ບໍລິສັດເຂື່ອນຢືນຢັນ ຮັບຜິດຊອບຕໍ່ເຫດການທີ່ເກີດຂຶ້ນທັງໝົດຢ່າງປະຕິເສດບໍ່ໄດ້

ຈາກກໍລະນີເຂື່ອນ D ແຕກ ຢູ່ເຂດໂຄງການ ສ້າງຜົນກະທົບຕໍ່ປະຊາຊົນຢ່າງຫຼວງຫຼາຍ ທີ່ອາໄສຢູ່ບໍລິເວນເມືອງສະໜາມໄຊ ແຂວງອັດຕະປື ເຈົ້າໜ້າທີ່ຈາກ ບໍລິສັດເຊປຽນ-ເຊນ້ຳນ້ອຍ (Xe-Pian Xe-Namnoy Power Co., Ltd: PNPC) ເຫັນດີວ່າ ບໍລິສັດຕ້ອງໄດ້ຮັບຜິດຊອບຄ່າເສຍຫາຍທັງໝົດ ຕາມລະບຽບກົດໝາຍ ແລະຂໍ້ຕົກລົງການສຳປະທານການເຄື່ອນໄຫວໄດ້ມີຂຶ້ນ ເມື່ອ ລັດຖະມົນຕີ ກະຊວງພະລັງງານແລະບໍ່ແຮ່ ທ່ານຄຳມະນີ ອິນທິລາດ ໄດ້ຢືນຢັນວ່າ ບໍລິສັດບໍ່ຢູ່ໃນຖານະທີ່ຈະປະຕິເສດຄວາມຮັບຜິດຊອບຕໍ່ເຫດການນ້ຳຖ້ວມໃນຄັ້ງນີ້ໄດ້ ທີ່ສ້າງຜົນເສຍຫາຍໃຫ້ແກ່ ຊີວິດການເປັນຢູ່ ແລະຊັບສິນຂອງປະຊາຊົນ ຢູ່ເມືອງສະໜາມໄຊທ່ານລັດຖະມົນຕີ ໄດ້ກ່າວໃນການຖະແຫຼງຂ່າວ ທີ່ນະຄອນຫຼວງວຽງຈັນ ໃນວັນອັງຄານທີ່ຜ່ານມາ ວ່າ “ກ່ຽວກັບເລື່ອງການທົດແທ່ນຄ່າເສຍຫາຍນັ້ນ ຂ້າພະເຈົ້າຢາກຢືນຢັນ ໂດຍຍຶດຖືຕາມຂໍ້ຕົກລົງຂອງການສຳປະທານ ເຫດການທີ່ເກີດຂຶ້ນທັງໝົດ ທີ່ກ່ຽວຂ້ອງກັບການກໍ່ສ້າງເຂື່ອນ ຜູ້ພັດທະນາໂຄງການຕ້ອງໄດ້ແບກຮັບ 100%”

ເຈົ້າໜ້າທີ່ອາວຸໂສ ຈາກບໍລິສັດເຊປຽນ-ເຊນ້ຳນ້ອຍ ກ່າວກັບ ໜັງສືພິມ Vientiane Times ວ່າ ບໍລິສັດພ້ອມທີ່ຈະຮັບຜິດຊອບຕໍ່ເຫດການທີ່ເກີດຂຶ້ນ ອີງຕາມຂໍ້ຕົກລົງການສຳປະທານ ແລະກົດໝາຍທີ່ກ່ຽວຂ້ອງ ບໍລິສັດບໍ່ໄດ້ພະຍາຍາມທີ່ຈະປະຕິເສດຄວາມຮັບຜິດຊອບແຕ່ຢ່າງໃດເຈົ້າໜ້າທີ່ບໍລິສັດກ່າວວ່າ “ພວກເຮົາຈະຮັບຜິດຊອບຕໍ່ເຫດການທີ່ເກີດຂຶ້ນຕາມກົດໝາຍ ແລະແນ່ນອນ ເປັນສິ່ງທີ່ປະຕິເສດບໍ່ໄດ້ ແນວໃດກໍຕາມ ຂ້າພະເຈົ້າບໍ່ສາມາດໃຫ້ລາຍລະອຽດກ່ຽວກັບການທົດແທນຄ່າເສຍຫາຍໄດ້” ແລະບໍລິສັດໄດ້ຢືນຢັນເລື່ອງນີ້ ກັບການນຳລະດັບສູງ ຈາກສູນກາງ ແລະທ້ອງຖິ່ນ ຂອງເກົາຫຼີແລ້ວ ເຈົ້າໜ້າທີ່ບໍລິສັດກ່າວຕື່ມທ່ານ ຄຳມະນີ ກ່າວວ່າ ພາລະກິດຫຼັກຂອງລັດຖະບານ, ຜູ້ພັດທະນາໂຄງການ ຕະຫຼອດເຖິງໜ່ວຍງານທີ່ກ່ຽວຂ້ອງ ຈະຕ້ອງໄດ້ແນໃສ່ ເຖິງການຟື້ນຟູສະພາບຊີວິດການເປັນຢູ່ຂອງປະຊາຊົນ ທີ່ໄດ້ຮັບຜົນກະທົບຈາກເຂື່ອນແຕກ ເຊິ່ງພາລະກິດນີ້ ຈະແບ່ງອອກເປັນ 2 ໄລຍະ ຄື ໄລຍະທີ 1 ເປັນໄລຍະສັ້ນ ແມ່ນແນໃສ່ການຊ່ວຍເຫຼືອ ແລະບັນເທົາທຸກ ຜູ້ເຄາະຮ້າຍຈາກເຫດການນ້ຳຖ້ວມ ສ່ວນໄລຍະທີ 2 ເປັນໄລຍະຍາວ ແມ່ນຈະໄດ້ມີການ ຟື້ນຟູໝູ່ບ້ານ ກໍ່ສ້າງເຮືອນຊານ ຈັດສັນທີ່ຢູ່ອາໄສ ໃຫ້ປະຊາຊົນໄດ້ມີພື້ນທີ່ດຳລົງຊີວິດທ່ານ ໄຊປະເສີດ ພົມສຸພາ ຫົວໜ້າກົມທຸລະກິດພະລັງງານ ກະຊວງພະລັງງານແລະບໍ່ແຮ່ ໄດ້ກ່າວວ່າ ຍັງໄວເກີນໄປ ທີ່ຈະເວົ້າເຖິງລາຍລະອຽດການທົດແທນຄ່າເສຍຫາຍໃນຕອນນີ້ ຈະຕ້ອງໄດ້ເບິ່ງເຖິງສາເຫດແລະຄວາມເສຍຫາຍ ທີ່ເກີດຈາກເຂື່ອນກ່ອນ ພາຍໃຕ້ຂໍ້ຕົກລົງການສຳປະທານ ເຊິ່ງມີລາຍລະອຽດຫຼາຍຢ່າງ ສະນັ້ນຈະຕ້ອງໄດ້ເບິ່ງຄືນ ຈຶ່ງຈະຮູ້ໄດ້ຢ່າງລະອຽດວ່າ ບໍລິສັດຕ້ອງຮັບຜິດຊອບຫຼາຍປານໃດທາງບໍລິສັດ ເຊປຽນ-ເຊນ້ຳນ້ອຍ ຕອນນີ້ ຍັງບໍ່ທັນໄດ້ອອກຖະແຫຼງການຢ່າງເປັນທາງການ ຕໍ່ສາທາລະນະ ເທື່ອ ກ່ຽວກັບເຫດການທີ່ເກີດຂຶ້ນ.

ທີ່ມາ: Vientiane Times