ລັດຖະມົນຕີກະຊວງແຮງງານເຕືອນປະຊາຊົນມີສະຕິຮັບມືກັບໄພພິບັດທໍາມະຊາດ ແລະ ຊ່ວຍເຫລືອຊຶ່ງກັນ ແລະ ກັນ
ເນື່ອງຈາກສະພາບອາກາດ ແລະ ພາຍຸໝູນເຂດຮ້ອນເຊີນຕິນຫົວທີ 9 ໄດ້ພັດຜ່ານບັນດາແຂວງພາກເໜືອພາກກາງ ແລະ ພາກໃຕ້ຂອງ ສປປ ລາວ ໃນລະຫວ່າງວັນທີ 15-23 ກໍລະກົດນີ້, ເຮັດໃຫ້ເກີດໄພນ້ຳຖ້ວມ ແລະ ດິນເຈື່ອນຢູ່ຫລາຍແຂວງເປັນຕົ້ນ: ແຂວງອັດຕະປື, ອຸດົມໄຊ, ຫົວພັນ, ບໍ່ແກ້ວ, ຄຳ ມ່ວນ, ສະຫວັນນະເຂດ, ຊຽງຂວາງ, ບໍລິຄຳໄຊ, ເຊກອງ, ຫລວງພະບາງ ແລະ ແຂວງໄຊຍະບູລີ, ອັນໄດ້ສົ່ງຜົນກະທົບໂດຍກົງຕໍ່ປະຊາຊົນ ແລະ ສ້າງຄວາມເສຍຫາຍຢ່າງຫລວງຫລາຍ ນັບທັງຊີວິດ ແລະ ຊັບສີນ ຕໍ່ພື້ນທີ່ການຜະລິດກະສິກຳ, ເສັ້ນທາງ, ໂຮງຮຽນ, ໂຮງໝໍ, ລະບົບໄຟຟ້າ ແລະ ອື່ນໆ. ດັ່ງນັ້ນ, ທ່ານ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການ-ສັງຄົມ ປະທານຄະນະກຳມະການປ້ອງກັນ ແລະ ຄອບຄຸມໄພພິບັດແຫ່ງຊາດ ໄດ້ຖະແຫລງຕໍ່ສື່ມວນຊົນໃນວັນທີ 27 ກໍລະກົດນີ້ ເພື່ອໃຫ້ອົງການຈັດຕັ້ງພັກ-ລັດ, ປະຊາຊົນບັນດາເຜົ່າ, ພະນັກງານ, ທະຫານ, ຕຳ
ຫລວດ, ຫົວໜ່ວຍທຸລະກິດ ເພື່ອນມິດສະຫາຍຜູ້ຢູ່ໃກ້ ແລະ ຢູ່ໄກໃຫ້ຊາບ ເຖິງຜົນກະທົບໃນຄັ້ງນີ້. ພ້ອມໄດ້ຍົກໃຫ້ເຫັນເຫດການນ້ຳຖ້ວມຈາກອຸປະຕິເຫດຂອງໂຄງການກໍ່ສ້າງເຂື່ອນໄຟຟ້າ ເຊປຽນ-ເຊນ້ຳນ້ອຍ ທີ່ກຳລັງເກີດຂຶ້ນ ຢູ່ເມືອສະໜາມໄຊ ແຂວງອັດຕະປື ໄດ້ສົ່ງຜົນກະທົບຕໍ່ປະຊາຊົນ ຈຳນວນ 13 ບ້ານ, ສູນຫາຍ 131 ຄົນ, 587 ຄອບຄົວ, ຍັງຂາດທີ່ຢູ່ອາໃສ (3.060ຄົນ), ເຮັດໃຫ້ເຮືອນຊານຂອງປະຊາຊົນ, ພື້ນຖານໂຄງລ່າງ ແລະ ອື່ນໆ, ຈົມຢູ່ພື້ນນ້ຳ, ຊຶ່ງປັດຈຸບັນ ຍັງຢູ່ໃນການດຳເນີນການກອບກູ້ປະຊາຊົນອອກມາຢູ່ເຂດທີ່ປອດໄພ.
ຕໍ່ກັບເຫດການດັ່ງກ່າວ, ພັກ ແລະ ລັດຖະບານ, ກໍຄືອຳນາດການປົກຄອງທ້ອງຖິ່ນ ກໍໄດ້ມີການຈັດຕັ້ງຊີ້ນຳໃຫ້ການຊ່ວຍເຫລືອສຸກເສີນເປັນຕົ້ນ: ການນຳໃຊ້ກຳລັງກອງທັບ, ພາຫະນະອຸປະກອນ ການກູ້ໄພ ສົມທົບກັບກຳລັງແຮງງານຂອງອຳນາດການປົກຄອງທ້ອງຖິ່ນດຳເນີນການຊອກຄົ້ນ ແລະ ກອບກູ້ເອົາທັງຊິວິດ ແລະ ຊັບສິນຂອງປະຊາຊົນ ໄປບ່ອນທີ່ປອດໄພ, ສະໜອງເຄື່ອງຊ່ວຍເຫລືອບັນເທົາທຸກສຸກເສີນ, ຊ່ວຍເຫລືອດ້ານການແພດສຸກເສີນ ແລະ ອື່ນໆ. ໄດ້ເຮັດໃຫ້ຜູ້ປະສົບໄພພິບັດມີຄວາມປອດໄພ ແລະ ໄດ້ຮັບການຊ່ວຍເຫລືອເບື້ອງຕົ້ນເປັນຢ່າງດີ.
