ອາເມລິກາ-ອີຢູ ຕົກລົງຫລຸດຜ່ອນ ຄວາມຂັດແຍ່ງທາງການຄ້າໄດ້ແລ້ວ
ປະທານາທິບໍດີ ໂດນັລ ທຣຳ ຂອງອາເມລິກາ ແລະ ທ່ານ ມອງ ໂຄລັດ ຍຸງເກີ ປະທານຄະນະກຳມາທິການເອີຣົບ ເຫັນພ້ອມກັນໃນວັນທີ 25 ກໍລະກົດ ຕາມແຜນຫລຸດຜ່ອນຄວາມຂັດແຍ່ງທາງການຄ້າລະຫວ່າງສອງປະເທດມະຫາອຳນາດທາງເສດຖະກິດໂລກ.
ຄວາມກັງວົນດັ່ງກ່າວເຊິ່ງບໍ່ໄດ້ເປີດເຜີຍລາຍລະອຽດ ເທົ່າກັບວ່າລັດຖະບານອາເມລິກາຈະບໍ່ດຳເນີນມາດຕະການຕາມທີ່ໄດ້ຂົ່ມຂູ່ໄວ້ວ່າຈະເກັບພາສີລົດຍົນ ເຊິ່ງຈະສົ່ງຜົນກະທົບຕໍ່ທຸລະກິດລົດຍົນເຢຍລະມັນ. ຜູ້ນຳອາເມລິກາ ແລະ ອີຢູ ພົບກັນເປັນເວລາກວ່າ 2 ຊົ່ວໂມງ ໃນການຫາລືທີ່ທຳນຽບຂາວ ລວມທັງຍັງເຈລະຈາເລື່ອງທີ່ຍັງຄ້າງຄາ ເພື່ອຫລຸດຜ່ອນບັນຫາທີ່ອາເມລິກາຮຽກເກັບພາສີສິນຄ້ານຳເຂົ້າເຊັ່ນ: ເຫລັກກ້າ ແລະ ອາລູມີນຽມ.
ຖະແຫລງການລະບຸວ່າ: ຜູ້ນຳອາເມລິກາ ແລະ ອີຢູ ໄດ້ຕົກລົງໃນການພົວພັນລະດັບໃໝ່ ເພື່ອເດີນໜ້າສູ່ການປອດພາສີ, ບໍ່ມີການກີດກັນທາງການຄ້າ ແລະ ອຸດສາຫະກຳ. ນອກຈາກນີ້ ອີຢູ ຍັງໃຫ້ຄຳໝັ້ນວ່າຈະຈັດຊື້ຖົ່ວເຫລືອງ ແລະ ແກັສທຳມະຊາດຈາກອາເມລິກາ.
