປ້ງ ກໍໃຫ້ອົບພໍດີໆ ເພາະມັນຝຣັ່ງຈະມີຄ່າ Glycemic index  ສູງຂຶ້ນໃນກໍລະນີທີ່ປຸງແຕ່ງສຸກຫລາຍໆ ແລະ ໃນກໍລະນີມັນບົດ ແຕ່ຖ້າເອົາໄປອົບສຸກພໍດີ ຄ່າ Glycemic index ຈະຍັງບໍ່ສູງຫລາຍ.

ຄ່າ Glycemic index ຫລື ຄ່າ GI ແມ່ນດັດຊະນີທີ່ໃຊ້ວັດແທກຄຸນນະພາບຂອງອາຫານປະເພດຄາໂບໄຮເດຣດ ໂດຍວັດແທກຄ່າຫລັງກິນ, ຍ່ອຍ ແລະ ຖືກດູດຊຶມເຂົ້າສູ່ລະບົບການຍ່ອຍ ແລະ ດູດຊຶມຂອງຮ່າງກາຍແລ້ວ(ຫລັງກິນປະມານ 2 – 3 ຊົ່ວໂມງ) ອາຫານຊະນິດນັ້ນສາມາດເພີ່ມລະດັບນຳ້ຕານກລູໂກສໃນເລືອດໄດ້ເທົ່າໃດ ໂດຍຄ່າ GI ຈະຢູ່ຕັ້ງແຕ່ 0 ເຖິງ 100 ຍົກໂຕຢ່າງເຊັ່ນ : ນຳ້ຕານກລູໂກສ ຫລື ເຂົ້າໜົມປັງຂາວຈະມີຄ່າ GI ເທົ່າກັບ 100.

ດັ່ງນັ້ນ, ໃນກໍລະນີຂອງມັນຝຣັ່ງ ຍິ່ງອົບໃຫ້ສຸກຫລາຍເທົ່າໃດ ຈະຍິ່ງເພີ່ມຄ່ານຳ້ຕານກລູໂກສໃນເລືອດຂອງເຮົາສູງຂຶ້ນໄປນຳ.